အိမ်သွင်/People’s Spring
ရှမ်းပြည်နယ်တောင်ပိုင်း၊ အောင်ပန်းမြို့တွင် အသက် ၂၀ ကျော် အမျိုးသားတစ်ဦး ကြိုးဆွဲချသေဆုံးမှု ထပ်ဖြစ်ပြီး ယင်းအမျိုးသားသည် စစ်မှုထမ်းရန် ခေါ်ဆောင်ခံထားရသူဖြစ်ကြောင်း ဒေသခံအချို့ကပြောသည်။
အောင်ပန်းမြို့၊မင်္ဂလာရပ်ကွက်မင်္ဂလာကန် အရှေ့မြောက်ဘက်စိန်ပန်းပင်ပေါ်တွင် ကြိုးဆွဲချသေဆုံးနေသည့်အမျိုးသားကို ဗုဒ္ဓဟူးနေ့ ( ဖေဖော်ဝါရီ ၅) နံနက်အစောပိုင်း၌ ဒေသခံများကတွေ့ရှိခဲ့ခြင်းဖြစ်သည်။
” စစ်မှုထမ်းရမှာကို လူငယ်တွေအရမ်းကြောက်နေကြတယ်။ ဒီကောင်လေးလည်း အဲဒါကြောင့် သူ့ကိုယ်သူ သတ်သေတာလို့ကြားတယ်။ သူ့မိသားစုဝင်တွေကို ရှာဖွေချိတ်ဆက်ပေးအကြောင်းကြားဖို့လုပ်နေကြတယ်” ဟု ဒေသခံတဦးကပြောသည်။
Public Service Announcement
သေဆုံးသူနှင့်ပတ်သက်၍အသေးစိတ်အချက်အလက်ကို မသိရသေးပေ။ မိသားစုဝင်များနှင့်လည်း အဆက်အသွယ်မရရှိသေးပေ။
ရွှေညောင်မြို့တွင် စစ်မှုထမ်းစာရင်းပါသည့် လူငယ်တစ်ဦး ဖေဖော်ဝါရီလ ၄ရက်က ကြိုးဆွဲချသေဆုံးပြီးနောက် ရှမ်းပြည်နယ်တောင်ပိုင်းတွင် အလားတူဖြစ်ရပ် မျိုး နှစ်ရက်ဆက်ဖြစ်ပွားခြင်းဟု ဒေသခံများကပြောသည်။ ရွှေညောင်မြို့ဖြစ်စဉ်တွင် သေဆုံးသူမှာ အသက်၁၉နှစ်အရွယ်လူငယ်တစ်ဦးဖြစ်သည်။
၎င်းသည် ဖေဖော်ဝါရီလ ၁၅ ရက်တွင် စစ်မှုထမ်း သွားရမည်ကို သိရှိပြီးနောက် ရွှေညောင် စလီဗာတုံး စက်ရုံအနီး ညောင်ပင်တွင် ကြိုးဆွဲချသေဆုံးခဲ့ခြင်းဖြစ်သည်။
စစ်ကောင်ဆီက စစ်မှုထမ်းဥပဒေကို ပြဌာန်းပြီးနောက် လူငယ်နှင့် လူလတ်ပိုင်းအမျိုးသားများကို စစ်သားစုဆောင်းနေသည်။ ရှေ့တန်းသို့ပါသွားသူများသည် တိုက်ပွဲအတွင်း သေဆုံးမှုများပြားပြီး အသက်မသေသူများသည် မိသားစုနှင့်အဆက်အသွယ်ဖြတ်တောက်ခံထားရသည်။ စစ်မှုထမ်းဥပဒေကြောင့် လူငယ်အများအပြားသည် ထွက်ပြေးတိမ်းရှောင်နေကြရပြီး စစ်ကောင်စီက အတင်းအကြပ်ဖမ်းဆီးခြင်း၊ ပေါ်တာဆွဲခြင်းများပြုလုပ်နေသည်။
