ဟန်နွေ/People’s Spring
ကချင်ပြည်နယ် မံစီမြို့ရှိ စစ်ကောင်စီတပ်ရင်းဌာနချုပ်သုံးခုကို ကချင်လွတ်လပ်ရေးတပ်မတော် (KIA)နှင့် မဟာမိတ်ပူးပေါင်းတပ်ဖွဲ့များက တိုက်ခိုက်သိမ်းပိုက်ခဲ့ရာ အဆိုပါ တပ်စခန်းများမှ စစ်ကောင်စီတပ်သားများ ဗန်းမော်မြို့ဘက်သို့ ထွက်ပြေးသွား၍ KIAပူးပေါင်းတပ်က လိုက်လံတိုက်ခိုက်ရာ စစ်ကောင်စီတပ် အထိနာခဲ့ဟု စစ်ရေးသတင်းရင်းမြစ်က ပြောသည်။
ဇန်နဝါရီ ၈ရက်တွင် စစ်ကောင်စီ၏ မံစီမြို့အခြေစိုက် တပ်ရင်းများဖြစ်သည့် ခမရ(၃၁၉)၊ ခမရ(၆၀၁)နှင့် အမတ(၃၅၂)တို့ကို KIA/KPDFနှင့် ABSDF ပူးပေါင်းတပ်များက သိမ်းပိုက်နိုင်ခဲ့ရာ စစ်ကောင်စီတပ်သား ၃၀၀ ကျော်မှာ မံစီမှ ဗန်းမော်မြို့ဘက်သို့ ထွက်ပြေးသွားခြင်းဖြစ်သည်ဟု ဆိုသည်။
အဆိုပါ ထွက်ပြေးသည့် စစ်ကောင်စီတပ်များအား KIA ပူးပေါင်းတပ်က လိုက်လံတိုက်ခိုက်ရာ ဇန်နဝါရီ ၉ရက်မှ ဇန်နဝါရီ ၁၂ရက်အတွင်း တိုက်ပွဲများဖြစ်ခဲ့ပြီး စစ်ကောင်စီတပ်က သေဆုံးထိခိုက်မှုများခဲ့သည်ဟု သတင်းရင်းမြစ်က ပြောသည်။ အဆိုပါ တိုက်ပွဲများအတွင်း စစ်ကောင်စီတပ်ဖွဲ့ဝင် ၁၈၀ခန့် တိုက်ခိုက်ရှင်းလင်းနိုင်ခဲ့ဟု သတင်းရင်းမြစ်က ပြောသည်။
Public Service Announcement
“ ၁၀၀ကျော် ဗန်းမော်သို့ ဝင်ရောက်သွားတယ်”ဟု ကချင်စစ်ရေးသတင်းရင်းမြစ်က ပြောသည်။
ပြီးခဲ့သည့် ရက်ပိုင်းကလည်း မံစီမြို့မှ ထွက်ပြေးသည့် စစ်ကောင်စီတပ်ဖွဲ့ တိုက်ခိုက်ခံရပြီး အထိနာခဲ့သည့် ရုပ်သံမှတ်တမ်းကို ကချင်သတင်းရင်းမြစ်တို့က ဖော်ပြခဲ့ရာ ရုပ်အလောင်းများ၊ စစ်ကောင်စီတပ် ၏ လက်နက်ခဲယမ်းများစွာ သိမ်းရထားသည်ကို တွေ့ရသည်။
မံစီမြို့သိမ်းတိုက်ပွဲအတွင်း ပါဝင်ခဲ့သည့် ကျောင်းသားတပ် ABSDFကလည်း မံစီမြို့သိမ်း ရုပ်သံမှတ်တမ်းကို ယနေ့ ထုတ်ပြန်ခဲ့ရာ “ မံစီမြို့သိမ်း တိုက်ပွဲတွင် ထိခိုက်ကျဆုံးသွားသော ရဲဘော်များအား တပ်ဦးနှင့် တပ်မတော်မှ မှတ်တမ်းတင်ဂုဏ်ပြုတပ်ပါသည်” ဟု ရေးသားခဲ့သည်။
အဆိုပါ ရုပ်သံတွင် ABSDF တပ်ဖွဲ့ဝင်များ၏ စစ်ရေးလှုပ်ရှားမှု ၊ တိုက်ပွဲအတွင်း လက်နက်ကြီး လက်နက်ငယ် ပစ်ခတ်တိုက်ခိုက်နေမှုများ၊ မံစီမြို့ရှိ စစ်ကောင်စီတပ်များ သိမ်းပိုက်ပြီးနောက် ရဲဘော်၊ရဲမေများ အောင်ပွဲခံနေမှု မြင်ကွင်းများကို ဖော်ပြထားသည်။
KIA ပူးပေါင်းတပ်သည် ၂၀၂၄ ဒီဇင်ဘာ ၄ရက်တွင် မံစီနှင့် ဗန်းမော်မြို့ကို တပြိုင်တည်း ထိုးစစ်ဆင်တိုက်ခိုက်ခဲ့ရာ တစ်လကျော်အကြာတွင် မံစီမြို့ရှိ စစ်ကောင်စီလက်ကျန်တပ်စခန်းအားလုံး သိမ်းပိုက်နိုင်ခဲ့ပြီး လက်ရှိတွင်လည်း ဗန်းမော်မြို့ရှိ စစ်ကောင်စီ၏ လက်ကျန် ပင်မတပ်စခန်းများကို ဆက်လက်ထိုးစစ်ဆင်လျက်ရှိသည်။
