ဟန်နွေ/People’s Spring
ကချင်ပြည်နယ် မံစီမြို့ရှိ စစ်ကောင်စီ၏ လက်ကျန် တပ်ရင်း ၃ခုကို ကချင်လွတ်လပ်ရေးတပ်မတော် (KIA)က ယနေ့(ဇန်နဝါရီ ၈ရက်) နံနက်တွင် သိမ်းပိုက်နိုင်ခဲ့ရာ သုံ့ပန်းနှင့် လက်နက်ခဲယမ်းများစွာရရှိခဲ့ကြောင်း ကချင်စစ်ရေး သတင်းရင်းမြစ်က အသိပေးသည်။
မံစီမြို့ရှိ ခမရ(၆၀၁)၊ ခမရ(၃၁၉)နှင့် အမတ (၃၅၂) တပ်ရင်းများကို ယနေ့ နံနက် ၁၁နာရီတွင် အပြီးသတ် သိမ်းပိုက်နိုင်ခဲ့ခြင်းဖြစ်သည်။
သုံ့ပန်းနှင့် လက်နက်ခဲယမ်းများရရှိမှု အရေအတွက် အသေးစိတ်ကို ကချင်စစ်ရေး သတင်းရင်းမြစ်က အသိပေးထားခြင်းမရှိပေ။
Public Service Announcement
မံစီမြို့ရှိ လက်ကျန် စစ်ကောင်စီတပ်ရင်းသုံးခုလုံး သိမ်းပိုက်နိုင်မှုကို KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက အတည်ပြုထားပြီး ဗန်းမော်မြို့ရပ်ကွက်အချို့၌ KIA ဝင်ရောက်နေရာယူထားနိုင်ပြီး စစ်ကောင်စီပင်မတပ်ရင်းဌာနချုပ်များကို စောင့်ကြည့်နေဆဲအခြေအနေဖြစ်ကာ တိုက်ပွဲဆက်ရှိနေသည်ဟု အသိပေးသည်။
KIAနှင့် မဟာမိတ်များသည် ဒီဇင်ဘာ ၄ရက်တွင် မံစီနှင့် ဗန်းမော်ဒေသတစ်ခုလုံး သိမ်းပိုက်နိုင်ရေး ထိုးစစ်ဆင်ခဲ့ရာ တစ်လကျော်အကြာတွင် မံစီမြို့ရှိ လက်ကျန် စစ်စခန်းအားလုံး ရှင်းလင်းသိမ်းပိုက်နိုင်ခဲ့ခြင်းဖြစ်သည်။
မံစီမြို့ရှိ စစ်ကောင်စီတပ်များ အပြီးသတ်သိမ်းပိုက်နိုင်ခဲ့ပြီးနောက် KIA ရဲဘော်များ အောင်ပွဲခံနေသည့် ရုပ်သံအချို့လည်း ယနေ့တွင်လူမှုကွန်ရက်၌ တွေ့ရသည်။
“ တပ်ရင်းနံပတ်ပြော “ ဟု KIA ရဲဘော်တစ်ဦးက ပြောဆိုချက်ကို အခြား ရဲဘော်တစ်ဦးက “၃၁၉နဲ့ ၆၀၁ကို အောင်မြင်စွာ သိမ်းပြီး ပြန်ခဲ့ပါပြီနော”ဟု ပြောကြားခဲ့သည်ကို အောင်ပွဲခံရုပ်သံ၌ တွေ့ရသည်။
အဆိုပါ ရုပ်သံမှတ်တမ်းကို အမျိုးသားညီညွတ်ရေးအစိုးရ ပြည်ထောင်စုဝန်ကြီး ဒေါက်တာတူးခေါင်က ပြန်လည်မျှဝေခဲ့ပြီး “မံစီ ပြီးပါပြီ တဲ့။ အပျော်တွေ ကူးစက်” ဟု ရေးသားခဲ့သည်။
“ဗန်းမော်၊ မန်စီ မြို့ ၂ မြို့ တပြိုင်တည်း သိမ်းဖို့ ဒီဇင်ဘာလ ၄ ရက်မနက်ကတည်းက စခဲ့တာပါ။ မြို့ ၂ မြို့ ဆိုပေမယ့် ပြည်မဖက်က မြို့တွေလို မြို့စောင့်တပ်ရင်း လောက်တင် ရှိနေတာမျိုး မဟုတ်ပဲ၊ နှစ်ပေါင်းများစွာ တော်လှန်ရေးကို ကြံ့ကြံ့ခံနိုင်ဖို့ ပတ်ပတ်လည်မှာ အခိုင်အမာ တည်ဆောက်ထားတဲ့ ခံတပ်စခန်းကြီးများ ဝန်းရံထားတဲ့ စစ်ဒေသဖြစ်ပါတယ်။ ခေတ်အဆက်ဆက် ဗန်းမော်ဟာ ရန်သူ့စကစဖက်က အားသာချက်များကတော့ ထောက်ပို့လွယ်ကူခြင်း ဖြစ်ပါတယ်။ ရေလမ်း၊ ကုန်းလမ်း၊ လေကြောင်းလမ်း ရှိခဲ့တယ်။ အခုတော့ ကုန်းကြောင်း၊ ရေကြောင်း ထောက်ပို့လမ်းကြောင်း အားလုံးကို ဖြတ်တောက်ထားပြီးလေကြောင်းထောက်ပို့ကိုသာ အားကိုးနေရတဲ့ သဘောရှိပါတယ်” ဟု ဒေါက်တာတူးခေါင်က မံစီနှင့် ဗန်းမော်မြို့စစ်ဆင်ရေးနှင့်ပတ်သက်ပြီး ရေးသားထားသည်။
စစ်ကောင်စီဘက် ယခင်ဆုံးရှုံးခဲ့ရသည့် မိုးမောက်မြို့နယ်၊ လွယ်ဂျယ်မြို့၊ မန်ဝန်းကြီးမြို့၊ ဆင်ဘိုမြို့၊ မြို့သစ်၊ ကုန်းလော၊ ယောယုံဗျူဟာ၊ စိန်လုံဗျူဟာ စသည့် တပ်စခန်းများမှ ဆုတ်ခွာသွားသည့် စစ်ကောင်စီတပ်များ ဗန်းမော်နှင့် မံစီ၌ စုပေါင်းထားရာ နေရာဖြစ်ပြီး တိုက်ရည်ခိုက်ရည် အသင့်အတင့် ရှိသူများ စုဝေးရာနေရာဖြစ်ကြောင်း၊ ထိုပပြင် စစ်ကောင်စီဘက်က လေကြောင်း ပစ်ကူ အများအပြား အသုံးပြုနေခြင်းကြောင့်လည်းကောင်း အခက်အခဲပေါင်းများစွာ ရှိခဲ့သော်လည်း အောင်မြင်မှုများ အထိုက်အလျောက်ရရှိနေပြီဟု ဒေါက်တာတူးခေါင်က ဆိုသည်။
