ကဖေး/People’s Spring
တနင်္သာရီမြို့နယ်အတွင်း စစ်ကောင်စီတပ်နှင့် တော်လှန်ရေးပူးပေါင်းတပ်များကြား တိုက်ပွဲပြင်းထန်နေ၍ တနင်္သာရီ – မောတောင်လမ်းပိုင်းအား အသုံးမပြုရန် ပြည်သူ့ကာကွယ်ရေးတပ်ဖွဲ့က သတိပေးချက် ထုတ်ပြန်သည်။
တနင်္သာရီ – မောတောင်လမ်းမကြီးတလျှောက် ရေဖြူကျေးရွာမှ သဲဖြူကျေးရွာအထိနှင့် သဲဖြူကျေးရွာမှ မောတောင်နယ်စပ်အထိ မည်သည့် မော်တော်ယာဉ်မျှ ဖြတ်သန်းသွားလာခြင်း မပြုရန် BLACK COBRA COLUMNက ယနေ့ (ဇန်နဝါရီ ၅ရက်) သတိပေးခြင်းဖြစ်သည်။
စစ်ကောင်စီတပ်က တနင်္သာရီမြို့နယ်အတွင်း ဒီဇင်ဘာဒုတိယလပတ်မှစတင်ကာ စစ်ကြောင်းထိုးလာပြီးနောက် တိုက်ပွဲများပြင်းထန်နေခြင်းဖြစ်သည်။
Public Service Announcement
” စစ်ကောင်စီဘက်က အကျအဆုံးများတော့ လေကြောင်းတိုက်ခိုက်မှုတွေရှိလာတယ်။ လက်ရှိအခြေအနေအရ လမ်းပိုင်းလုံခြုံရေး ကောင်းမနေပါဘူး။ ခရီးသည်တင်ကားတွေရောအိမ်စီးကားတွေကိုရော သတိပေးတာပါ”ဟု တော်လှန်ရေးရဲဘော်တစ်ဦးက ပြောသည်။
တိုက်ပွဲများကြောင့် ပြီးခဲ့သည့် ဒီဇင်ဘာလလယ်ကလည်း တနင်္သာရီ-မောတောင်ပိုင်းအား သွားလာခွင့် ယာယီကန့်သတ်ထားပြီး တော်လှန်ရေးတပ်ဖွဲ့များက သတိပေးမှုများလုပ်ဆောင်ထားကာ သိန်ခွန်း၊ သဲဖြူ၊ ထုံခါနှင့် အမှတ် (၉) ရွာအပါအဝင် ကျေးရွာ ၁၀ ရွာခန့် စစ်ဘေးရှောင်နေကြရသည်။
စစ်ကောင်စီတပ်စစ်ကြောင်းမှာ မောတောင်မြို့နှင့် ခန့်မှန်းမိုင် ၂၀ကျော် ၃၀နီးပါးဝေးသည့် သိန်းခွန်ရွာ၌ ဆက်ရှိနေပြီး ဒေသခံပြည်သူအချို့ကို ဓားစာခံအဖြစ် ဖမ်းဆီးမှုများရှိနေသည်။
မောတောင်မြို့ရှိ မောတောင်နယ်စပ်ဂိတ်နှင့် ထိုင်းနိုင်ငံ၊ ပရာကျွတ်ခရိုင်၊ ပရာကျွတ်မြို့နယ် ဒန်းဆင်းခွန်ကျေးရွာရှိ ဆင်းခွန်နယ်စပ်ဂိတ်မှာ နှစ်နိုင်ငံကုန်သွယ်ရေး နယ်စပ်ဂိတ်ဖြစ်သည်။ မောတောင်နယ်စပ်ဂိတ်နှင့် တနင်္သာရီမြို့မှ မိုင်(၆၀)ခန့် ကွာဝေးသည်။
ရက်အနည်းငယ်ကြာတွင် ပြန်လည်သွားခွင့်ပြုခဲ့ပြီး ယခုလတ်တလော စစ်ရေးအခြေအနေကြောင့် ပြန်လည်ကန့်သတ်ခြင်းဖြစ်သည်။
