ကရင်အမျိုးသားအစည်းအရုံး(KNU) ညောင်လေးပင်ခရိုင် မုန်း(မူး)မြို့နယ်ကို စစ်ကောင်စီ လေကြောင်း တိုက်ခိုက်ခဲ့ရာ ပြည်သူ သုံးဦး သေဆုံးပြီး နှစ်ဦး ဒဏ်ရာရရှိခဲ့ကြောင်း KNU ဗဟိုက သတင်းထုတ်ပြန်သည်။
မတ်လ ၆ရက်က စစ်ကောင်စီတပ်၏ တိုက်လေယာဉ်သည် မုန်းမြို့နယ် ကျောက်ကြီးပေါက်ကျေးရွာအတွင်း ဗုံးကြဲခဲ့ရာ (၆၃)နှစ် အရွယ် အမျိုးသမီးတစ်ဦး သေဆုံးကာ (၁၅)နှစ်အရွယ် အပါအဝင် မိန်းကလေး နှစ်ဦး ဒဏ်ရာရရှိခဲ့ဟု ဖော်ပြသည်။
ယင်းနေ့၌ပင် စစ်ကောင်စီက မကျည်းတောကျေးရွာအား လေကြောင်းတိုက်ခိုက်ခဲ့ရာ အသက် ၅၃နှစ်အရွယ် အမျိုးသမီးတစ်ဦးနှင့် အသက် ၅၅ နှစ်အရွယ် အမျိုးသား တစ်ဦး သေဆုံးခဲ့ကြောင်း အသိပေးသည်။
Public Service Announcement
စစ်ကောင်စီ၏ လေကြောင်း တိုက်ခိုက်မှုကြောင့် ပြည်သူလူထု နေအိမ်ပျက်စီးမှုများလည်း ရှိခဲ့သည်။
ကျောက်ကြီးမြို့နယ် အင်းနက်ကျေးရွာကိုလည်း စစ်ကောင်စီက မတ်လ ၅ရက်တွင် လေကြောင်း တိုက်ခိုက်ခဲ့ရာ ထိခိုက်မှုမရှိဟုဆိုသည်။ မတ်လ ၆ရက် ညပိုင်းတွင် ရေးစီလော်(နရွဲပင်)ရွာကိုစစ်ကောင်စီ လေကြောင်းတိုက်ခိုက်ခဲ့ရာ နေအိမ် ပျက်စီးခဲ့ကြောင်း KNUက ထုတ်ပြန်သည်။
စစ်ကောင်စီတပ်သည် ကျောက်ကြီးမြို့နယ် အပါအဝင် KNU အုပ်ချုပ်နယ်မြေများရှိ ပြည်သူလူထုနေထိုင်ရာ နေရာများကို လေကြောင်း၊ ဒရုန်း၊လက်နက်ကြီးများဖြင့် ပစ်ခတ်တိုက်ခိုက်မှုများ ဆက်တိုက်ပြုလုပ်လျက်ရှိရာ ပြည်သူထိခိုက်သေဆုံးမှုများ မကြာခဏ ဖြစ်ပေါ်လျက်ရှိသည်။
စစ်ကောင်စီတပ်မှ ပြည်သူလူထုအပေါ် ပစ်မှတ်ထား တိုက်ခိုက်မှုများ ရပ်တန့်နိုင်ရေး ထိရောက်သည့် အရေးယူမှုများ လုပ်ဆောင်ပေးရန် ကျောက်ကြီးမြို့နယ် ကရင်အရေးပေါ် ကူညီကယ်ဆယ်ရေးကော်မတီက ပြည်တွင်း၊ ပြည်ပ အဖွဲ့အစည်းများနှင့် နိုင်ငံတကာထံ တောင်းဆိုထားသည်။
