ဇော်ရမ်း/People’s Spring
ဘုတလင်မြို့နယ်အတွင်း အင်အားဖြည့်ထားသည့် စစ်ကောင်စီစစ်ကြောင်းနှင့် ပြည်သူ့ကာကွယ်ရေးတပ်ဖွဲ့များ ယနေ့ နံနက် တိုက်ပွဲဖြစ်ခဲ့ကြောင်း သတင်းရရှိသည်။
“ဘုတလင်ရဲ့အရှေ့ဘက်ကို စစ်ကြောင်းထွက်လာတာ။ ဒီမနက် တိုက်ပွဲ စဖြစ်နေတယ်” ဟု ကာကွယ်ရေးရဲတပ်ဖွဲ့ဝင်တဦးကပြောသည်။
တိုက်ပွဲအသေးစိတ်အခြေအနေကိုမသိရသေးဘဲ စစ်ကောင်စီက လေကြောင်းမှ ကင်းပတ်နေကြောင်း ဒေသခံအချို့ကပြောသည်။
Public Service Announcement
ယင်းစစ်ကြောင်းသည်အနောက်မြောက်တိုင်းစစ်ဌာနချုပ်(နမခ)မှ အောက်တိုဘာလပထမလပတ်ထဲတွင် ဘုတလင်မြို့သို့ဝင်ရောက်လာပြီး စစ်ကြောင်းထိုးခဲ့သည်။ အောက်တိုဘာလ၁၂ရက်၊ ၁၃ရက်နှင့် ၁၈ရက်တွင် ဗန္ဓုလကွက်သစ်ရပ်ကွက်၊မြောက်ပြင်ရပ်နှင့်စီပါရွာကိုစီးနင်းပြီး ဒေသခံများအား ဖမ်းဆီးသတ်ဖြတ်ခဲ့ရာ ကလေးငယ်နှင့် အမျိုးသမီးများအပါအဝင် ဒေသခံ စုစုပေါင်း ၂၄ဦး သေဆုံးခဲ့သည်။ ထို့ပြင် အရပ်သား ၉၀ ဦးခန့်ကို ဖမ်းဆီး၍ လူသားဒိုင်းအဖြစ် ပြုလုပ်ထားကြောင်းသိရသည်။
စစ်ကောင်စီ၏ မူလစစ်ကြောင်း၌ အင်အား ၁၀၀ ခန့်ရှိပြီးအောက်တိုဘာလ၂၅ရက်နံနက်ပိုင်းတွင် နမခမှ နောက်ထပ် ကားငါးစီးလိုက်လာကာ လက်နက်ခဲယမ်းများနှင့် လူအင်အား ထပ်ဖြည့်ထားသည်။
စစ်ကောင်စီစစ်ကြောင်းကြောင့် ဘုတလင်မြို့ပေါ်ရပ်ကွက်များနှင့် ပဲပြစ်တောရွာအပါအဝင် ဖိုကုန်း၊စီပါ၊မွန်အို၊ညောင်ကန် စိုင်းပြင်လေးနှင့် ဘေးပတ်ဝန်းကျင်ရွာများမှဒေသခံတစ်သောင်းကျော် စစ်ဘေးတိမ်းရှောင်နေကြရသည်။
ဘုတလင်မြို့နယ်တွင် ပြီးခဲ့သည့်စက်တင်ဘာလ၃၁ရက်နေ့က အင်အား ၈၅ ဦးပါ စစ်ကောင်စီစစ်ကြောင်းကို ပြည်သူ့ကာကွယ်ရေးတပ်ဖွဲ့များက စစ်ကြောင်းတကြောင်းလုံးပြုတ်အောင်တိုက်ခိုက် ချေမှုန်းခဲ့ဖူးသည်။
