▪︎ဘင်္ဂလားဒေ့ရှ်နှင့် နယ်စပ်ရေးရာ ပူးပေါင်းဆောင်ရွက်မှု ပိုအားကောင်းစေရန် ရည်ရွယ်ပြီး ငါးခိုးဖမ်းသူများကို ပြန်လွှတ်ပေးခဲ့သော်လည်း နောင်တွင် အရေးယူမည်ဟု အသိပေး
ရှိုင်း/People’s Spring
အာရက္ခတပ်တော်(AA)က ဖမ်းမိထားသည့် ဘင်္ဂလားဒေ့ရှ် နိုင်ငံသားများပိုင် ငါးခိုးဖမ်းသောလှေများအနက် ၇ စီးကို ဘင်္ဂလားဒေ့ရှ် နယ်ခြားစောင့်တပ်ဖွဲ့ထံ လွှဲပြောင်းပေးခဲ့ကြောင်း AAက ဗုဒ္ဓဟူးနေ့တွင် ထုတ်ပြန်သည်။
အာရက္ခရေပိုင်နက်အတွင်းသို့ ကျူးကျော်ဝင်ရောက် ငါးခိုးဖမ်းခဲ့သော ဘင်္ဂလားဒေ့ရှ်နိုင်ငံသား ရေလုပ်သား များအနက် ရေလုပ်သား ၂၀ ဦးနှင့် ငါးဖမ်းလှေ ၁၅ စီးကို နိုဝင်ဘာ ၅ရက်တွင် ဖမ်းမိခဲ့ခြင်းဖြစ်သည်ဟုသိရသည်။
အာရက္ခရေပိုင်နက်အတွင်းသို့ ကျူးကျော်ဝင်ရောက်ကာ ငါးခိုးဖမ်းနေသော ဘင်္ဂလားဒေ့ရှ်နိုင်ငံဘက်မှ ငါးဖမ်းလှေ အစီး (၆၀) ခန့်ကို အာရက္ခတပ်တော်၊ ကမ်းခြေစောင့် လုံခြုံရေးတပ်ဖွဲ့ဝင်များမှ တွေ့ရှိခဲ့၍ ခေါ်ယူ ဖမ်းစီးခဲ့ရာ စက်တပ် လှေ ၂စီး၊ စက်မပါသည့် လှေ ၁၃ စီး ဖမ်းမိခဲ့ခြင်းဖြစ်သည်ဟုဆိုသည်။
Public Service Announcement
ဖမ်းမိ ရေလုပ်သား ၂၀ ဦးကို နိုဝင်ဘာ ၇ရက်၌ပင် ဘင်္ဂလာဒေ့ရှ် နယ်ခြားစောင့်တပ်ထံ ပြန်လည်လွှဲပြောင်းပေးထားပြီး နိုဝင်ဘာ ၂၀ရက်တွင် ငါးဖမ်းလှေ ၇စီးကို ထပ်မံလွှဲပေးခြင်းဖြစ်သည်ဟုနိုဝင်ဘာ ၂၀ ရက်ထုတ်ပြန်ချက်တွင်ဖော်ပြသည်။
စစ်ဆေးမေးမြန်းချက်များအရ ငါးဝင်ခိုးသည့်ဘင်္ဂလားဒေ့ရှ်နိုင်ငံသား ရေလုပ်သားများသည် ဆင်းရဲနွမ်းပါးသူများဖြစ်ပြီး မိသားစုစားဝတ်နေရေးအကျပ်အတည်းများကို ငါးဖမ်းခြင်းဖြင့် အသက်မွေးဝမ်းကျောင်းပြုကာ ဖြေရှင်းနေကြသူများဖြစ်ကြောင်း ၊ နောင်တွင် အာရက္ခပိုင်နက်ထဲသို့ ကျူးကျော်ဝင်ရောက်ပြီး ငါးဖမ်းခြင်းများမပြုလုပ်ရန် ခံဝန်ကတိလက်မှတ်ထိုးပြီးမှ ပြန်လွှဲပြောင်းပေးခြင်းဖြစ်ကြောင်း AAက အသိပေးသည်။
ဘင်္ဂလားဒေ့ရှ်အစိုးရနှင့် AA အဖွဲ့အစည်းအကြား နှစ်ဖက်နယ်စပ်ရေးရာကိစ္စရပ်များ ပူးပေါင်းဆောင်ရွက်မှု ယခင်ထက် ပိုမိုအားကောင်းလာစေရန် ရည်ရွယ်၍ ငါးခိုးဖမ်းသူများကို ချက်ချင်း ပြန်လွှတ်ပေးခဲ့ခြင်းဖြစ်ကြောင်းလည်း ဖော်ပြသည်။
နောက်နောင်တွင် အာရက္ခရေပိုင်နက်အတွင်းသို့ ယခုကဲ့သို့ ကျူးကျော်၍ ငါးခိုးဖမ်းရန် ဝင်ရောက်လာမည်ဆိုပါက မည်သူ့ကိုမဆို တရားဥပဒေနှင့်အညီ စစ်ဆေး၊ အပြစ်ပေး အရေးယူသွားမည်ဖြစ်ကြောင်းလည်း AAက ထုတ်ပြန်သည်။
ငါးဖမ်းလှေများအား ရက်အနည်းငယ်ကြာမှ ပြန်လည်ပေးအပ်နိုင်ခြင်းမှာ မောင်တောဒေသ၌ စစ်ရေးပြင်ထန်နေခြင်း၊ ငါးဖမ်းလှေများထိမ်းသိမ်းထားရာနေရာမှ ပြန်လည်ပေးအပ်မည့်နေရာသို့ ပို့ဆောင်ရာတွင် စစ်ကောင်စီ လေကြောင်းအန္တရာယ် ရှိနေခြင်း တို့ကို သတိထားနေရ၍ ဖြစ်သည်ဟု ဖော်ပြထားသည်။
လွှဲပြောင်းရန် ကျန်နေသည့် လှေ ၈ စီးကို လုံခြုံရေး အာမခံချက်ရှိသောအချိန်တွင် ဆက်လက်လွှဲပြောင်းပေးအပ်သွားမည် ဟု AA က ထုတ်ပြန်သည်။
