အိမ်သွင်/People’s Spring
တောင်ကုတ်မြို့တွင် နောက်ဆုံးကျန်ရှိနေသော စစ်ဆင်ရေးကိုကွပ်ကဲမှုဌာနချုပ်စကခ(၅)ကို အာရက္ခတပ်တော်(AA)က စီးနင်းတိုက်ခိုက်နေကြောင်း မြေပြင်စစ်ရေးသတင်းရင်းမြစ်အချို့ကပြောသည်။
စကခ(၅)ကိုAAက ဒီဇင်ဘာလဆန်းတွင် ပိတ်ဆို့ထားခဲ့ပြီး လက်နက်ချရန်ကမ်းလှမ်းခဲ့သော်လည်း ဒီဇင်ဘာလ၉ရက်နေ့အထိ လက်နက််မချ၍ ထိုးစစ်ဆင်တိုက်ခိုက်နေခြင်းဖြစ်ဟုသိရသည်။
” ကျန်တဲ့တပ်ရင်းတွေအားလုံးကို AA က သိမ်းယူပြီးသွားပြီ။ တပ်ရင်းတွေအကုန်လုံးက စကခ(၅)မှာ သွားပေါင်းတာ။စစ်တပ်ဘက်က ဒဏ်ရာရတာတွေလည်းများထားတော့ AAက လက်နက်ချဖို့ကမ်းလှမ်းတယ်။ မရတော့ ပြန်ချတာပါ” ဟု မြေပြင်စစ်ရေးသတင်းရင်းမြစ်ကပြောသည်။
Public Service Announcement
စကခ(၅)ကို ဒီဇင်ဘာလ ၉ရက်နံနက်တွင် စတင်တိုက်ခိုက်ခဲ့ပြီး ယနေ့အထိတိုက်ပွဲများပြင်းထန်နေသည်ဟုသတင်းရရှိသည်။
တောင်ကုတ်မြို့နယ်မှ စစ်ကောင်စီစခန်း၁၀ ခုကို တိုက်ခိုက်သိမ်းယူပြီးနောက် မြို့ကို ထိန်းချုပ်ထားပြီဖြစ်ကြောင်းအာရက္ခတပ်တော်( AA)က နိုဝင်ဘာ ၂၉ ရက်သတင်းထုတ်ပြန်ခဲ့သည်။စကခ (၅) တပ်မဌာနချုပ် နှင့်၎င်းလက်အောက်ရှိ ခမရ (၃၄၆) နှင့် ခမရ (၅၄၄)ကို ဆက်လက်ထိုးစစ်ဆင်တိုက်ခိုက်နေသည်ဟု အသိပေးထားသည်။
နိုဝင်ဘာ ၂၉ ရက်နောက်ပိုင်းတိုက်ပွဲများတွင်ခမရ (၃၄၆) နှင့် ခမရ (၅၄၄)တို့ကိုပါ AAက ထပ်မံသိမ်းယူခဲ့သည်ဟု သတင်းရရှိသည်။ သို့သော် ဖုန်းနှင့်အင်တာနက်လိုင်းများကိုစစ်ကောင်စီကဖြတ်တောက်ထား၍ ဆက်သွယ်ရေးခက်ခဲနေပြီး အသေးစိတ်အတည်ပြုနိုင်ခြင်းမရှိသေးပေ။
တောင်ကုတ်မြို့ကို ထိန်းချုပ်ထားကြောင်း AA က သတင်းထုတ်ပြန်ပြီးနောက် စစ်ကောင်စီက လေကြောင်းတိုက်ခိုက်မှုများမကြာခဏပြုလုပ်နေသည်။
ဒီဇင်ဘာလ ၉ ရက်နေ့ ည ၇ နာရီခန့်တွင်ကံပိုင်ရပ်ကွက်ကို ဂျက်ဖိုက်တာဖြင့်တိုက်ခိုက်ခဲ့သည်။ ဒေသခံများတိမ်းရှောင်နေ၍ ထိခိုက်မှုမရှိသော်လည်း နေအိမ်ရှစ်လုံးမီးလောင်ပျက်စီးသွားခဲ့သည်။ ဒီဇင်ဘာလ ၃ရက်ညကလည်း တောင်ကုတ်မြို့မဈေးနှင့် ညဈေးတန်းကို စစ်ကောင်စီတပ်က တိုက်ခိုက်ရေးလေယာဉ်ဖြင့် ဗုံးကြဲခဲ့သည်။
ဒီဇင်ဘာလ၁ရက်ညတွင်တောင်ကုတ်မြို့နယ် ခရိုင်ရွာကို စစ်ကောင်စီက ဗုံးကြဲတိုက်ခိုက်ရာ စစ်ဘေးရှောင် သုံးဦးသေဆုံးပြီး ၁၉ဦး ဒဏ်ရာရသွားခဲ့သည်။
AAသည် လက်ရှိတွင် တောင်ကုတ်မြို့မှ စကခ(၅)၊အမ်းမြို့မှ အနောက်ပိုင်းတိုင်းစစ်ဌာနချုပ်(နခခ) တို့ကို ထိုးစစ်ဆင်တိုက်ခိုက်နေပြီမောင်တောမြို့ နယ်ခြားစောင့်ရဲတပ်ရင်း နခခ(၅)ကို ဒီဇင်ဘာ ၈ ရက်တွင် သိမ်းယူကာ ထွက်ပြေးနေသည့်စစ်ကောင်စီတပ်ဖွဲ့ဝင်များကိုလိုက်လံရှင်းလင်းနေသည်။
ထို့နောက် အမ်းမြို့တွင် နောက်ဆုံးကျန်သောနပခ ၊ ဧရာဝတီတိုင်းနှင့်နယ်စပ်မှ ဂွမြို့ နှင့် တောင်ကုတ်မှ စစ်တပ်လက်ကျန်စခန်းများ၊တပ်ရင်းဌာနချုပ်များကိုအပြီးသတ်သိမ်းပိုက်ရန်ထိုးစစ်ဆင် တိုက်ခိုက်နေသည်။
ဒီဇင်ဘာ ၁၀ ရက်တွင် စစ်ကောင်စီက မကွေးလေတပ် နှင့် ပုသိမ်လေတပ်မှ တက်သောတိုက် လေယာဉ်များဖြင့် တောင်ကုတ်၊ဂွ၊ အမ်းမြို့နယ်တို့ကို လေကြောင်းတိုက်ခိုက်မှုများပြုလုပ်နေကြောင်း ဂွမြို့နယ်မှ စစ်ဘေးရှောင်ပြည်သူအချို့ကပြောသည်။
