“BPLA က အညာကို နေရာပြောင်းလိုက်တာမဟုတ်ပါဘူး။ BPLA က အညာသားတွေ အညာကိုပြန်လာကြတာဖြစ်ပါတယ်။”
-ကိုဆောင်းခ(BPLA ကွပ်ကဲရေးမှူး)
ကရင် နှင့် ရှမ်းမြောက်၌ တိုင်းရင်းသားတော်လှန်ရေးတပ်ဖွဲ့များနှင့်အတူ တိုက်ပွဲဝင်နေသည့် ဗမာပြည်သူ့လွတ်မြောက်ရေးတပ်တော် (BPLA )က အညာဒေသတွင် တိုက်ပွဲများဖော်ဆောင်နိုင်ရန် အညာစစ်ဒေသအတွက် တပ်သားသစ်များ ခေါ်ယူနေခြင်းဖြစ်ကြောင်းBPLA ကွပ်ကဲရေးမှူး ကိုဆောင်းခကပြောကြားသည်။
အမှတ်(၃၀၈)၊ အညာစစ်ဒေသအတွက် BPLA က တပ်သားသစ်များ စိစစ်ရွေးချယ်ခေါ်ယူနေပြီဖြစ်ပြီး BPLA Facebook Page Messenger မှတဆင့် ဆက်သွယ်စုံစမ်းနိုင်ကြောင်း နိုဝင်ဘာ ၆ရက်တွင် တရာဝင်အသိပေးထုတ်ပြန်ထားသည်။
Public Service Announcement
“BPLA က အညာကို နေရာပြောင်းလိုက်တာမဟုတ်ပါဘူး။ BPLA က အညာသားတွေ အညာကိုပြန်လာကြတာဖြစ်ပါတယ်။ ဒီကာလကိုရောက်ဖို့ ကျနော်တို့ ၃ နှစ်ကျော်လောက် အချိန်ယူပြင်ဆင်တည်ဆောက်ခဲ့တာဖြစ်ပါတယ်။ အခုတော့ ခိုင်မာတဲ့မူဝါဒတွေနဲ့ စည်းစနစ်ကျတဲ့တပ်တော်တစ်ခုဖြစ်လာခဲ့ပါပြီ။ မကြာခင် အညာဒေသမှာ တိုက်ပွဲဖော်ဆောင်နိုင်ဖို့ တပ်ဖွဲ့ဝင်အသစ်များစုဆောင်းနေတာဖြစ်ပါတယ်” ဟု ကိုဆောင်းခက People’s Spring သို့သည်။
BPLA အနေဖြင့် အညာဒေသတွင် အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနလက်အောက်ခံ PDF တပ်ရင်းများ၊ အခြားသောတော်လှန်ရေးအင်အားစုများနှင့်အတူ ပူးပေါင်းကာ တော်လှန်ရေးအမြန်ဆုံးအောင်မြင်ရန် ကြိုးစားသွားမည်ဟုကိုဆောင်းခက အောက်တိုဘာ လကုန်ပိုင်းတွင်စတင်အသိပေးခဲ့သည်။
BPLA အနေဖြင့် တပ်တည်ထောင်ခြင်း ၃ နှစ်ကျော်ကာလအတွင်း ကနဦးအနေဖြင့် ကရင်ပြည်နယ် အမှတ်( ၁၀၇) စစ်ဒေသ နှင့် ရှမ်းမြောက်အခြေစိုက် အမှတ် (၂၀၃) စစ်ဒေသဟူ၍ အခြေစိုက်လှုပ်ရှားနယ်မြေ နှစ်နေရာရှိခဲ့သည်။ ယခုအခါ အညာဒေသ၌ပါ အမှတ်(၃၀၈)၊ အညာစစ်ဒေသ ဟူ၍ သုံးခုမြောက်စစ်ဒသတိုးချဲ့လာခြင်းဖြစ်သည်။
