ကျိုက်မရောရှိ ရဲစခန်းနှစ်ခုအား မွန်ပြည်သစ် ပါတီAD တိုက်ခိုက်၊ စစ်ကောင်စီတပ် သေဆုံးထိခိုက်မှုရှိ

ဟန်နွေ/People’s Spring

မွန်ပြည်နယ်၊ ကျိုက်မရောမြို့နယ်ရှိ ရဲစခန်း နှစ်ခုကို မွန်ပြည်သစ်ပါတီ -စစ်အာဏာရှင်တိုက် ဖျက်ရေး(NMSP-AD)တပ်ဖွဲ့က ဒရုန်းဖြင့် တိုက်ခိုက်ခဲ့ရာ စစ်ကောင်စီတပ် သေဆုံးထိခိုက်ရှိခဲ့သည်ဟု NMSP-ADက ယနေ့(ဇန်နဝါရီ ၁၃ရက်)တွင် သတင်းထုတ်ပြန်သည်။

ဇန်နဝါရီ ၁၂ရက်တွင် ကျိုက်မရောမြို့နယ် တောင်ကလေးရဲစခန်း၊ ဇန်နဝါရီ ၁၀ရက်တွင် ကဒါရွာရဲစခန်း တို့ကို တိုက်ခိုက်ခဲ့ခြင်းဖြစ်သည်ဟုဆိုသည်။

အဆိုပါ ရဲစခန်းများအား တိုက်ခိုက်ခဲ့ရာ စစ်ကောင်စီတပ်မှ ၆ဦး သေဆုံးကာ ၅ ဦး ဒဏ်ရာရခဲ့သည်ဟု NMSP-ADက ထုတ်ပြန်သည်။

Public Service Announcement

ကဒါကျေးရွာရဲစခန်းကို ဒရုန်းဖြင့် တိုက်ခိုက်ခဲ့ရာတွင် စစ်ကောင်စီတပ်သား ၅ဦး သေဆုံးကာ ၄ဦး ဒဏ်ရာရခဲ့ပြီး တောင်ကလေးရဲစခန်း တိုက်ခိုက်မှုတွင် စစ်ကောင်စီတပ်မှ တစ်ဦး သေဆုံးပြီး တစ်ဦး ဒဏ်ရာရခဲ့ဟု အသိပေးထားသည်။

လက်ရှိဒေသတွင်း စစ်ရေးအခြေအနေများနှင့်ပတ်သက်ပြီး မေးမြန်းရန် NMSP_AD တာဝန်ရှိသူ ထံ ဆက်သွယ်ထားခြင်းဖြစ်သည်။

NMSP-ADသည် မွန်ပြည်သစ်ပါတီ(NMSP)မှ ခွဲထွက်ပြီး ၂၀၂၄ နှစ်ဆန်းမှစ၍ စစ်ကောင်စီကို တိုက်ခိုက်နေခြင်း ဖြစ်သည်။

ထိုသို့ တိုက်ခိုက်ရာ နွေဦးတော်လှန်ရေးတွင် ပေါ်ပေါက်လာသည့် မွန်လက်နက်ကိုင်တပ်များ နှင့် ကရင်အမျိုးသားအစည်းအရုံး(KNU) အပါအဝင် ဒေသတွင်းတော်လှန်ရေးတပ်များဖြင့် ပူးပေါင်း၍ စစ်ကောင်စီတပ်ကို တိုက်ခိုက်နေခြင်းဖြစ်သည်။