ဒီးဒီ၊သတိုး/People’s Spring
ရှမ်းပြည်နယ်တောင်ပိုင်း၊ ရပ်စောက်မြို့နယ်၊ ကျောက်ဂူကျေးရွာရှိ စစ်ကောင်စီ၏ အမြောက်တပ် (အမတ − ၃၄၉)တပ်ရင်းအား တိုက်ခိုက်ခဲ့ရာ ထိခိုက်သေဆုံးမှုရှိကြောင်း ဓနုပြည်သူ့လွတ်မြောက်ရေးတပ်တော်(DPLA)မှ ပြောရေးဆိုခွင့်ရှိသူက လူထုနွေဦးသို့ ပြောသည်။
“မနေ့ကတော့ တိုက်ပွဲဖြစ်တယ်။ အမြောက်တပ်နား လေးမှာဖြစ်တာ ၊ ပြီးတော့မှ ကျောက်ဂူရွာတဝိုက်နားမှာဖြစ်တာပေါ့။ ကျောက်ဂူ အမြောက်တပ် ၃၄၉ ၊ အဲဒီ့မှာ အမြောက်တပ်အနီးမှာနေတာပေါ့လေ။ အဲဒီမှာ စစ်ကောင်စီနဲ့တွေ့တော့ ပွဲဖြစ်တာပေါ့”ဟု DPLAမှ ပြောရေးဆိုခွင့်ရှိသူက ပြောသည်။
ဓနုတပ်သည် ပြီးခဲ့သည့် ဇန်နဝါရီ ၄ရက်ကလည်း ကျောက်ဂူကျေးရွာအုပ်စုရှိ စစ်ကောင်စီ၏ ရဲစခန်းနှင့် အမြောက်တပ်(အမတ − ၃၄၉)အား သွားရောက်တိုက်ခိုက်ခဲ့သေးသည်။
Public Service Announcement
ဓနုတပ်သည် ကျောက်ဂူရွာရှိ စစ်ကောင်စီတပ်စခန်းများအား ၂၀၂၄ နိုဝင်ဘာ ၃၀ရက်ကတည်းက နေ့စဉ်ရက်ဆက်တိုက်ခိုက်နေခြင်းဟု DPLAမှ ပြောရေးဆိုခွင့်ရှိသူက ပြောသည်။
“နိုဝင်ဘာ ၃၀ ကတည်းက ဒီအချိန်အထိပဲ ၊ ရက်တိုင်းနီးပါးဖြစ်နေတာ။ သိရသလောက်ဆိုရင်တော့ ၆၀ကျော်လောက်ရှိတာပေါ့”ဟု ၎င်းက ပြောသည်။
ဓနုတပ်သည် ကျောက်ဂူဒေသတွင် စစ်ကောင်စီ နယ်မြေခံတပ်များဖြစ်သည့် အမတ (၃၄၉)၊ နောင်၀ိုးတပ် ခလရ(၂၉၂)နှင့် တိုက်ပွဲဖြစ်ပွားနေပြီး တိုက်ပွဲပြင်းထန်နေသော နောင်ချိုမြို့နယ် တောင်းခမ်းကျေးရွာသို့ စစ်ကူသွားသည့် စစ်ကောင်စီတပ်များကိုလည်း ဖြတ်တောက် တိုက်ခိုက်နေသည်။ ထို့အပြင် တောင်းခမ်းတွင် DPLAနှင့်အတူ လက်တွဲတိုက်ပွဲဝင်နေသည့် တအာင်းတပ်မတော်(TNLA)နှင့် စစ်ကောင်စီတပ်အကြား တိုက်ပွဲများ ဖြစ်ပွားနေသည်။
“တောင်းခမ်းကတော့ နေ့တိုင်းတော့ တိုက်ပွဲဖြစ်နေတယ်။ ၃၅၄ ပတ်ဝန်းကျင်တွေပေါ့။ နေ့တိုင်းနီးပါးဖြစ်နေတာ။ ဒီနေ့တော့ အသေးစိတ်မသိရသေးဘူး”ဟု DPLAမှ ပြောရေးဆိုခွင့်ရှိသူက ပြောသည်။
နောင်ချိုမြို့တောင်ဘက် ဒုဋ္ဌဝတီမြစ်ကူးတံတား အနောက်ဘက်၌ရှိသော တောင်းခမ်းကျေးရွာ၌ အမြောက်စခန်းကွပ်ကဲမှုဌာနချုပ် (မစခ-၉၀၂) နှင့် ယင်းလက်အောက်ခံ အမြောက်တပ်ရင်း သုံးရင်းဖြစ်သော အမတ(၃၅၄)၊ အမတ (၂၀၆)၊ အမတ(၄၀၆)တို့ တည်ရှိသည်။ မစခ-၉၀၂ သည် အရှေ့မြောက်ပိုင်းတိုင်းစစ်ဌာနချုပ်(ရမခ) နယ်မြေအတွင်း တစ်ခုတည်းသော အမြောက်တပ်ကွပ်ကဲမှုဌာနချုပ်ဖြစ်ပြီး ၎င်း၏ လက်အောက်တွင် အမြောက်တပ်ရင်း ၁၃ ရင်းရှိသည်။
