ဟန်နွေ/People’s Spring
ကိုးကန့်တပ်မတော်(MNDAA)သိမ်းပိုက်ထားသည့် လားရှိုးမြို့ကို စစ်ကောင်စီက ယနေ့ မွန်းလွဲပိုင်း၌ နောက်တစ်ကြိမ် ထပ်မံဗုံးကြဲတိုက်ခိုက်ခဲ့ကြောင်း ဒေသခံအချို့က ပြောသည်။
ယနေ့ (အောက်တိုဘာ ၂၉ရက်) နေ့လည် ၁၂နာရီခန့်တွင် လားရှိုးမြို့ ရပ်ကွပ်(၁၁) အောင်စေတနာ လမ်းသွယ်ကို ဗုံးကြဲတိုက်ခိုက်ခဲ့သည့် စစ်ကောင်စီတပ်သည် မွန်းလွဲ ၂နာရီ ၃၄မိနစ်တွင် လားရှိုးမြို့ သာသနာ ၂၅၀၀ ကုန်း နေရာကို ထပ်မံ ဗုံးကြဲခဲ့သည်ဟု လားရှိုးမြို့ခံ မနော်ဖောက ပြောသည်။
” လူထိ၊မထိ မသိရသေးပါဘူး”ဟု မနော်ဖောက မွန်းလွဲပိုင်း လေကြောင်းတိုက်ခိုက်ခံရမှု အခြေအနေကို ပြောသည်။
Public Service Announcement
ယနေ့ နေ့လည် ၁၁နာရီ ၅၈မိနစ်က ရပ်ကွက်(၁၁) လေကြောင်း တိုက်ခိုက်ခံရမှုတွင် အရပ်သားတစ်ဦးထိခိုက်မှုရှိခဲ့သည်ဟု ဒေသသတင်းရင်းမြစ်တစ်ဦးက အသိပေးထားသည်။
စစ်ကောင်စီအနေဖြင့် MNDAA ထိန်းချုပ်ထားသည့် လားရှိုးမြို့ကိုဆက်လက်၍ လေကြောင်း စစ်ဆင်ရေးများ ပိုမိုပြုလုပ်လာနိုင်ကြောင်းလည်း ရှမ်းမြောက်စစ်ရေးသတင်းရင်းမြစ်က ပြောသည်။
” စစ်ကောင်စီကတော့ လားရှိုးကနေ MNDAA မထွက်မချင်း သူက တောက်လျှောက် ဖိအားပေးတဲ့အနေနဲ့ အခုလို လေကြောင်း တိုက်ခိုက်မှုဆက်လက်လုပ်ဆောင်မယ်လို့ ယူဆပါတယ်”ဟု ၎င်းက ပြောသည်။
စစ်ကောင်စီနှင့် တရုတ်နိုင်ငံခြားရေးဝန်ကြီး ဝမ်ယိတို့ တွေ့ဆုံပြီးနောက် ဩဂုတ်လကုန်ပိုင်းမှစ၍ လားရှိုးမြို့ကို စစ်ကောင်စီက လေကြောင်း တိုက်ခိုက်မှုများ ဆက်တိုက်လုပ်ဆောင်လျက်ရှိရာ အရပ်သား ပြည်သူများစွာသေဆုံးထိခိုက်ကာ နေအိမ်အဆောက်အဦးများစွာ ထိခိုက်ပျက်စီးခဲ့သည်။
