မိုးမိတ်မြို့နယ်ကို စစ်ကောင်စီ လေကြောင်းတိုက်ခိုက်၍ ကလေးတစ်ဦးအပါအ၀င် သုံးဦး‌သေဆုံး၊ ခုနစ်ဦး ဒဏ်ရာရ

ကဖေး/People’s Spring

ရှမ်းပြည်နယ်မြောက်ပိုင်း၊ မိုးမိတ်မြို့နယ်ကို စစ်ကောင်စီ လေကြောင်းမှ ဗုံးကြဲတိုက်ခိုက်၍ ကလေးတစ်ဦးအပါအ၀င် ဒေသခံသုံးဦး‌ သေဆုံးပြီး ခုနစ်ဦး ဒဏ်ရာရရှိခဲ့သည်။

မိုးမိတ်မြို့နယ်၊ ဝဲဘောင်းကျေးရွာကို ဖေဖော်ဝါရီ ၂၀ရက် ည ၈ နာရီခွဲခန့်တွင် ဂျက်ဖိုက်တာဖြင့် ပေါင် ၅၀၀ ဗုံးနှစ်ကြဲချခြင်းဟု ဒေသခံတစ်ဦးက ပြောသည်။

” ကလေးတွေပါသေဆုံးတာ။ ဒီမှာက ဘုန်းကြီးကျောင်းပြန်လည်တည်ဆောက်ရေးအကြောင်းပြုပြီး အသံချဲ့စက်တွေ ဖွင့်နေတယ်။ အဲဒီလိုဆိုတော့ လေယာဉ်ပျံသံမကြားရဘူး။ အဲဒီအခြေအနေတွေကိုထိန်းသိမ်းမှုလိုတယ်လေ” ဟု ၎င်းက ပြောသည်။

Public Service Announcement

အဆိုပါတိုက်ခိုက်မှုကြောင့် (၈)နှစ်အ၇ွယ် မထက်မြတ်နိုး၊ (၂၃)နှစ်အရွယ် မမေဇင်ထက် နှင့်(၃၀)အရွယ် ကိုဇော်မင်းလွန်တို့ သေဆုံးခဲ့ပြီး ခုနစ်ဦး ထိခိုက်ဒဏ်ရာရရှိခဲ့ကြောင်း တအာင်းအမျိုးသားလွတ်မြောက်ရေးတပ်မတော်(TNLA)ကယနေ့(ဖေဖော်ဝါရီ ၂၂ရက်)တွင် ထုတ်ပြန်သည်။

မိုးမိတ်မြို့ကို ၂၀၂၄ ဇူလိုင် ၃၁ရက်တွင်TNLAနှင့် ပူးပေါင်းတပ်များက တိုက်ခိုက်သိမ်းယူခဲ့သည်။

တိုက်ပွဲအတွင်း စစ်ကောင်စီ၏ လေကြောင်းတိုက်ခိုက်မှုကြောင့် မြို့ပေါ်ရပ်ကွက်မှ နေအိမ်များ ပျက်စီးခဲ့သလို အရပ်သားသေဆုံးမှုများလည်းရှိခဲ့သည်။ မြို့အုပ်ချုပ်ရေးကို ပူးပေါင်းတပ်ဖွဲ့များက စီမံနေသည်။

TNLAနှင့် စစ်ကောင်စီသည် တရုတ်အစိုးရ၏တိုက်တွန်းမှုဖြင့် တရုတ်နိုင်ငံ၊ ကူမင်းမြို့တွင် ဖေဖော်ဝါရီ ၁၆ရက်နှင့် ၁၇ရက်တို့တွင် တွေ့ဆုံဆွေးနွေးခဲ့ပြီး ဆွေးနွေးမှုအဆင်မပြေဘဲ ရပ်တန့်ခဲ့သည်။ ဆွေးနွေးပွဲမစမီနှင့် ဆွေးနွေးပွဲကျင်းပနေစဉ်တွင်လည်း TNLA ထိန်းချုပ်ထားသည့် နောင်ချိုမြို့ကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့သည်။

တွေ့ဆုံဆွေးနွေးမှုပြုလုပ်ခဲ့သည့် ဖေဖော်ဝါရီ ၁၆ရက်မှ ယနေ့ (ဖေဖော်ဝါရီ၂၂ရက်)အထိ လက်နက်ကြီးနှင့် လေကြောင်း အသုံးပြုပစ်ခတ်တိုက်ခိုက်မှုကြောင့် တအာင်းပြည်အတွင်းရှိ ကလေးတစ်ဦးအပါအ၀င် အရပ်သား ခြောက်ဦးသေဆုံးခဲ့ကြောင်း၊ ကလေးတစ်ဦးအပါအ၀င် အရပ်သား ၁၅ဦး ဒဏ်ရာရခဲ့သည်ဟု TNLAက သတင်းထုတ်ပြန်ထားသည်။

(မိုးမိတ်မြို့နယ်၊ ဝဲဘောင်းကျေးရွာအား စစ်ကောင်စီတပ်လေကြောင်းတိုက်ခိုက်မှုကြောင့် နေအိမ်များ ပျက်စီးနေစဉ်။ ဓာတ်ပုံ – TNLA)