ကဖေး/People’s Spring
ဒီပဲယင်းမြို့တွင် စစ်ကောင်စီတပ်စွဲထားသည့် နေရာများကို Y-12 လေယာဉ်ဖြင့် လေထီးအသုံးပြု၍ ရိက္ခာအထုပ်တစ်ရာနီးပါး လာချခဲ့ရာ ရိက္ခာထုပ်အချို့ကို ပြည်သူ့ကာကွယ်ရေးတပ်ဖွဲများက ရရှိခဲ့သည်။
“၉၈ ထုပ်ချတာ။ စစ်ကောင်စီဘက်ကလည်း ထွက်မကောက်ရဲဘူး။ ကိုယ်တွေဘက်ကလည်း အသင့်ရှိနေတာ။ ရိက္ခာထုပ်တချို့ ရထားတယ်။ ကျန်တာကတော့ သူတို့ ချတဲ့ နေရာမှာပဲ”ဟု ဒေသခံသတင်းရင်းမြစ်က လုထုနွေဦးသို့ပြောသည်။
ရိက္ခာထုပ်များကို စစ်ကောင်စီက ဇန်နဝါရီလ ၂၂ရက် ညနေ ၂နာရီခန့်မှ ၃နာရီခွဲခန့်အတွင်း Y12 လေယာဉ်ဖြင့် ၁၂ ကြိမ် ချခြင်းဟု သိရသည်။
Public Service Announcement
ဒီပဲယင်းမြို့ကို ၂၀၂၄ ခုနှစ် ဩဂုတ်လ ၁၈ ရက်နေ့တွင် ရွှေဘိုခရိုင်အမှတ် (၁) ကွပ်ကဲရေးရုံးကွပ်ကဲမှုဖြင့် ပြည်သူ့ကာကွယ်ရေးပူး ပေါင်းတပ်များက တိုက်ခိုက်သိမ်းပိုက်နိုင်ခဲ့သည်။သို့သော်မြို့သိမ်းပြီး နာရီပိုင်းအတွင်းမှာပင်စစ်ကောင်စီက လေကြောင်းမှ တိုက်ခိုက်ပြီး စစ်ကူပို့၍ ပြန်လည်ထိန်းချုပ်ခဲ့သည်။ တိုက်ပွဲတွင် စစ်ကောင်စီဘက်မှ ၁၈ ဦး သေဆုံးပြီး ၁၀ဦးဒဏ်ရာရကာ Non-CDM
ဝန်ထမ်း ၄၀ ဦး၊ အချုပ်သား ၂၀ ဦး၊ ပြည်သူ ၇၂ ဦးအားကယ်တင်နိုင်ခဲ့ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊အမှတ်(၁) စစ်ဒေသက ဩဂုတ်လ ၂၀ရက်၌ သတင်းထုတ်ပြန်ခဲ့သည်။
မြို့အားပြန်လည်ထိန်းချုပ်ပြီးနောက် စစ်ကောင်စီက လေကြောင်းတိုက်ခိုက်မှုများမကြာခဏပြုလုပ်ခဲ့သည်။ထို့အပြင် မြေပြင်စစ်ကြောင်းသည် ဒီပဲယင်းမြို့မရဲစခန်း၊ စာသင်ကျောင်းနှင့် ဇွဲစားသောက်ဆိုင်အဆောက်အအုံ၌ တပ်စွဲထားသည်။ ယခု ရိက္ခာထုပ်များကိုလည်း အဆိုပါနေရာ သုံးခုပတ်ဝန်းကျင်တွင်ချသွားခြင်းဟုသတင်းရရှိသည်။
စစ်တပ်က မြို့ပေါ်တွင်တပ်စွဲထားသော်လည်း မြို့အနီးဝန်းကျင်ကို PDF များကထိန်းချုပ်ထားခြင်းဖြစ်သည်။
ဒီပဲယင်းမြို့ပေါ်၌ တပ်စွဲထားသည့်စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့များ မကြာခဏတိုက်ပွဲဖြစ်ပွားခဲ့သည်။ ၂၀၂၄ ခုနှစ် အောက်တိုဘာလ၁၇ရက်နေ့ကဖြစ်ပွားသောတိုက်ပွဲ၌ စစ်ကောင်စီဘက်မှ မိုင်းစစ်ဆင်ရေးအဓိကတာဝန်ရှိသူကို ကာကွယ်ရေးတပ်ဖွဲ့များကဖမ်းဆီးနိုင်ခဲ့သည်။
