စစ်ကိုင်းတိုင်း၊ ချောင်းဦးမြို့နယ်မှာ စစ်တပ်က လက်နက်ကြီးနဲ့ ပစ်ခတ်တာကြောင့် နှစ်ရက်အတွင်း ပြည်သူ ၄ ဦးသေဆုံးပြီး ၅ဦးထိခိုက်ဒဏ်ရာတွေ ရရှိခဲ့တယ်လို့ ဒေသခံတွေက ပြောပါတယ်။
ဖေဖော်ဝါရီ ၁၈ရက် မနေ့ ညနေ ၅နာရီဝန်းကျင်မှာ ချောင်းဦးမြို့နယ် မြပုလဲ စစ်တပ်ဂိတ်ကနေ လက်နက်ကြီးနဲ့ ပစ်ခတ်ခဲ့တာလို့ သိရပါတယ်။ စစ်တပ်ပစ်ခတ်လိုက်တဲ့ လက်နက်ကြီးကျည်ဟာ ကျီကုန်းကျေးရွာထဲကို ကျပြီး ပြည်သူနှစ်ဦးသေဆုံးကာ အသက် ၅နှစ်အရွယ် ကလေးတစ်ဦး၊ လူလတ်ပိုင်းအမျိုးသားနဲ့ အမျိုးသမီးတစ်ဦးတို့ ထိခိုက်ဒဏ်ရာတွေ ရရှိခဲ့တာလို့ ဒေသခံတွေက ပြောပါတယ်။
ဒီနေ့(ဖေဖော်ဝါရီ ၁၉ရက်) မနက် ၁၁နာရီဝန်းကျင်ကလည်း ချောင်းဦးမြို့နယ် ခင်မွန်ဘက်စုံခြံ(ခင်မွန်ရွာက စစ်တပ်စိုက်ပျိုးရေးတပ်)ကနေ လက်နက်ကြီးတွေနဲ့ ပစ်ခတ်ခဲ့တာကြောင့် မုံရွာမြို့နယ်အတွင်းက စစ်ရှောင်ပြည်သူတွေ နေတဲ့နေရာကို ကျရောက်ပေါက်ကွဲခဲ့တယ်လို့ သိရပါတယ်။ လက်နက်ကြီးကြောင့် အသက် ၇၀ကျော်အရွယ်အဘွားအိုတစ်ဦးနဲ့ အသက် ၅နှစ်အရွယ် ကလေးငယ်တို့ သေဆုံးခဲ့ပြီး ၂ဦးထိခိုက်ဒဏ်ရာတွေရရှိခဲ့တယ်လို့ ဆိုပါတယ်။
Public Service Announcement
“မုံရွာနယ်ထဲက စစ်ဘေးရှောင်တွေနေတဲ့နေရာပါ။ သေတဲ့သူတွေကလည်း စစ်ရှောင်နေကြတဲ့သူတွေ”လို့ ဒေသခံတစ်ဦးက ပြောပါတယ်။
ဒီရက်ပိုင်းအတွင်း မည်သည့်သတင်းမျှမထွက်ဘဲ စစ်တပ်က မုံရွာမြို့နယ်နဲ့ ချောင်းဦးမြို့နယ်တို့ကို လေကြောင်းတိုက်ခိုက်တာ၊ လက်နက်ကြီးပစ်တာတွေ ဆက်တိုက်ပြုလုပ်နေတယ်လို့ ဒေသခံတွေက ပြောပါတယ်။
စစ်တပ်ရဲ့ လေကြောင်းနဲ့ လက်နက်ကြီးပစ်ခတ်တိုက်ခိုက်မှုတွေကြောင့် တပတ်အတွင်း အရပ်သားပြည်သူ ၁၅ဦးထက်မနည်း သေဆုံးခဲ့တယ်လို့ သိရပါတယ်။
