ရဲခေါင်/People’s Spring
ရှမ်း – ကရင်နီပြည်နယ်အစပ် မိုးဗြဲမြို့ကို စစ်ကောင်စီက လက်နက်ကြီးဖြင့် အဆက်မပြတ် ပစ်ခတ်နေကြောင်း Mobye Rescue Team(MRT)က ထုတ်ပြန်သည်။
ယနေ့(ဇန်နဝါရီ ၁၄ရက်)နံနက်ပိုင်းကစ၍ နေ့လည်ပိုင်းအထိ မိုးဗြဲမြို့သို့ ပစ်မှတ်ထားကာ စစ်ကောင်စီက လက်နက်ကြီးဖြင့် တိုက်ခိုက်နေသည်ဟု ဆိုသည်။
ထို့ကြောင့် မိုးဗြဲ – လွိုင်ကော်လမ်းမကြီးကို အသုံးပြုသွားလာနေကြသည့် ပြည်သူများအနေဖြင့် အထူးသတိပြုရန်လည်း MRTက တိုက်တွန်းသည်။
Public Service Announcement
“မနက် ၇ နာရီလောက်ကတည်းက လွိုင်ကော်ကနေ လက်နက်ကြီး စပစ်တာ။အခုနေ့လည်ပိုင်း(၁၁ နာရီခွဲ)အထိ မိုးဗြဲဘက်ကို ပစ်နေတာလို့ သိရတယ်။တိုက်ပွဲတော့ ဖြစ်သံမကြားရဘူး”ဟု ကရင်နီဒေသခံက လူထုနွေဦးသို့ ပြောသည်။
စစ်ကောင်စီ၏ လက်နက်ကြီးပစ်ခတ်မှုများသည် (ဇန်နဝါရီ ၁၅ရက်)တွင်ပြုလုပ်မည့် ကယားဒေး ပွဲတော် အောင်မြင်စွာကျင်းပနိုင်ရေးအတွက် ခြောက်လှန့်ပစ်ခတ်ခြင်းဖြစ်နိုင်ကြောင်းလည်း ကရင်နီစစ်ဘက်သတင်ရင်းမြစ်က ခန့်မှန်းသည်။
“ဒီမနက် အစောပိုင်း (နံနက် ၁ နာရီခန့်) ဖယ်ခုံအရှေ့ဘက်ခြမ်းကို လေယာဥ်နဲ့ဗုံးကြဲတာရှိတယ်။အခု လွိုင်ကော်ကနေ လက်နက်ကြီးနဲ့ပစ်ခတ်နေတာတွေက ခြောက် လှန့်တာလို့ ယူဆတယ်”ဟု ၎င်းက ပြောသည်။
စစ်ကောင်စီ၏ လက်နက်ကြီးပစ်ခတ်မှုနှင့်ပတ်သက်၍ သက်ဆိုင်ရာဒေသခံတပ်ဖွဲ့ဖြစ်သော မိုးဗြဲ PDFထံ လူထုနွေဦးအနေဖြင့် မေးမြန်းရန်ဆက်သွယ်ဆဲဖြစ်သည်။
ကရင်နီပြည်နယ်သို့ ဝင်ပေါက်ဖြစ်သည့် မိုးဗြဲမြို့ပြန်ရရေး စစ်ကောင်စီ၏ ထိုးစစ်မှာ နှစ်လခန့် ရှိနေပြီး ကရင်နီတပ်ပေါင်းစုက ခုခံနေသည်။
