တာရာ/People’s Spring
မကွေးတိုင်း၊ ပွင့်ဖြူမြို့နယ်အတွင်းရှိ ကြီးအုံကြီးဝဆည်အနီး စစ်ကောင်စီတပ်နှင့် ဒေသခံကာကွယ်ရေးတပ်တို့ကြား ယနေ့(ဖေဖော်ဝါရီ၅ရက်နေ့ ) ညနေပိုင်းမှ စတင်ပြီး တိုက်ပွဲပြင်းထန်နေကြောင်း ဒေသခံများထံမှသိရသည်။
အင်အား ၁၀၀ ခန့်ရှိသည့် စစ်ကောင်စီတပ်သည် ဖေဖော်ဝါရီ ၅ ရက်နေ့ ညနေ ၃ နာရီခန့်တွင် ရုန်းပင်ရွာမှ ဆည်တမံဘက်ကို စစ်ကြောင်းထိုးလာခြင်းကြောင့် ကာကွယ်ရေးတပ်များနှင့်တိုက်ပွဲဖြစ်ပွားခဲ့ခြင်းဖြစ်သည်။
“မနေ့ကတည်းက စစ်ကြောင်းထိုးလာလို့ ဒေသခံတွေက စစ်ရှောင်နေကြရတယ်။ သူတို့က ပုသိမ်-မုံရွာလမ်းကနေ ဆည်ဘက်ကို စစ်ကြောင်းထိုးလာရင်းတိုက်ပွဲဖြစ်နေကြတာလေ။ ညမိုးချုပ်အထိ တိုက်ပွဲဖြစ်နေဆဲပဲ”ဟု ဒေသခံတစ်ဦးကပြောသည်။
Public Service Announcement
စစ်ကောင်စီစစ်ကြောင်းက ဖေဖော်ဝါရီ ၄ ရက်ပုသိမ်-မုံရွာလမ်းရှိ PDF ဂိတ်ကို ဝင်ရောက်တိုက်ခိုက်ပြီး ရုန်းပင်ရွာကို စစ်ကြောင်းဝင်ရောက်လာခြင်းဖြစ်သည်။
ထိုစစ်ကြောင်းကြောင့် ရုန်းပင်း၊ ရေရင်၊ ဝန်လို၊ ခိုနန်း၊ ကန်၊ ပေပင်နှင့် ချောင်းဆုံရွာတို့မှ ဒေသခံ တစ်ထောင်ကျော်စစ်ဘေးရှောင်နေရသည်ဟုလည်း ဒေသခံများထံမှသိရသည်။
ကြီးအုံကြီးဝ ဆည်တမံကို ၂၀၀၃ ခုနှစ်တွင် မုန်းချောင်းကို ပိတ်ဆို့ကာ စတင်ဆောက်လုပ်ခဲ့ပြီး ၂၀၁၂ခုနှစ်တွင်ဖွင့်လှစ်ခဲ့သည်။ လျှပ်စစ်ဓာတ်အား မဂ္ဂဝပ် (၇၄) ထွက်ရှိသည့် ဓာတ်အားပေးစက်ရုံဖြစ်သည်။
