နိုင်ပကောင်း/People’s Spring
ကရင်ပြည်နယ်၊ မြဝတီမြို့နယ်ထဲ တရားမဝင် ဝင်ရောက်လာတဲ့ နိုင်ငံခြားသား ၂,၀၀၀ ကျော်စစ်ဆေးတွေ့ရှိရပြီး ၆၀၀ ကျော်ကို တော့ ထိုင်းကနေ တဆင့် သက်ဆိုင်ရာ နိုင်ငံတွေဆီ လွှဲပြောင်းပေးခဲ့တယ်လို့ အာဏာသိမ်းစစ်ကောင်စီက သတင်းဖော်ပြပါတယ်။
ဇန်နဝါရီလ ၃၀ ရက်ကနေ ဖေဖော်ဝါရီ ၂၃ ရက်အထိ တရားမဝင် နိုင်ငံခြားသား ၂,၂၀၀ ဦးကို စစ်ဆေးဖော်ထုတ်နိုင်ပြီး အဲဒီအထဲက ၆၇၃ ဦးကို ထိုင်ဘက်ဆီလွှဲပေးခဲ့တယ်လို့ စစ်ကောင်စီက ဆိုပါတယ်။
ကျန်တဲ့ လူ ၁,၅၀၀ ကျော်ကို သက်ဆိုင်ရာနိုင်ငံတွေဆီ လွှဲပေးဖို့ ဆက်လက် ထိန်းသိမ်းထားတယ်လို့ စစ်ကောင်စီက သတင်းဖော်ပြပါတယ်။
Public Service Announcement
ထိုင်း – မြန်မာနယ်စပ် မြဝတီမြို့က ကျားဖြန့် အွန်လိုင်း ငွေလိမ်ဂိုဏ်းတွေကို နှိမ်နင်းဖို့ တရုတ်နဲ့ ထိုင်းဘက်က ဖိအားပေးလာချိန်မှာ စစ်ကောင်စီ က ထုတ်ပြန်လာတာပါ။
စစ်ကောင်စီဘက်ကတော့ မြန်မာဘက်ခြမ်းက ကျားဖြန့်လုပ်ငန်းတွေဟာ KNU ထိန်းချုပ်ရာ KK Park နဲ့ BGF နယ်မြေ ရွှေကုက္ကိုလ် မြို့သစ်တို့မှာ ရှိတာလို့ စွပ်စွဲထားပါတယ်။
BGF က လည်း တရုတ်နဲ့ ထိုင်းဘက်က ဖိအားရှိလာချိန်မှာ ရွှေကုက္ကိုလ် မြို့သစ်က တရုတ်နိုင်ငံသားတွေ လုပ်ကိုင်ရာအလုပ်ရုံတွေ ၊ လူနေ အဆောင်တွေကို ဝင်စီးပြီး ဖမ်းဆီးစစ်ဆေးတာတွေ လုပ်ခဲ့ပါတယ်။
မြန်မာဘက်ခြမ်းမှာ ကျားဖြန့်လုပ်ငန်းတွေရှင်သန်တာဟာ ထိုင်းနိုင်ငံဘက်က လျှပ်စစ်မီးနဲ့လောင်စာဆီ ရရှိတာကြောင့် လို့စစ်ကောင်စီက အပြစ်ဖို့ထားပါတယ်။
အဲဒီနောက် ထိုင်းဘက်က မြန်မာဘက် နယ်စပ်မြို့တွေကို လျှပ်စစ်မီးပေးတာနဲ့လောင်စာဆီ စီးဆင်းတာကိုဖြတ်တောက်လိုက်ပါတယ်။
