မတ်-၁၄၊၂၀၂၆။ဇေအောင်/People’s Spring
စစ်ကိုင်းတိုင်း၊ ရေဦးမြို့နယ်က ကျေးရွာတွေမှာ ဆည်ရေမရလို့ ဒီနှစ် နွေစပါးစိုက်ပျိုးနိုင်ခြင်းမရှိကြောင်း ဒေသခံတောင်သူအချို့က ပြောပါတယ်။
ယခုစိုက်ပျိုးချိန်ဖြစ်တဲ့ နွေစပါးရာသီမှာ ရေဦးမြို့နယ်ကို ရေပေးနေတဲ့ ကန့်ဘလူမြို့နယ်က ကင်းတပ်ရေလွှဲတမံ၊ ကာဘိုးဆည်၊ သဖန်းဆိပ်ဆည်တို့က ရေပေးဝေမှု လျော့နည်းနေတာကြောင့် နွေစပါးစိုက်ပျိုးနိုင်ခြင်းမရှိကြောင်း ရေဦးမြို့နယ်ကျေးရွာတစ်ရွာမှ တောင်သူတစ်ဦးက ပြောပါတယ်။
“ဒီနှစ်ကလုံးဝမပေးတော့ဘူးတဲ့။ လက်တံထဲကို ရေရောက်မလာဘူး။ကာဘိုးဆည်ကလည်း ဆည်ရေမလုံလောက်လို့မပေးနိုင်ဘူး။ ကာဘိုးက တစ်ဝက်လောက်တော့လာတယ်။ ဒါပေမယ့် နွားရေ သုံးရေလောက်ပဲ စိုက်မရဘူး”လို့ တောင်သူတစ်ဦးက ပြောပါတယ်။
Public Service Announcement
အချို့က ရေသွင်းစိုက်ပျိုးကြပေမဲ့ ဒီဇယ်ဆီဈေးနှုန်း မြင့်တက်နေတာတွေကြောင့် ရေတင်စိုက်ပျိုးရတဲ့ တောင်သူတွေအတွက် ထုတ်လုပ်မှုစရိတ် အလွန်ကြီးမြင့်နေတယ်လို့ ဒေသခံတွေက ပြောပါတယ်။
“ရေတင်စိုက်ရတယ်။ ဆီဖိုးတော့ ပိုကုန်တာပေါ့။ရေဝင်တောတွေရေမဝင်တာ နှစ်ချီနေပြီ။ ကာဘိုးဆယ်ကနေ လွှတ်တဲ့ရေ အထက်ကနေ ပိတ်ပြီး အရင်လို စည်းကမ်းမရှိတော့ဘဲ အပေါ်က ရေဖျတ်ယူနေကြတာ။ အောက်ဘက်လယ်တွေ ရေ မရောက်တော့တာ။”လို့ ရွှေဘိုခရိုင်အတွင်းက ဒေသခံတစ်ဦးက ပြောပါတယ်။
ဒါ့အပြင် ဆည်တွေအနီးမှာလည်း မကြာခဏ တိုက်ပွဲတွေဖြစ်ပွားနေတာကြောင့် ရေပေးဝေရေးလုပ်ငန်းတွေမှာလည်း နှောင့်နှေးကြန့်ကြာမှုတွေ ဖြစ်ပေါ်နေတယ်လို့ ဒေသခံတွေက ပြောပါတယ်။
ရေဦးမြို့နယ်မှာ ယခင်က နွေစပါးဧက သောင်းချီ စိုက်ပျိုးလေ့ရှိကြောင်း သိရပါတယ်။
