အိမ်သွင်၊ထားမြတ် /People’s Spring
စစ်ကောင်စီက ထောက်ပို့လမ်းကြောင်းအဖြစ်အသုံးပြုနေသည့် ဗန်းမော်လေယာဉ်ကွင်းအတွင်း ယနေ့ (နိုဝင်ဘာ ၂၆) နံနက်ပိုင်းတွင် ပေါက်ကွဲမှုဖြစ်ခဲ့ပြီး လေယာဉ်ခရီးစဉ်များ ယာယီဖျက်သိမ်းလိုက်ကြောင်း ဒေသခံများကပြောသည်။
“ ပေါက်ကွဲသံကြီးကြားလိုက်တယ်။ လက်နက်ကြီးကျတယ်လို့လည်းပြောတယ်။ လေယာဉ်ကွင်းထဲမှာ ဗုံးပေါက်တယ်လို့လည်းပြောတယ်။ ဘာမှန်းတော့သေချာမသိသေးဘူး။ အခုကတော့ လေယာဉ်ခရီးစဉ်တွေအကုန်ပိတ်လိုက်တာဟုတ်တယ်” ဟု ဗန်းမော်မြို့ခံတစ်ဦးကပြောသည်။
ပေါက်ကွဲမှုသည် နံနက်၁၁နာရီခန့်ကဖြစ်ပွားခဲ့ခြင်းဟု ဒေသခံ အချို့ကပြောသည်။ စစ်ကောင်စီနှင့်ရဲကား ငါးစီးသည် မြို့ထဲတွင်ကင်းလှည့်နေသည်ဟု သိရသည်။
Public Service Announcement
“ ဘယ်အဖွဲ့လည်းဆိုတာတော့ သေချာမသိသေးပါဘူး။KIA ဘက်ကလည်း ဘာမှပြောဆိုထားတာမရှိသေးပါဘူး” ဟု သတင်းရင်းမြစ် တစ်ဦးက ဗန်းမော်လေဆိပ် တိုက်ခိုက်ခံရမှု နှင့်ပတ်သက်ပြီးပြောသည်။
ဗန်းမော်မြို့နှင့် ကိုးမိုင်ခန့်ဝေးသောမိုးမောက်မြို့နယ်တွင် စစ်ကောင်စီနှင့် ကချင်လွတ်လပ်ရေးတပ်မတော် KIA တိုက်ပွဲများဖြစ်ပွားနေသည်။ စစ်ကောင်စီသည် ဗန်းမော်လေဆိပ်ကိုအသုံးပြု၍ လေကြောင်းတိုက်ခိုက်မှုပြုလုပ်နေသလို လက်နက်၊ရိက္ခာနှင့်လူရင်အားလည်း ဖြည့်တင်းနေသည်ဟု ကချင်စစ်ရေးသတင်းရင်းမြစ်တဦးကပြောသည်။
ပေါက်ကွဲမှုကြောင့်ထိခိုက်ပျက်စီးမှုမှုအခြေအနေကိုမသိရှိရသေးပေ။ KIA၏ ၀၇၀၃ စစ်ဆင်ရေးစတင်သည့် ၂၀၂၄ မတ် လ ၇ ရက်ကလည်း ဗန်းမော်လေယာဥ်ကွင်းအတွင်းရှော့တိုက်ဒုံးကျရောက်ပေါက်ကွဲခဲ့၍ လေယာဉ်ပြေးလမ်းပျက်စီးခဲ့ပြီး လေဆိပ်အား စစ်ကောင်စီက ယာယီပိတ်ပစ်ခဲ့သည်။
