ဇေအောင်/People’s Spring
ရှမ်းမန်းစစ်ဆင်ရေးမှာ အညာတပ်ရင်းတစ်ခုအနေနဲ့ ပါဝင်တိုက်ပွဲဝင်ခဲ့တဲ့ ရွှေဘိုခရိုင်တပ်ရင်း(၂၆)ရဲ့ အညာမြေအပြန်ခရီးမှာ အညာပြည်သူအများအပြား ကြိုဆိုခဲ့ကြပါတယ်။
ရွှေဘိုခရိုင်တပ်ရင်း(၂၆)ဟာ ရှမ်းမန်းစစ်ဆင်ရေး မြို့သိမ်းတိုက်ပွဲပေါင်းများစွာမှာ (၁)နှစ်နီးပါး ပါဝင်တိုက်ခိုက်ခဲ့ပြီး ရဲဘော်(၉)ဦး အသက်ပေးခဲ့ရတယ်လို့ သိရပါတယ်။
အညာမြေမှာလည်း ရွှေဘိုခရိုင် တပ်ရင်း(၂၆)အနေနဲ့ ဆက်လက်လုပ်ကိုင်ဆောင်ရွက်ရမယ့် ကိစ္စရပ်တွေရှိနေပြီး ပါဝင်ကူညီထောက်ပို့ပေးနိုင်တယ်လို့ တပ်ရင်း(၁၆)က မေတ္တာရပ်ခံထားပါတယ်။
Public Service Announcement
ရှမ်းမန်းစစ်ဆင်ရေးအတွင်း ရွှေဘိုခရိုင်တပ်ရင်းများမှ ရဲဘော် ၁၂ဦးထက်မနည်း ကျဆုံးခဲ့တယ်လို့လည်း သိရပါတယ်။
၁၀၂၇ စစ်ဆင်ရေး ဒုတိယပိုင်းနဲ့ ရှမ်းမန်း စစ်ဆင်ရေးမှာ မန္တလေးတိုင်းအတွင်း စုဖွဲ့ထားတဲ့ ဗျူဟာများ၊ တပ်ရင်းများအပြင် စစ်ကိုင်းတိုင်း၊ ဗျုဟာ (၅၂)မှ ရွှေဘိုခရိုင် တပ်ရင်း (၇)၊ ရွှေဘိုခရိုင် တပ်ရင်း ၁၀၊ ရွှေဘိုခရိုင် တပ်ရင်း ၁၆၊ ဗျူဟာ (၅၅)မှ ရွှေဘိုခရိုင် တပ်ရင်း ၁၅၊ရွှေဘိုခရိုင် တပ်ရင်း ၁၈ ၊ ရွှေဘိုခရိုင် တပ်ရင်း ၂၃၊ ရွှေဘိုခရိုင် တပ်ရင်း ၂၆၊ ညောင်ဦးခရိုင် တပ်ရင်း ၃ တို့ပါဝင်တိုက်ခိုက်ခဲ့ကြောင်း အမျိုးသားညီညွတ်ရေးအစိုးရ(NUG)ရဲ့ ကာကွယ်ရေးဝန်ကြီးဌာနက အသိပေးထားပါတယ်။
ဇွန်လ ၂၅ ရက်က စတင်ခဲ့တဲ့ ရှမ်းမန်းစစ်ဆင်ရေးမှာ စဥ့်ကူး၊ မတ္တရာ၊ မိုးကုတ်၊ နောင်ချို၊ သပိတ်ကျင်း စတဲ့ဒေသတွေမှာ ပြည်သူ့ကာကွယ်ရေးတပ်မတော် (မန္တလေး)နှင့် ပူးပေါင်းတပ်များက မြို့များ၊ စခန်းများအများအပြား သိမ်းပိုက်နိုင်ခဲ့ပါတယ်။
စစ်ကောင်စီဘက်က အရာရှိများအပါအဝင် ထိခိုက်သေဆုံးမှုအများအပြားရှိပြီး ဒုတိယဗိုလ်မှူးကြီးတစ်ဦးအပါအဝင် စစ်သုံ့ပန်းနှင့် အလင်းဝင်သူ စုစုပေါင်းတစ်ရာကျော် ရှိခဲ့ပါတယ်။
ထို့အပြင် စစ်ကောင်စီရဲ့ စစ်လက်နက်ပစ္စည်းများ၊ ခဲယမ်းများအများအပြားသိမ်းဆည်းရမိခဲ့ပါတယ်။
