နိုင်ပကောင်း/People’s Spring
ထိုင်း -မြန်မာ နယ်စပ် ကရင်ပြည်နယ် ၊ ဘုရားသုံးဆူမြို့ မှာ တရားမဝင် ဝင်ရောက်လုပ်ကိုင်နေတဲ့ တရုတ်နိုင်ငံသားတွေ အခုလ ဖေဖော်ဝါရီ ၂၈ ရက်နောက်ဆုံးထားပြီး ထွက်ခွာကြဖို့ ဒီမိုကရေစီအကျိုးပြုကရင်တပ်မတော် (DKBA) က အမိန့်ထုတ်ပြန်လိုက်ပါတယ်။
ဘုရားသုံးဆူမြို့ဆီ တရားမဝင် ရောက်ရှိလာပြီး စားသောက်ကုန်လုပ်ငန်းတွေ လုပ်ကိုင်နေသူတွေ ၊ ကာစီနိုလောင်းကစား လုပ်ငန်းနဲ့ လောင်းကစား ဂိမ်းရုံ လုပ်ငန်း လုပ်ကိုင်နေတဲ့ တရားမဝင်တရုတ်နိုင်ငံသားတွေ ထွက်ခွာ ဖို့ DKBA နည်းဗျုဟာမှုး ဗိုလ်မှုးကြီး စောအေဝမ်းက အမိန့်ထုတ်တာပါ။
မြန်မာဘက်ခြမ်းက ကျားဖြန့်လုပ်ငန်းတွေကိုနှိမ်နင်းဖို့ ထိုင်းအစိုးရက ဘုရားသုံးဆူအပါအဝင် ထိုင်းနဲ့ ထိစပ်နေတဲ့ မြန်မာနယ်စပ်မြို့တွေကို လျှပ်စစ်မီးနဲ့ လောင်စာဆီဖြတ်တောက်ထားပါတယ်။
Public Service Announcement
အခုလို ဖြတ်တောက်ခံရတဲ့အတွက် ဘုရားသုံးဆူမြို့ခံတွေ လူမှုစီးပွားဘဝထိခိုက်ခံစားနေရတယ်လို့ ဘုရားသုံးဆူမြို့ကို ကြီးစိုးထားတဲ့ DKBA နည်းဗျုဟာမှုး ဗိုလ်မှုးကြီးစောအေဝမ်းက ဒီနေ့မှာ ထုတ်ပြန်ချက် တစ်စောင်ထုတ်ပြန်ပါတယ်။
ဘုရားသုံးမြို့မှာ ကျားဖြန့် နဲ့ အွန်းလိုင်းလောင်းကစား လုပ်ငန်းတွေ လုပ်ဆောင်တာမရှိတော့ဘူးဆိုတာကို ထိုင်းအစိုးရ ယုံကြည်မှသာ လျှပ်စစ်မီးနဲ့ လောင်စာဆီ အရင်အတိုင်းပြန်လည်ရရှိမှာဖြစ်တယ်လို့ ဗိုလ်မှုးကြီးစောအေဝမ်းက ဆိုပါတယ်။
ဒါကြောင့် ထိုင်းဘက်ဆီက လျှပ်စစ်မီးနဲ့ လောင်စာဆီ အမြန်ဆုံးရအောင် ကြိုးပမ်းသွားမယ်လို့လည်း ဘုရားသုံးဆူမြို့ခံပြည်သူတွေကို ရည်ရွယ်ထုတ်ပြန်တဲ့ ထုတ်ပြန်ချက်မှာ ဗိုလ်မှုးကြီးစောအေဝမ်းက အသိပေးထားပါတယ်။
တရားမဝင် ဝင်ရောက်လုပ်ကိုင်နေတဲ့ တရုတ်နိုင်ငံသားတွေ အမြန်ဆုံးပြန်ကြဖို့ အမိန့်ထုတ်ထားသလို နောက်ထပ် ထပ်ဝင်ရောက်တာမရှိဖို့လည်း ပိတ်ပင်တားမြစ်သွားမယ်လို့ DKBA က ဆိုပါတယ်။
လက်ရှိမှာ ဘုရားသုံးဆူမြို့ပေါ်က တရုတ်နိုင်ငံသား ပိုင် လုပ်ငန်းတွေကို ပိတ်ထားလိုက်ပြီး DKBA အမှတ် (၂)နည်းဗျုဟာအဖွဲ့က ကွင်းဆင်းစစ်ဆေးတာတွေ လုပ်ဆောင်သွားမယ်လို့DKBA တပ်နဲ့ နီးစပ်သူက ပြောပါတယ်။
“အခု တရုတ်ဆိုင်တွေအားလုံး ပိတ်လိုက်ပြီ၊ ဖုန်းဆိုင်တွေကအစပေါ့၊ သူတို့(DKBA) စာရင်းပြန်ယူမယ်လေ၊ စာရင်းပြန်ယူမယ်ဆိုတာက (တရုတ်တွေ) ဗီဇာကနေလာတာလား၊ အောက်လမ်းကနေ လာတာလား၊ ဒီ ၁၅ ရက်နေ့အပြီး စာရင်းကောက်မယ်။ ကောက်ပြီးရင် သူတို့ပြန်ပို့မယ်ပေါ့” လို့ DKBA နဲ့နီးစပ်တဲ့သတင်းရင်းမြစ်က ဆိုပါတယ်။
ပြီးခဲ့တဲ့ ၂၀၂၄ ခုနှစ် မှာ မြဝတီမြို့က တရားမဝင် တရုတ်နိုင်ငံသားတွေ ထွက်ခွာသွားဖို့ ကရင့်နယ်ခြားစောင့်တပ် (BGF) က အမိန့်ပေးပြီးနောက် ဘုရားသုံးဆူမြို့ဘက်ဆီ အစုလိုက်အပြုံလိုက် ပြောင်းရွှေ့အခြေချလာကြတာလို့သိရပါတယ်။
ဘုရားသုံးဆူမြို့မှာ တရုတ်နိုင်ငံသားပိုင် လုပ်ငန်းတွေ၊ ကာစီနိုတွေ၊ KTV လုပ်ငန်းတွေ နေ့ချင်းညချင်းဆိုသလို များပြားလာခဲ့တာကြောင့် တရုတ်မြို့အဖြစ် တင်စားခေါ်ဝေါ်ခံရတာတွေ ရှိလာပါတယ်။
