■စစ်ကောင်စီတပ်သေဆုံးထိခိုက်မှုရှိပြီး လက်နက်ခဲယမ်းနှင့် စစ်သုံ့ပမ်း ရရှိဟု စစ်ရေးသတင်းရင်းမြစ်ပြော
ကချင်လွတ်လပ်ရေးတပ်မတော်(KIA) နှင့် ပူးပေါင်းတပ်များ၏ ဗန်းမော် ၊မံစီ ဒေသတစ်ခုလုံးသိမ်းပိုက်ရန် စစ်တပ်လက်ကျန်စခန်းများကိုဆက်လက်ထိုးစစ်ဆင် တိုက်ခိုက် လျက်ရှိပြီး စစ်ကောင်စီတပ် သေဆုံးမှု၊ စစ်သုံ့ပန်း နှင့် လက်နက်ခဲယမ်း သိမ်းဆည်းရရှိမှု ရှိခဲ့သည်ဟု စစ်ရေးသတင်းရင်းမြစ်အချို့က ပြောသည်။
ဒီဇင်ဘာ ၄ရက်က စတင်ခဲ့သည့် ဗန်းမော်နှင့် မံစီ ဒေသ တစ်ခုလုံး သိမ်းပိုက်နိုင်ရေး KIA၏ ထိုးစစ်သည် လဝက်ကျော် ကြာသည်အထိ တိုက်ပွဲများ ဆက်ရှိနေပြီး စစ်ကောင်စီက လေကြောင်း ပစ်ကူဖြင့် ခုခံတိုက်ခိုက်နေသည်။
“ဒီနေ့လည် မံစီ၊ ဗန်းမော် ၃မိုင်နဲ့ ၅မိုင်ပတ်လည် ၊ ဗန်းမော် တက္ကသိုလ် ဘက် တိုက်ပွဲ တော်တော်ပြင်းထန်တယ်။ လေကြောင်း ပစ်ကူ ၅ကြိမ်ရှိတယ်”ဟု ကချင်စစ်ရေး သတင်းရင်းမြစ်က ဒီဇင်ဘာ ၁၉ရက် တိုက်ပွဲ အခြေအနေကို ပြောပြသည်။
Public Service Announcement
ထိုအပြင် စစ်ကောင်စီတပ်ဖွဲ့ဝင်များကို စစ်သုံ့ပန်းအဖြစ်ဖမ်းဆီးရရှိသကဲ့သို့ လက်နက်ခဲယမ်း သိမ်းဆည်းရရှိမှုလည်းရှိကြောင်း ၎င်းက ပြောသည်။ တိုက်ပွဲ အခြေအနေ အသေးစိတ်ကို စစ်ရေးလုံခြုံရေးအတွက် ကချင်စစ်ရေး သတင်းရင်းမြစ်က အသိပေးခြင်းမရှိပေ။
အခြား သတင်းရင်းမြစ်တစ်ဦးကလည်း ဒီဇင်ဘာ ၁၉ရက်တွင် ဗန်းမော် လေယာဉ်ကွင်းနှင့် ၅ မိုင်နေရာတွင် တိုက်ပွဲဖြစ်ခဲ့ဟုအသိပေးထားသည်။
မံစီတွင်လည်း တိုက်ပွဲ ဆက်ရှိနေပြီး စစ်ကောင်စီ အလောင်း ၊ လက်နက် သိမ်းဆည်းရရှိခဲ့သည်ဟု လည်း သတင်းရင်းမြစ်က အသိပေးသည်။
ဗန်းမော်မြို့တွင်း ရှိ စစ်ကောင်စီတပ်များကို ရှာဖွေတိုက်ခိုက်လျက်ရှိပြီး ဗန်းမော် ၄ မိုင်ရှိ စစ်ကောင်စီတပ်ကို လက်နက်ကြီးများဖြင့် ပစ်ခတ်တိုက်ခိုက်ခဲ့သည်ဟုဆိုသည်။
KIA အနေဖြင့် ဗန်းမော် တိုက်ပွဲ အခြေအနေနှင့်ပတ်သက်ပြီး သတင်းထုတ်ပြန်ခြင်းမရှိသော်လည်း တိုက်ပွဲကြောင့် အရပ်သား ပြည်သူသေဆုံးထိခိုက်မှု၊ နေအိမ်မီးလောင်ပျက်စီးမှုနှင့် စစ်ရှောင်နေရသည့် ပြည်သူများ အခက်အခဲများစွာ ကြုံနေရကြောင်း အဖွဲ့ သတင်းပြန်ကြားရေးဌာနက ဖော်ပြထားသည်။
လက်ရှိ စစ်ရေး အခြေအနေများနှင့်ပတ်သက်ပြီး မေးမြန်းရန် KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံသို့ ယနေ့ ဒီဇင်ဘာ ၂၀ရက်မနက်တွင် ဆက်သွယ်မေးမြန်းထားဆဲဖြစ်ပြီး အဆက်အသွယ်မရသေးပေ။
