ဆိုင်းမင်း/People’s Spring
မန္တလေးတိုင်း ၊ ပုသိမ်ကြီးမြို့နယ်အတွင်းမှာ စစ်ကောင်စီလက်အောက်ခံ ပြည်သူ့စစ် အဖွဲ့ဝင်တစ်ဦး ယူနီဖောင်းဝတ်ပြီး ဆိုင်ကယ်စီးလာချိန် ဇန်နဝါရီလ ၅ ရက် ကပစ်ခတ်ခံရတာကြောင့်သေဆုံးသွားတယ်လို့ မြို့ခံတွေဆီကသိရပါတယ်။
စစ်တပ်လက်ဝေခံ ပျုစောထီးအဖွဲ့ လို့ လူသိများတဲ့ ပြည်သူ့စစ်အဖွဲ့ဝင် ဟာ ယူနီဖောင်းနဲ့သွားလာချိန် ပုသိမ်ကြီးမြို့နယ်၊ ရန်ကင်းသာယာရပ်ကွက်၊မြင်စိုင်းလမ်းမှာ ဇန်နဝါရီ ၅ရက် နေ့ခင်း ၁နာရီက ပစ်ခတ်ခံရတာပါ။
ပစ်ခတ်ခံရလို့ သေဆုံးသွားသူကတော့ အသက် ၅၉နှစ်အရွယ် ဦးစိန်သန်းဖြစ် ပြည်သူ့စစ်အဖွဲ့ဝင်တစ်ဦးဖြစ်ပါတယ်။
Public Service Announcement
ပစ်ခတ်ခံရမှုကြောင့်နေရာမှာတင်သေဆုံးသွားတာပါ။ပစ်ခတ်ခံရပြီးနောက် တွေ့မြင်ရတဲ့ ဓာတ်ပုံအရ ပြောက်ကျားဘောင်းဘီရှည်နဲ့ စစ်စွပ်ကျယ် ဝတ်ဆင်ထားတာကိုတွေ့ရပါတယ်။
ပြည်သူ့စစ်ယူနီဖောင်းဖြစ်တဲ့ ပြောက်ကျား ဘောင်းဘီကို ဝတ်ဆင်ပြီး ဆိုင်ကယ်မောင်းနေချိန် ဆိုင်ကယ်နဲ့လိုက်လာတဲ့ အမျိုးသားနှစ်ဦးက သေနတ်နဲ့ ပစ်ခတ်သွားတာလို့ သိရပါတယ်။
စစ်တပ်ဝါဒဖြန့် တယ်လီဂရမ် ချန်နယ်တွေမှာ လည်း မန္တလေးမှာ ပြည်သူ့စစ်တပ်ဖွဲ့ဝင်တစ်ဦး ပစ်ခတ်သတ်ဖြတ်ခံလိုက်ရတယ်လို့ ဖော်ပြနေကြပါတယ်။
အလယ်ပိုင်းတိုင်းစစ်ဌာနချုပ်အခြေစိုက်ရာ မန္တလေးမှာ စစ်ကောင်စီက ပြည်သူ့စစ်ခေါ် ပျုစောထီးတွေကို စစ်သင်တန်းပေးပြီး လက်နက် တပ်ဆင်ထားပါတယ်။
အဲဒီပြည်သူ့စစ်တွေကို မြို့တွင်းမှာ လုံခြုံရေးချတာ ၊ ကင်းပတ်တာတွေ မှာအသုံးပြုတာအပြင် မန္တလေး PDF နဲ့တိုက်ပွဲတွေဖြစ်နေတဲ့ မတ္တရာနယ် တိုက်ပွဲတွေမှာ ဝင်တိုက်စေခဲ့ပါတယ်။
