-People’s Spring
ဒီဇင်ဘာ ၁၆ ရက်နေ့မှာ ထိုင်းနိုင်ငံခြားရေးဝန်ကြီးဌာနက အဲဒီကိစ္စကို အတည်ပြုခဲ့တာဖြစ်ပြီး အစည်းအဝေး နှစ်ခုထဲက အနည်းဆုံး တစ်ခုမှာ အာဏာသိမ်း စစ်တပ်ရဲ့ ကိုယ်စားလှယ် တက်ရောက်ဖွယ် ရှိတယ်လို့လည်း ဆိုပါတယ်။
ထိုင်းနိုင်ငံခြားရေးဝန်ကြီး မာရစ် ဆန်ဂီယမ်ပွန်ဆာဟာ ဒီဇင်ဘာ ၁၉ ရက်နေ့နဲ့ ၂၀ ရက်နေ့တွေမှာ သီးခြား အစည်းအဝေး နှစ်ခုကို လက်ခံ ကျင်းပပေးမှာ ဖြစ်ပါတယ်။ ဒါဟာ အောက်တိုဘာလတုန်းက ထိုင်းအစိုးရဟာ မြန်မာ့အရေးကို ကူညီ ဖြေရှင်းဖို့အတွက် အလွတ်သဘော ဆွေးနွေးမှုတွေကို အိမ်ရှင်အနေနဲ့ လက်ခံကျင်းပလိုကြောင်း ကမ်းလှမ်းထားမှုကို လက်တွေ့ အကောင်အထည် ဖော်လာခြင်းလည်း ဖြစ်ပါတယ်။
ဒီဇင်ဘာ ၁၉ ရက်နေ့ အစည်းအဝေးမှာ မြန်မာဖက်က ကိုယ်စားလှယ်တွေ တက်ရောက်မယ်လို့ ထိုင်းနိုင်ငံခြားရေး ဝန်ကြီးဌာန ပြောရေးဆိုခွင့်ရ အရာရှိ နစ်ခွန်ဒက်ဂျ် ဘီလန်ကူရာက ပြောပါတယ်။ အဲဒီ အစည်းအဝေးဟာ နယ်စပ်လုံခြုံရေးနဲ့ နယ်စပ်ဖြတ်ကျော် ရာဇဝတ်မှုတွေ တိုက်ဖျက်ရေးကို အဓိကထားမှာ ဖြစ်တယ်လို့လည်း သူက ဆိုပါတယ်။ ဒါကြောင့် မြန်မာနဲ့ နယ်စပ်ထိစပ်နေရာ တရုတ်၊ အိန္ဒိယ၊ ဘင်္ဂလားဒေ့ရှ်၊ လာအိုနဲ့ ထိုင်းဖက်က ကိုယ်စားလှယ်တွေ အားလုံးလည်း ဆွေးနွေးပွဲ တက်ကြမှာပါ။
Public Service Announcement
ဒီဇင်ဘာ ၂၀ ရက်နေ့ အစည်းအဝေးကတော့ နိုင်ငံခြားရေး ဝန်ကြီးတွေအဆင့် တွေ့ဆုံမှုဖြစ်ပြီး အရှေ့တောင်အာရှ နိုင်ငံများ အစည်းအရုံး (အာဆီယံ)ရဲ့ မြန်မာ့အရေး စိတ်ဝင်စားတဲ့ နိုင်ငံတွေ တက်ရောက်မယ်လို့ နစ်ခွန်ဒက်ဂျ်က ဆိုပါတယ်။ ပြီးတော့ မြန်မာ့အရေး ကူညီဖြေရှင်းရေးအတွက် အာဆီယံက ချမှတ်ပေးထားတဲ့ ဘုံသဘောတူညီချက် ၅ ရပ် ဖော်ဆောင်ရေး ကိစ္စတွေကိုပါ ဆွေးနွေးသွားမယ်လို့လည်း သူက ပြောပါတယ်။
အဲဒီ ဒုတိယနေ့ အစည်းအဝေးမှာတော့ မြန်မာကိုယ်စားလှယ် တက်ရောက်နိုင်ခြေနဲ့ ပတ်သက်ပြီး ရှင်းရှင်းလင်းလင်း မသိရသေးပါဘူး။ မြန်မာနိုင်ငံမှာ စစ်တပ် အာဏာသိမ်းခဲ့ချိန် ကတည်းက အာဆီယံရဲ့ ထိပ်တန်း အစည်းအဝေးတွေမှာ နိုင်ငံရေး မဟုတ်တဲ့ ကိုယ်စားလှယ်တွေကိုသာ ကန့်သတ် တက်ရောက်ခွင့် ပေးထားခဲ့ပါတယ်။
၂၀၂၅ ခုနှစ်အတွက် အာဆီယံ ဥက္ကဋ္ဌ တာဝန်ယူမယ့် မလေးရှား ဝန်ကြီးချုပ် အန်ဝါ အီဘရာဟင်ကတော့ သူဟာ မြန်မာ့ ငြိမ်းချမ်းရေးအတွက် အာဆီယံရဲ့ အစီအမံတွေ အကောင်အထည် ဖော်နိုင်ရေး ပိုမိုအားထည့် ကြိုးစားသွားမယ်လို့ ဒီဇင်ဘာ ၁၆ ရက်နေ့မှာ ပြောကြားခဲ့ပါတယ်။ အင်ဒိုနီးရှားကလည်း ဒီဇင်ဘာ ၂၀ အစည်းအဝေးကို နိုင်ငံခြားရေး ဝန်ကြီး တက်ရောက်မှာဖြစ်တယ်လို့ ကြေညာထားပါတယ်။
ကိုးကား: Retuers
