ဇူလိုင်-၈၊ ၂၀၂၅။ ရဲခေါင်/People’s Spring
ရေး-ထားဝယ်လမ်းမပေါ်ရှိ စစ်ကောင်စီ၏ ရေးမြို့အခြေစိုက် အမှတ်-၃၁၆ အမြောက်တပ်(အမတ ၃၁၆)ကို ဒရုန်းဖြင့် ဗုံးကြဲခဲ့ဟု မွန်ပြည်တော်လှန်ရေးတပ်(MSRF)က ယနေ့ ထုတ်ပြန်သည်။
စစ်ဆင်ရေးကွပ်ကဲမှု ဌာနချုပ် အမှတ်-၁၉(စကခ ၁၉)လက်အောက်ခံ ကလော့ကျေးရွာအနီိးရှိ အမတ(၃၁၆) အမြောက်တပ်ကို ယမန်နေ့(ဇူလိုင် ၇ ရက်)က ဗုံးကြဲခဲ့ခြင်းဟု ဆိုသည်။
“ အဓိကပစ်မှတ်ကတော့ ဗဟိုကင်းနဲ့ ကင်းပုန်းဝပ်တဲ့နေရာတွေကို ဒရုန်းဗုံးသီးနှစ်လုံးနဲ့ တိုက်ခိုက်ခဲ့တာ” ဟု MSRF တာဝန်ရှိသူက ဒရုန်းဖြင့် ဗုံးကြဲခဲ့သည်ကို လူထုနွေဦးသို့ ရှင်းပြသည်။
Public Service Announcement
ထို့အပြင် ဆဲဗင်းဇူလိုင် အရေးတော်ပုံအတွက် လုပ်ဆောင်ခြင်းမျိုး ရည်ရွယ်ကြောင်းလည်း ၎င်းက အသိပေးသည်။
ယမန်နေ့ နေ့လည် ၁၂နာရီ ၃၅ မိနစ်က ဒရုန်းဖြင့် တိုက်ခိုက်မှုတွင် စစ်ကောင်စီ၏ ထိခိုက်ပျက်စီးမှုကို အသေးစိတ် မသိရှိရသေးပေ။
စစ်ဆင်ရေးတွင် မွန်ပြည်တော်လှန်ရေးတပ်(MSRF)နှင့် စစ်ရေးမဟာမိတ်ဖြစ်သော ဒေါနတပ်ရင်းတို့ ပူးပေါင်းခဲ့ပြီး ရဲဘော်များအထိအခိုက်မရှိခဲ့ကြောင်း ဖော်ပြသည်။
ရေးမြို့နယ်တွင် စစ်ကောင်စီ၏ အမှတ်(၁၉) စစ်ဆင်ရေးကွပ်ကဲမှုဌာနချုပ်(စကခ ၁၉)နှင့် လက်အောက်ခံတပ်ရင်းများဖြစ်သည့် ခလရ-၆၁၊ ခလရ -၂၉၉၊ ခမရ -၃၄၃ ၊ ခမရ -၅၈၆၊ ခမရ -၂၈၇ နှင့် အမှတ်(၃၁၆)အမြောက်တပ်ရင်း(အမတ ၃၁၆)တို့ရှိသည်။
