ရဲခေါင်/People’s Spring
မကွေးတိုင်း၊ ပွင့်ဖြူမြို့နယ် ပုသိမ် – မုံရွာလမ်းပိုင်းရှိ မဲဇလီ-ဆည်တော်စစ်ဆေးရေးဂိတ်အား ဝင်ရောက်တိုက်ခိုက်ရာ စစ်ကောင်စီတပ်သား ငါးဦးသေဆုံးကြောင်း ပွင့်ဖြူမြို့နယ်ပြည်သူ့ကာကွယ်ရေးအဖွဲ့(ပကဖ) တာဝန်ရှိသူက လူထုနွေဦးသို့ ပြောသည်။
ဖေဖော်ဝါရီ ၁ရက် နံနက် ၆နာရီခွဲခန့်ကစ၍ ၁နာရီကျော်ကြာတိုက်ပွဲအတွင်း စစ်ကောင်စီတပ်က လေ ကြောင်း၊လက်နက်ကြီးအပါအဝင် လေထီးများအသုံးပြု ခုခံခဲ့ ဆိုသည်။
” သုံးယောက်က ခံပစ်နေတဲ့အနေအထားမျိုးဖြစ်နေချိန်လေကြောင်းနဲ့ လက်နက်ကြီးပစ်ကူတောက်လျှောက်ဝင်လာလို့ ဆုတ်ခွာခဲ့ရတာ”ဟု အထက်ပါတာဝန်ရှိသူက ပြောသည်။
Public Service Announcement
စစ်ကောင်စီအင်အား ၁၃ ဦးခန့်တပ်စွဲအထိုင်ချထားသော စစ်ကောင်စီ၏ မဲဇလီ – ဆည်တော် စစ်ဆေးရေးဂိတ်ရှိ ဘန်ကာ သုံးခုပြိုသည်အထိ တိုက်ခိုက်နိုင်ခဲ့ကြောင်းနှင့် မဲဇလီ – ဆည်တော်ဂိတ်သည် မဲဇလီကျေးရွာရှိ စစ်ကောင်စီတပ်စခန်း၏ ရှေ့တန်းဂိတ်ဖြစ်ကြောင်း ၎င်းက အသိပေးသည်။
တိုက်ပွဲအတွင်း ပူးပေါင်းတပ်ဖွဲ့မှ အထိခိုက်မရှိပြန် လည်ဆုတ်ခွာနိုင်ခဲ့ပြီး စစ်ကောင်စီတပ်ဖွဲ့ဝင် ငါး ဦးသေဆုံးပြီး တစ်ဦး ဒဏ်ရာပြင်းထန်ရရှိကြောင်း ပွင့်ဖြူမြို့နယ် ပကဖက ယနေ့(ဖေဖော်ဝါရီ ၄ရက်)တွင် ထုတ်ပြန်ထားသည်။သို့သော် စစ်ကောင်စီတပ်ဖွဲ့ဝင်သေဆုံး ထိခိုက်မှုကို လူထုနွေဦးအနေဖြင့် သီးခြားအတည်ပြုနိုင်ခြင်းမရှိသေးပေ။
မဲဇလီ-ဆည်တော် စစ်ဆေးရေးဂိတ်အား ပြည်သူ့ကာကွယ်ရေးအဖွဲ့ – ပွင့်ဖြူမြို့နယ်၊မင်းဘူးခရိုင်အမှတ် ၇ တပ်ရင်း၊ မကွေးတိုင်းပ.က.ဖ ရွေ့လျားစစ်ကြောင်း(Yenanthar Column) နှင့် မင်းဘူးခရိုင် ပ.က.ဖ ဒရုန်းလက်ရုံးအဖွဲ့တို့က ပူးပေါင်းတိုက်ခိုက်ခဲ့ကြောင်း သိရသည်။
မဲဇလီ – ဆည်တော်ဂိတ်အား ၂၀၂၄ နိုဝင်ဘာနောက်ဆုံးပတ်က တိုက်ခိုက်မှုရှိခဲ့ပြီး စစ်ကောင်စီဘက်က သေဆုံးမှုအချို့နှင့် လက်နက်ငယ်တစ်လက်အပါအဝင် စစ်အသုံးဆောင်ပစ္စည်းများကို သိမ်းဆည်းရမှုရှိခဲ့သည်။
ပွင့်ဖြူမြို့နှင့် မိုင်(၂၀)ခန့်အကွာတွင်ရှိသော အင်အား(၃၀)ခန့်ဖြင့် တပ်စွဲထားသော မဲဇလီရဲစခန်းကို တော်လှန်ရေးအင်အားစုများတိုက်ခိုက်မှုကြောင့် ယခု ဖေဖော်ဝါရီလဆန်းပိုင်းတွင် စစ်ကောင်စီက စွန့်ခွာသွားကြောင်းလည်း Earthquake People’s Defence Force တာဝန်ရှိသူက လူထုနွေဦးသို့ ပြောထားသည်။
