ထားမြတ်/People’s Spring
အရှေ့မြောက်ပိုင်းတိုင်းစစ်ဌာနချုပ်(ရမခ)နှင့် အနောက်ပိုင်းတိုင်းစစ်ဌာနချုပ်(နပခ) တိုင်းစစ်ဌာနချုပ် နှစ်ခုဆုံးရှုံးထားသည့် စစ်ကောင်စီအနေဖြင့် နောက်ထပ်တိုင်းစစ်ဌာနချုပ်များ ထပ်မံကျဆုံးတော့ မည့် အခြေအနေရှိနေကြောင်း အမျိုးသားညီညွတ်ရေးအစိုးရ(NUG) ယာယီသမ္မတ ဒူဝါလရှီးလက ပြောကြားသည်။
အမျိုးသားညီညွတ်ရေးအစိုးရ၊ နိုင်ငံတော်ယာယီသမ္မတ ဒူဝါလရှီးလက ယနေ့ (ဒီဇင်ဘာ ၂၄ရက်)တွင် ခရစ္စမတ်ဆုတောင်းစကား ပြောကြားရာ၌ ယခုကဲ့သို့ ပြောကြားခဲ့ခြင်းဖြစ်သည်။
နွေဦးတော်လှန်ရေး (၄)နှစ်ခန့်ကြာသည်အထိ အခက်အခဲများကြားမှ ပြည်သူလူထုများက တော်လှန်ရေးအပေါ် အားပေး ထောက်ခံမှု၊တော်လှန်ရေး ရဲဘော်ရဲဘက်များ၊ မဟာမိတ်အင်အားစုများက မလျှော့တမ်း တစိုက်မတ်မတ် အားထုတ် ကြိုးပမ်းမှုများကို အားတက်ဖွယ်ရာ မြင်တွေ့ရကြောင်း ယာယီသမ္မတက ပြောသည်။
Public Service Announcement
တစ်ဖက်တွင် ၂၀၂၄ ခုနှစ်အတွင် စစ်ကောင်စီ၏ ရှုံးနိမ့်မှု၊ ပြိုလဲမှုများ ကြီးမားစွာ ဖြစ်ခဲ့ဟု ဆိုသည်။
“ဒီတကြိမ်မှာ စစ်အာဏာရှင်စနစ် အပြီးသတ် ချုပ်ငြိမ်းရမယ်ဆိုတဲ့ တော်လှန်ရေးယုံကြည်ချက်နဲ့ အင်အားစုစုအသီးရဲ့ လက်တွဲ တိုက်ပွဲဝင်မှုတွေကြောင့် သမိုင်းတလျှောက် စစ်တပ်အတွက် အကြီးမားဆုံး ဆုံးရှုံးမှုအဖြစ်နဲ့ အရှေ့မြောက်တိုင်းစစ်ဌာနချုပ် နဲ့ အနောက်ပိုင်းတိုင်းစစ်ဌာနချုပ် ကျဆုံးခဲ့ပြီ ဖြစ်ပါတယ်။ မကြာခင်မှာ နောက်ထပ် တိုင်းစစ်ဌာနချုပ်တွေ ကျဆုံးတော့မယ့် အခြေအနေကို ရောက်ရှိနေပါပြီ။ နိုင်ငံတဝန်းက မြို့ပေါင်း (၉၀) ထက်မနည်းဟာ စစ်ကောင်စီလက်အောက်ကနေ လွတ်မြောက်ခဲ့ပြီဖြစ်ပါတယ်”ဟု ယာယီသမ္မတက ပြောသည်။
ထို့ပြင် မြန်မာနိုင်ငံသူ၊နိုင်ငံသားအားလုံးသည် ကမ္ဘာကြီးနှင့် ထပ်တူ ခရစ္စမတ်အချိန်အခါကို ပျော်ရွှင်မှု၊ ငြိမ်းချမ်းမှု၊ နွေးထွေးလုံခြုံမှု အပြည့်ဖြင့် ဖြတ်သန်းခွင့် ရထိုက်ကြောင်း ၎င်းက ဆိုသည်။
“ကျနော်တို့နိုင်ငံအနေနဲ့တော့ စစ်အာဏာရှင်စနစ် အဆုံးသတ်ဖို့ တော်လှန်ရေးတိုက်ပွဲကို ၀င်နေရတဲ့ အချိန်အခါ ဖြစ်တာကြောင့် တော်လှန်ရေးတာဝန်တွေကို ထမ်းရွက်ရင်း ခရစ္စမတ် အချိန်အခါသမယကို ဖြတ်သန်းနေကြရတဲ့ ရဲဘော်တွေရှိသလို တဖက်မှာလည်း ဆက်တိုက်ဆိုသလို စစ်ရှုံးနိမ့်နေတာနဲ့အမျှ ပြည်သူကို ပစ်မှတ်ထား တိုက်ခိုက်နေတဲ့ စစ်ကောင်စီကြောင့် ကျနော်တို့ ပြည်သူတွေ၊ ကလေးသူငယ်တွေနဲ့ မိခင်တွေဟာ မလုံခြုံမှု၊ စိုးထိတ်ကြောက်လန့်မှုများနဲ့ မိမိရဲ့ နေရပ်တွေကို စွန့်ခွါပြီး ခရစ္စမတ်အချိန်အခါသမယကို ဖြတ်သန်းနေရပါတယ်။” ဟု ယာယီသမ္မတက ပြောသည်။
ထို့ကြောင့် တော်လှန်ရေး တာဝန်ထမ်းရွက်နေကြသည့် ရဲဘော် တစ်ယောက်ချင်းစီတိုင်းကို အလေးအမြတ်ပြုသကဲ့သို့ ပြည်သူလူထု အပေါင်း ကြုံနေရသည့် ဘေးဒုက္ခ များအပေါ် များစွာ စိတ်ထိခိုက်ရဟု ယာယီသမ္မတက ပြောကြားသည်။
ထို့အပြင်ရည်မှန်းထားသည့်အတိုင်း တော်လှန်ရေးပန်းတိုင်ကိုအောင်မြင်အောင် မလျှော့သော ဇွဲလုံ့လဖြင့် အားစိုက်ကြိုးစားကြရမည်ဟုလည်း ၎င်းက ဆိုသည်။
“အခုလို ခရစ္စမတ်အချိန်အခါသမယမှာ ကျနော်ချစ်မြတ်နိုးရတဲ့ ပြည်သူလူထုတစ်ရပ်လုံး ငြိမ်းချမ်း ပျော်ရွှင်ကြပါစေ၊ မေတ္တာတရားများ လွမ်းခြုံတဲ့ နွေးထွေးမှု နဲ့ လွတ်လပ်မှု တို့ကို အနှစ်သာရပြည့်၀စွာ ခံစားနိုင်ကြပါစေ။ အားလုံးအတွက် ပျော်ရွှင်ဖွယ်ရာ ခရစ္စမတ်ဖြစ်ပါစေလို့ ထပ်မံပြီး ဆုတောင်းမေတ္တာပို့သလိုက်ပါတယ်”ဟု ယာယီသမ္မတက ပြောသည်။
