ဆိုင်းမင်း/People’s Spring
မန္တလေး ၊ ပြင်ဦးလွင်မြို့ဆီ စစ်ကောင်စီ ခေါင်းဆောင် လာရောက်ဖို့ ရှိတဲ့အတွက် မြို့အဝင်အထွက် စစ်ဆေးရေးဂိတ်တွေမှာ လုံခြုံရေး တင်းတင်းကြပ်ကြပ် စစ်ဆေးနေတယ်လို့ မြို့ခံတွေဆီကသိရပါတယ်။
စစ်တက္ကသိုလ် (DSA) ကျောင်းဆင်းပွဲ ဒီဇင်ဘာလ ပထမ ပတ်အတွင်း ပြုလုပ်ဖို့ရှိနေပြီး စစ်ကောင်စီခေါင်းဆောင် တက်ရောက်ဖို့ ရှိတာကြောင့် မြို့လုံခြုံရေးကို နိုဝင်ဘာလကုန်ပိုင်းကစတင် တိုးမြှင့်လာတာလို့သိရပါတယ်။
” မီးပွိုင့်လိုနေရာမျိုးတွေ၊ လမ်းကြားနေရာတွေမှာ ရဲအင်အားများများချထားတယ်” လို့ ပြင်ဦးလွင်မြို့ ၊ နာရီစင်အနီးနေထိုင်တဲ့ အသက် ၄၀အရွယ်အမျိုးသားတစ်ဦးကပြောပါတယ်။
Public Service Announcement
ပြင်ဦးလွင်မြို့အဝင် အနီးစခန်းစစ်ဆေးရေးဂိတ်၊ ဇီးပင်ကြီး စစ်ဆေးရေးဂိတ်နဲ့ ၁၆မိုင် စစ်ဆေးရေးဂိတ်တွေမှာ အဓိကထားစစ်နေသလို မြို့လည်းပတ်ပတ်လည်မှာလည်းကင်းပုန်းတွေ ချထားတယ်လို့ သိရပါတယ်။
ဒါ့အပြင် မန္တလေး – ပြင်ဦးလွင် လမ်းပိုင်းကို ယာဉ်အမျိုးအစားပေါ်မူတည်ပြီး သွားလာခွင့်ကန့်သတ်ပိတ်ပင်ထားပါသေးတယ်။ ဘေးတွဲဆိုင်ကယ်တွေ ၊ အုတ် ၊သဲကျောက် တင်တဲ့ ထရပ်ကားတွေကို သွားလာခွင့် ကန့်သတ်ထားတာပါ။
အခုနှစ် ဧပြီလအတွင်း ကတော့ DSA မှာ ပြုလုပ်တဲ့ သင်္ကြန်ပွဲ ကို တက်ရောက်ဖို့ စစ်ကောင်စီခေါင်းဆောင် ပြင်ဦးလွင်ကိုရောက်နေချိန် DSA ကို ရှော့တိုက်ဒုံးနဲ့ ပစ်ခတ်တိုက်ခိုက်ခံရတဲ့ဖြစ်စဉ် ဖြစ်ခဲ့ပါတယ်။
ဓာတ်ပုံ – စစ်ကောင်စီပြန်ကြားရေး
