ရဲခေါင်/People’s Spring
ရှမ်း – ကရင်နီပြည်နယ်အစပ် မိုးဗြဲမြို့၌ တိုက်ပွဲပြင်းထန်နေပြီး စစ်ကောင်စီက လေကြောင်းတိုက်ခိုက်မှု အလွန်အကျွံအသုံးပြုနေကြောင်း ကရင်နီအမျိုးသားများကာကွယ်ရေးတပ်(KNDF) တာဝန်ရှိသူက လူထုနွေဦးသို့ ပြောသည်။
မိုးဗြဲမြို့ကို ပြန်လည်ထိန်းချုပ်နိုင်ရေးအတွက် စစ်ကောင်စီ၏ ထိုးစစ်ရက်ပေါင်း ၆၀ကျော် အတွင်း ယမန်နေ့(ဖေဖော်ဝါရီ ၅ရက်)တွင် လေကြောင်းမှ တိုက်ခိုက်မှုအကြိမ်ရေအများဆုံးဟု ကရင်နီစစ် ဘက်သတင်းရင်းမြစ်အချို့ကလည်း ဆိုသည်။
“မိုးဗြဲမှာ မနေ့က တိုက်ပွဲတွေ ပြင်းထန်ခဲ့တယ်။ဒီနေ့ (ဖေဖော်ဝါရီ ၆ ရက်)အထိလည်း စစ်ရေးတင်းမာမှုတွေရှိနေတုန်းပဲ။စစ်ကောင်စီဘက်က လေကြောင်းတိုက်ခိုက်မှုကိုအဆမတန် အသုံးပြုတယ်။အကြိမ်ပေါင်းများစွာလုပ်ခဲ့တယ်”ဟု KNDF တာဝန်ရှိသူက ပြောသည်။
Public Service Announcement
ယမန်နေ့က စစ်ကောင်စီ၏ လေကြောင်းတိုက်ခိုက်မှုတွင် Y 12၊ဂျက်ဖိုက်တာနှင့် ကင်းထောက်လေယာဥ်များစွာ အသုံးပြုခဲ့ကြောင်းလည်း ကရင်နီစစ်ဘက်သတင်းရင်းမြစ်က အသိပေးသည်။
“နေ့လည်ပိုင်းကတည်း လေယာဥ်နဲ့စကြဲတာ ည ၁၀ နာရီလောက်အထိ ရှိတယ်။အခု ဒီမနက်လည်း ကင်း ထောက်လေယာဥ်ဝဲနေသလို လက်နက်ကြီးနဲ့ ပစ်ခတ်တာ ရှိတယ်”ဟု ၎င်းက ပြောသည်။
တိုက်ပွဲပြင်းထန်နေရသည့် စစ်ရေးအခြေအနေကိုမူ KNDF နှင့် ကရင်နီတပ်ပေါင်းစု ဘက်က အသိပေးခြင်းမရှိပေ။
သို့သော် စစ်တပ်ဝါဒဖြန့်သူများကမူ “မိုးဗြဲမြို့ကို ကရင်နီတပ်ပေါင်းစု ၁၂၀၀ခန့် ပြင်းပြင်းထန်ထန် စတင်တိုက်ခိုက်နေပါပြီ။KNDFထိုးစစ်စပြီ”ဟု ယမန်နေ့ နေ့လည်ပိုင်းကစ၍ ဖြန့်ဝေခဲ့သည်။
စစ်ကောင်စီဘက်က အင်အားအလုံးအရင်းဖြင့် ထိုးစစ်ဆင်နေသော မိုးဗြဲမြို့ကို တော်လှန်ရေးပူးပေါင်းတပ်များက ထိန်းချုပ်ထားနိုင်ဆဲဟု KNDF က ယခုလဆန်းပိုင်းတွင် ထုတ်ပြန်သည်။
မိုးဗြဲမြို့အခြေစိုက် ခမရ(၄၂၂)တပ်တွင် စုဖွဲ့ရောက်ရှိနေသော စစ်ကောင်စီ၏ စစ်ကြောင်းအချို့မှာ မိုးဗြဲမြို့တွင်းသို့ ဝင်ရောက်နိုင်ရေးအတွက် စစ်ကြောင်းထိုး၍ နေ့စဉ် ထိတွေ့မှုများရှိကြောင်း အသိပေးထားသည်။
ထို့အပြင် ထိုးစစ်ဆင်နေသော စစ်ကြောင်းများ ဝင်မလာနိုင်စေရန်အတွက် ကာကွယ်ရေးတပ်ပေါင်းစုံမှ ကြိုးစားခုခံလျှက်ရှိကာ ကျွံထွက်လာသော စစ်ကောင်စီတပ်မျာအား ချေမှုန်းတိုက်ခိုက် မည်ဟု KNDF က ဆိုသည်။
စစ်ရေးအခြေနေများကြောင့် မိုးဗြဲလမ်းမကြီးပေါ်တွင် အသွားအလာအသုံးပြုမူကို သတိပြုရန်အပါအဝင် သက်ဆိုင်ရာလုံခြုံရေးဂိတ်များနှင့် ပူးပေါင်းလုပ် ဆောင်ပေးရန်လည်း တိုက်တွန်းထားသည်။
၂၀၂၃ နှစ်ကုန်ပိုင်းကစ၍ မြို့စောင့်တပ် ခမရ (၄၂၂)မှအပ မိုးဗြဲမြို့တွင် စစ်ကောင်စီတပ်စွဲရာ ဝါရီဆူဖလိုင်၊ ဒုန်းဒူထန်၊ ပွဲကုန်း၃၊ ပွဲကုန်း၁၊ ညောင်ဝိုင်း၊ ပီကင်းကောခူ၊ ဆောင်ကန်း နှင့် စည်ကား၂ နှင့် စက်တော်ရာတောင်ကုန်း(ခ) ဗျူဟာကုန်းကို ကရင်နီတပ်ပေါင်းစုက သိမ်းပိုက်နိုင်ခဲ့သည်။
