ဆိုင်းမင်း/People’s Spring
မန္တလေးမြို့ ၊ ပုသိမ်ကြီးမြို့နယ်အတွင်းရှိ တောင်သူတွေအားထားရတဲ့ ကျောက်မီးချောင်းမကြီးရဲ့ ရေပြွန်ပေါက်တွေကနေရေလွှတ်မပေးတဲ့အတွက် မိုးစပါးမစိုက်ပျိုးနိုင်ဖြစ်နေတယ်လို့ စပါးစိုက်တောင်သူတွေက ပြောပါတယ်။
ပြီးခဲ့တဲ့ဖေဖော် ဝါရီလလယ်က မိုးကြို စိုက်ပျိုးချိန်ဖြစ်ပေမယ့် စစ်ကောင်စီ ထိန်းချုပ်ထားတဲ့ဆည်မြောင်းဦးစီးဌာနက ရေပြွန်ပေါက်တွေကို ရေဖွင့်မပေးလို့ အခက်ကြုံနေရပါတယ်။
“ဆည်တော်ကြီးကလွှတ်တဲ့ ကျောက်မီးချောင်းမကြီးထဲမှာ ရေကရှိတယ်၊ လယ်တွေထဲဝင်မယ့် မြောင်းတွေပိတ်ထားတော့ ရေမရလို့ စပါးစိုက်မရဖြစ်နေတာ” လို့ ငွေတောင်ကျေးရွာက တောင်သူ တစ်ဦးကပြောပါတယ်။
Public Service Announcement
ရေမရတဲ့အတွက် မိုးကြိုစပါးအပြင် ရက်၁၀၀စပါးပါ မစိုက်ပျိုးနိုင်ဖြစ်နေတယ်လို့ သိရပါတယ်။
ရှင်တော်ကုန်း၊ကျောက်မီး၊ ငွေတောင်၊ သုံးအိမ်၊ မင်းကန်၊ လက်ကောင်း၊ လက်သစ်၊ ရေကြည်၊တောတွင်၊ရေကြည်၊တံတိုင်းရှည်၊ ကံကြီး၊ ရွာသစ်ကလေးစတဲ့ကျေးရွာတွေဟာ ကျောက်မီးချောင်းမကြီးကိုရောက်လာတဲ့ ဆည်ရေကိုမှီတည်စိုက်ပျိုးနေရတာဖြစ်ပါတယ်။
ပြီးခဲ့တဲ့နှစ် သြဂုတ်လပိုင်းကလည်း စပါးစိုက်ပျိုးချိန် ရေလွှတ်မပေးတဲ့အတွက် တောင်သူတွေအခက်ကြုံခဲ့ရပါသေးတယ်။
ပုသိမ်ကြီးမြို့နယ်အထွေထွေအုပ်ချုပ်ရေးဦးစီးဌာန ရဲ့ ၂၀၁၈ခုနှစ် စာရင်းအရ မြို့နယ်အတွင်း လယ်မြေ ၂၇,၄၁၃ ဧက ရှိတယ်လို့ ထုတ်ပြန်ထားပါတယ်။
