ထိုင်းနယ်စပ်ရှိ ပူလူတူတပ်စခန်း ကို KNU ဆက်လက်တိုက်ခိုက်နေ

နိုင်ပကောင်း/People’s Spring

ထိုင်းနယ်စပ်အနီးရှိ ကရင်ပြည်နယ် ၊ လှိုင်းဘွဲ့မြို့နယ်ထဲက စစ်ကောင်စီတပ်ရဲ့ ပူလူတူ စခန်းကို KNU ဦးစီးတဲ့ ပူးပေါင်းတပ်က တိုက်ခိုက်ရာမှာ နှစ်ဖက်တိုက်ပွဲတွေ နေ့စဉ် ဖြစ်ပွားနေတယ်လို့ နယ်စပ်သတင်းရင်းမြစ်ထံကသိရပါတယ်။

ဒေါနတောင်တန်း အရှေ့ဘက်ခြမ်း ရှိ ရှမ်းရွာသစ်မြို့နဲ့ ပိုင်ကျုံမြို့နယ်ခွဲ ကြား က စစ်တပ်ရဲ့ ပူလူတူစခန်းကို ဖေဖော်ဝါရီ ၂၇ ရက်က စတင်ပြီး KNU တပ်မဟာ (၇) နဲ့ ပူးပေါင်းတပ်က တိုက်ခိုက်နေတာပါ။

တိုက်ပွဲဟာ ဒီနေ့ (မတ်လ ၂ ) ရက်အထိ ဆက်လက်ဖြစ်ပွားနေပြီး ပူလူတူ စခန်းတဝိုက်ကို စစ်ကောင်စီလေတပ်က ဗုံးကြဲ တိုက်ခိုက်မှု တွေ ထပ်မံ ပြုလုပ်လာတယ်လို့ နယ်စပ် ရှိသတင်းရင်းမြစ်က ပြောပါတယ်။

Public Service Announcement

ပူလူတူ တပ်စခန်း ဟာ KNU တပ်မဟာ (၇) နယ်မြေမှာ ရှိပြီး ထိုင်းနိုင်ငံ တာ့ခ်ခရိုင်၊ တာ့ဆောင့်ယန်းမြို့ ၊ မဲ့အူဆူရွာနဲ့နီးစပ်ပါတယ်။

တိုက်ပွဲတွေကြောင့် မြန်မာဘက်ကနေ နယ်စပ်မျဉ်းကို ဖြတ်ကျော်ပြီး တာ့ဆောင့်ယန်းမြို့ထဲ ဝင်ရောက်တိမ်းရှောင်ရသူ ပြည်သူ ၅၀၀ ကျော်ရှိပြီလို့ ထိုင်းအာဏာပိုင်တွေက သတင်းထုတ်ပြန်ထားပါတယ်။

KNU တပ်မဟာ (၇ ) နယ်မြေမှာ ၂၀၂၄ ခုနှစ် နှစ်လယ်ပိုင်းကစတင်ပြီး KNU နဲ့ စစ်ကောင်စီတပ်ကြား တိုက်ပွဲတွေ ဖြစ်ပွားခဲ့ပြီး နှစ်ကုန်ပိုင်းမှာတော့ ယခင် ဌာနချုပ်နေရာဟောင်း မာနယ်ပလောဒေသကို KNU က ပြန်လည်သိမ်းယူနိုင်ခဲ့ပါတယ်။

မာနယ်ပလောကို လက်လွှတ်လိုက်ရတဲ့ စစ်ကောင်စီတပ်ဘက်ကလည်း KNU တပ်မဟာ (၇) နယ်မြေ ထဲ လေကြောင်းကနေ ထောက်လှမ်းတာ ၊ ဗုံးကြဲ တိုက်ခိုက်တာအပြင် စစ်အင်အားဖြည့်တင်းတာတွေပါ ပြုလုပ်နေတယ်လို့သိရပါတယ်။

တချိန်တည်းမှာပဲ လက်ရှိမှာဆိုရင် KNU တပ်မဟာ (၇) နဲ့ နယ်မြေချင်းထိစပ်နေတဲ့ တပ်မဟာ (၆) နယ်မြေ ကော့ကရိတ် ၊ ကျုံးဒိုးမြို့တဝိုက် ၊ တပ်မဟာ (၅) နယ်မြေ ကမမောင်းမြို့ဝန်းကျင်မှာ တိုက်ပွဲတွေ ဆက်ဖြစ်နေပါတယ်။