BPLA သည် NUG လက်အောက်ခံတပ်မဟုတ်ကြောင်း၊ သို့ရာတွင် ညီညွတ်ရေးကိုရှေးရှုပြီး အညာဒေသခံတပ်ဖွဲ့တွေအားလုံးနှင့်အတူ ပူးပေါင်းဆောင်ရွက်ရန် အစဉ် ကြိုးစားမည်ဖြစ်ကြောင်း ကွပ်ကဲရေးမှူး ကိုဆောင်းခက အောက်တိုဘာ ၂၇ ရက်တွင် ဖေစ်ဘွခ်၌ ရေးသားခဲ့သည်။
BPLA အနေဖြင့် ဗမာလူမျိုးစုကိုယ်စားပြုနိုင်ရေးနှင့် ဗမာလူထု၏ အသိအမှတ်ပြုမှု ရရှိရေးကို တဆင့်ချင်း လုပ်ဆောင်မည်ဟုလည်းဆိုသည်။
လတ်တလော BPLA အနေဖြင့် ရှမ်းမြောက် ၁၀၂၇ စစ်ဆင်ရေး နှင့် ကရင်ပြည်နယ်အတွင်း ဖာပွန်မြို့သိမ်းစစ်ဆင်ရေးတို့၌ဒေသခံတိုင်းရင်းသားတော်လှန်ရေးတပ်များနှင့်အတူ ပူးပေါင်းပါဝင်တိုက်ခိုက်လျှက်ရှိသည်။
အညာဒေသဟုခေါ်သည့် စစ်ကိုင်းတိုင်း၊မကွေးတိုင်း နှင့် မန္တလေးတိုင်းတို့တွင် အမျိုးသားညီညွတ်ရေးအစိုးရ(NUG) ၊ ကာကွယ်ရေးဝန်ကြီး ဌာန လက်အောက်ခံ PDF တပ်ရင်းများ ၊ပကဖများ ၊ ဒေသခံကာကွယ်ရေးအဖွဲ့-LPDFများအပြင် အခြားတော်လှန်ရေးတပ်ဖွဲ့ များစွာရှိသည်။ NUG ကာကွယ်ရေးဝန်ကြီးဌာန အမှတ် (၁)စစ်ဒေသ အောက်ရှိ PDF များ ၊ပကဖ နှင့်တော်လှန်ရေးအင်အားစုများက စစ်ကိုင်းတိုင်းတွင် ခမ်းပါတ် ၊ရွှေပြည်အေး ၊မော်လူး ၊မြို့သစ် ၊ ပင်လည်ဘူး မြို့များကို သိမ်းပိုက်ထိန်းချုပ်ထားပြီး ယခုအခါ အင်းတော်မြို့ကိုအပြီးသတ်သိမ်းပိုက်ရန် ထိုးစစ်ဆင်နေသည်။
မန္တလေးတိုင်းတွင်လည်း ပြည်သူ့ကာကွယ်ရေးတပ်မတော် (မန္တလေး) က စဥ့်ကူးမြို့နှင့် မတ္တရာမြို့ ရှိစစ်တပ်စခန်းများစွာကိုသိမ်းပိုက်ထားသည်။
မန္တလေးPDF ၊ မိုးကုတ်PDF တို့မှာ TNLA နှင့် ပူးပေါင်း၍ မိုးကုတ် ၊နောင်ချို စသောမြို့များကိုလည်းထိုးစစ်ဆင်သိမ်းပိုက်ထားသည်။ထိုအပြင် PDF များနှင့် တော်လှန်ရေးအင်အားစုများမှာ မန္တလေးမြို့ရှိ သပိတ်ကျင်း ၊တကောင်းမြို့များကိုသိမ်းပိုက်ထိန်းချုပ်ထားသည်။ ထိုကြောင့် PDF များဦးဆောင်တိုက်ခိုက်သိမ်းပိုက်ထားသောမြို့ အနည်းဆုံး ၈ မြို့ ရှိနေပြီဖြစ်သည်။
