ကဖေး/People’s Spring
မကွတိုင်း၊ ငဖဲမြို့နယ်အတွင်း ကပစ(၁၄)အနီးရှိ နတ်ရေကန်ဗျူဟာကုန်းစခန်းကို အာရက္ခတပ်တော်(AA)နှင့် ပူးပေါင်းတပ်များက ပိတ်ဆို့ထားပြီး စခန်းသိမ်းတိုက်ပွဲ ထိုးစစ်ဆင်နေပြီဖြစ်ကြောင်း ဒေသခံအချို့ကပြောသည်။
“AAက အလံဖြုထောင်ခိုင်းထားတာ။ မထောင်လို့ ထိုးစစ်စပြီပေါ့။ဒီဗျူဟာကိုစစ်တပ်ကအင်အားမဖြည့်နိုင်တော့ဘူး။ဘာနဲ့လာလာပစ်ချလို့ရတဲ့အနေပါ။” ဟု စစ်ရေးသတင်းရင်းမြစ်ကပြောသည်။
ခံစစ်အခိုင်အမာပြင်ဆင်ထားသော နတ်ရေကန်ဗျူဟာကုန်းကို ဖေဖော်ဝါရီလဆန်းမှစတင်တိုက်ခိုက်ခဲ့ပြီး လကုန်ပိုင်းတွင် ဝိုင်းပတ်ပိတ်ဆို့ထားသည့် အခြေအနေဖြစ်သည်။ မူလက အင်အား ၄၀၀ ခန့်ရှိသော်လည်း ယခုအခါ အင်အား ၁၀၀ခန့်သာ ရှိတော့ကြောင်း သတင်းရင်းမြစ်ကပြောသည်။
Public Service Announcement
“ထွက်ပြေးတာတွေရော ကျတာတွေရောနဲ့ အင်အား ၁၀၀ လောက်ပဲရှိတော့တယ်”ဟု စစ်ရေးသတင်းရင်းမြစ်တဦးကပြောသည်။
နတ်ရေကန်ဗျူဟာကုန်းအတွင်း ကွန်ကရစ်ဘန်ကာများ၊ ဘက်ဟိုးများဖြင့်တူးထားပြီးအခိုင်အမာဆောက်ထားသော ဗုံးခိုကျင်း၊ မိုင်းကွင်းများရှိနေပြီး လက်ရှိတိုက်ပွဲအခြေအနေသည် အနီးကပ်ဖြစ်ပွားနေ၍ စစ်ကောင်စီကလေကြောင်းမှတိုက်ခိုက်နိုင်ခြင်းမရှိတော့ကြောင်းသတင်းရရှိသည်။
“စက်တပ်လေယာဉ်လာလည်းပစ်ချခံရမှာပဲ။တိုက်ပွဲဧရိယာမှာတော့ လေကြောင်းအန္တရာယ်လုံးဝမရှိဘူး။ မြို့ခံပြည်သူတွေ၊ဒေသခံတွေကတော့ အထူးသတိထားဖို့လိုမယ်” ဟုဒေသအခြေစိုက်ကာကွယ်ရေးရဲဘော်တစ်ဦးကပြောသည်။
နတ်ရေကန်ဗျူဟာသည် ငဖဲမြို့နယ်အတွင်းရှိပြီး ပွင့်ဖြူမြို့နှင့်လည်းဆက်စပ်သည်။ အမ်း-ပဒါန်းလမ်းနှင့်လည်း ဆက်စပ်တည်ရှိသည်။ ငဖဲမြို့နယ်ရှိ စစ်လက်နက်ပစ္စည်းထုတ်စက်ရုံ ကပစ(၁၄)နှင့် ၅မိုင်ခန့်သာ ဝေးသည်။
“နတ်ရေကန်ဗျူဟာရရင် ကပစ(၁၄) ပြိုပြီ။မကြာခင်သတင်းကောင်းကြားရဖို့ရှိတယ်”ဟု စစ်ရေးသတင်းရင်းမြစ်ကပြောသည်။
AAနှင့် ပူးပေါင်းတပ်များသည် ပဲခူးတိုင်းအတွင်း ပန်းတောင်း၊ ပေါက်ခေါင်းမြို့နယ်၊ ဧရာဝတီတိုင်း သာပေါင်းမြို့နယ်၊ရေကြည်မြို့နယ်တို့မှစစ်ကောင်စီစခန်းအချို့ကိုလည်း တိုက်ခိုက်နေပြီး လက်ရှိတွင် သာပေါင်းမြို့နယ်အတွင်း တိုက်ပွဲပြင်းထန်နေသည်။
