'/%3E%3C/svg%3E){kind=small}
ဆိုင်းမင်း/People’s Spring
မန္တလေးတိုင်း ၊ မိတ္ထီလာခရိုင် ၊ မလှိုင်မြို့နယ်ထဲက ရွာတန်းရှည်ရွာကို စစ်ကောင်စီတပ်က စက်တပ်လေထီးနဲ့ ဇန်နဝါရီလ ၂၈ ရက်က တိုက်ခိုက်လာတာကြောင့် ဒေသခံအမျိုးသမီးတစ်ဦး သေဆုံးသွားတယ်လို့ သိရပါတယ်။
မနေ့ ဇန်နဝါရီလ ၂၈ ရက်က မနက်အစောပိုင်း ၄ နာရီခန့်က ရွာတန်းရှည်ရွာကို လူလိုက်ပါတဲ့ စက်တပ်လေထီးနဲ့ ဗုံးသီးချ တိုက်ခိုက်ခဲ့တာလို့ ဒေသခံက အသိပေးပါတယ်။
အဲဒီတိုက်ခိုက်မှုကြောင့် ဒေသခံ လင်မယား နှစ်ဦး ထိခိုက်ဒဏ်ရာရပြီး အမျိုးသမီးကတော့ ပွဲချင်းပြီး သေဆုံးကာ အမျိုးသားက ဒဏ်ရာပြင်းပြင်းထန်ထန်ရသွားတယ်လို့ အဲဒီဒေသခံကပြောပါတယ်။
Public Service Announcement
” အမျိုးသားက ပေါင်မှာ ဒဏ်ရာပြင်းတော့ နွားထိုးကြီးဆေးရုံကိုပို့ပေးခဲ့တယ်” ရွာတန်းရှည်ရွာ ဒေသခံတစ်ဦး ဆိုပါတယ်။
သေဆုံးသူအမျိုးသမီးဟာ အသက် ၂၆ နှစ်အရွယ် လို့သိရပါတယ်။ ဒါအပြင် တိုက်ခိုက်မှု အတွင်း ရွာတန်းရှည်ရွာက အသက် ၃ နှစ်အရွယ် ကလေးငယ်တစ်ဦး လည်းထိခိုက်ဒဏ်ရာရခဲ့ပါတယ် ။
စစ်ကောင်စီတပ်ဟာ မိတ္ထီလာလေတပ်စခန်းကနေ မိုင် ၁၀၀ ပတ်လည်အတွင်းမှာရှိတဲ့ မြို့နယ်တွေက ကျေးရွာတွေကို စက်တပ်လေထီးသုံးပြီး တိုက်ခိုက်တာတွေ ပြုလုပ်နေတာပါ။
တောင်သာ၊နွားထိုးကြီး ၊ ကျောက်ပန်းတောင်းနဲ့ မလှိုင်မြို့နယ်အတွင်းမှာ နေ့စဥ်နီးပါး တိုက်ခိုက်နေတာဖြစ်ပြီး ဒေသခံတွေအနေနဲ့ ဗုံးခိုးကျင်းတူးတာတွေ၊ ညဘက်တွေမှာရှောင်တိမ်းရတာတွေပါ လုပ်ဆောင်လာရပါတယ်။
