ရဲခေါင်/People’s Spring
ပင်လောင်း-ဖယ်ခုံမြို့နယ်အတွင်း စစ်ကြောင်းထိုးနေသော စစ်ကောင်စီတပ်က အရပ်သား ၂၀၀ကျော်ကို ဖမ်းဆီးထားကြောင်း ကရင်နီအမျိုးသားများကာကွယ်ရေးတပ် KNDF က ပြောသည်။
ယခုလ ၁၁ ရက်က ရှမ်းပြည်နယ်တောင်ပိုင်း၊ ဖယ်ခုံမြို့နယ်၊ ပူချယ်ကျေးရွာမှ ကောက်ရိတ်ပြန်လာသော အရပ်သားပြည်သူ ၂၀၀ထက်မနည်းကို ပင်လောင်း-ဖယ်ခုံမြို့နယ်တွင် စစ်ကြောင်းထိုးနေသာ စစ်ကောင်စီတပ်ဖွဲ့မှ မတရားဖမ်းဆီးခဲ့ကြောင်း ရှေ့တန်းမြေပြင်သတင်းများအရ KNDF က အသိပေးသည်။
ဖမ်းဆီးခံရသော ပြည်သူများကို စစ်ကောင်စီမှ ပင်လောင်းမြို့အားကစားရုံအတွင်း ထိန်းသိမ်းထားကြောင်း ကနဦးသိရှိရပြီး ဖမ်းစီးခံရသူ ပြည်သူများမှာ မည်သူမည်ဝါ ဖြစ်ကြောင်းနှင့် အမျိူးသား၊ အမျိုးသမီး မည်မျှပါဝင်သည်ကို KNDF က စုံစမ်းနေဆဲ ဖြစ်သည်။
Public Service Announcement
“စစ်ရှောင်ဖို့ကြိုတင်သတိပေးခဲ့တယ်။သူတို့က ဒေသစွဲကြီးတော့ ပေတေပြီး ရသလိုနေ ကျန်ရစ်ခဲ့တာပေါ့။ စကစ စစ်ကြောင်းနဲ့ တိုးပြီး ဖမ်းခံရတာ”ဟု ဖယ်ခုံအခြေစိုက် စစ်ရှောင်ပြည်သူများကို ကူညီနေသူတစ်ဦးက လူထုနွေဦးသို့ ပြောသည်။
ဖယ်ခုံမြို့နယ်အတွင်း စစ်ကြောင်းထိုးနေသော စစ်ကောင်စီတပ်ဖွဲ့ဝင်များသည် ပင်လောင်း-ဖယ်ခုံ ကြားရှိ နန့်ဖာမူ၊ ပင်စုံ၊ လွုင်ကြိုင်း၊ ကုန်းပေါ၊ ဗန်းမောက်၊ ကျေးရွာများနှင့် ဖယ်ခုံမြို့ပေါ်ရပ်ကွက်ရှိ နေအိမ်များအား ဖောက်ထွင်း လုရက်ခြင်း၊ မီးရှို့ခြင်းများကို လုပ်ဆောင်ခဲ့သည်။
စစ်ကြောင်းထိုးရာ လမ်းတလျှောက်တွင်လည်း စစ်ကောင်စီတပ်မှ လေကြောင်းတိုက်ခိုက်မှုအကြိမ်(၁၀၀)မက လုပ်ဆောင်ခဲ့သည့်အပြင် တိုက်ပွဲနှင့် မသက်ဆိုင်သည့် ကျေးရွာများ၊ စစ်ရှောင်စခန်းများကိုလည်း လေကြောင်း တိုက်ခိုက်မှုများ ပြုလုပ်ခဲ့သည်။
နိုဝင်ဘာလအတွင်း ဖယ်ခုံမြို့နယ်တွင် စစ်ကောင်စီ၏ လေကြောင်းတိုက်ခိုက်မှုနှင့် ဒရုန်းဖြင့် တိုက်ခိုက်မှုတို့ကြောင့် (၈)နှစ်အရွယ် ကလေးတစ်ဦးအပါအဝင် အရပ်သားပြည်သူ(၆) ဦးသေဆုံးခဲ့ရပြီး (၅)ဦး ထိခိုက်ဒဏ်ရာ ရရှိထားသည်။
စစ်ဖက်ရေးရာအချက်အလက်များအရ ပင်လောင်း-ဖယ်ခုံသို့ စစ်ကောင်စီနှင့် ပအိုဝ်းပြည်သူ့စစ်၏ မြေလှန်စစ်ကြောင်းထိုးမှုမှာ သုံးလဝန်းကျင်ရှိပြီလည်းဖြစ်သည်။
ဖယ်ခုံ-ပင်လောင်းနယ်စပ်သို့ စစ်ကောင်စီစစ် ကြောင်းထိုးမှုကြောင့် စစ်ရှောင်ပြည်သူ ၂၀,၀၀၀ ထက်မနည်းရှိကြောင်း ကရင်နီအရပ်ဘက်လူမှုအဖွဲ့အစည်းများက ထုတ်ပြန်ထားသည်။
