ဆိုင်းမင်း/People’s Spring
ရှမ်းပြည်နယ် မြောက်ပိုင်း၊ သီပေါမြို့နယ်ထဲက တုံစင့်ရွာမှာ တောင်ယာသွားရောက်လုပ်ကိုင်တဲ့အမျိုးသားတစ်ဦး မတ်လ ၈ ရက်က မိုင်းနင်းမိပြီး နေရာမှာတင်သေဆုံးသွားတယ်လို့ သီပေါမြို့ခံ ကူညီရေးအဖွဲ့ ထံကသိရပါတယ်။
အသက် ၅၆ နှစ်အရွယ် ဦးစိုင်းဖောင်းဟာ ရွာရဲ့ မြောက်ပိုင်း တောထဲမှာ မိုင်းနင်းမိတာဖြစ်ပြီး ရုပ်အလောင်းကို ကူညီရေးအဖွဲ့က သွားရောက်သယ်ထုတ်ပေးခဲ့ရတာပါ။
” မိုင်းတွေရှိတဲ့တောထဲကို အသက်နဲ့ရင်းပြီး ကူညီရတာပါ” လို့ ကူညီကယ်ဆယ်ရေးမှာပါဝင်သူတစ်ဦးကပြောပါတယ်။
Public Service Announcement
သီပေါမြို့နယ် မှာ ၁၀၂၇ စစ်ဆင်ရေး ဒုတိယပိုင်းအတွင်း စစ်ကောင်စီတပ်နဲ့ TNLA ပူးပေါင်းတပ်ကြားတိုက်ပွဲတွေ ပြင်းပြင်းထန်ထန်ဖြစ်ပွားခဲ့တာပါ။
အဲဒီနောက် မြို့ကနေ စစ်ကောင်စီတပ်ကို တိုက်ထုတ်ပြီး သီပေါမြို့ကို TNLA က သိမ်းယူထိန်းချုပ်ထားတာဖြစ်ပါတယ်။
သီပေါမြို့နယ်မှာ ပြီးခဲ့တဲ့ ဇန်နဝါရီလအတွင်း မန်ကောင်းကျေးရွာ နဲ့ စံဖိတ်ကျေးရွာတို့မှာ အရပ်သား အမျိုးသား ၂ ဦး မိုင်းနင်းမိပြီး ထိခိုက်ဒဏ်ရာရခဲ့တဲ့ဖြစ်စဉ် ရှိထားပါတယ်။
ကုလသမဂ္ဂရဲ့စာရင်းတွေအရ ပြီးခဲ့တဲ့ ၂၀၂၄ ခုနှစ်အတွင်း မြေမြှုပ်မိုင်းနဲ့ ပေါက်ကွဲစေတတ်တဲ့ ပစ္စည်းတွေကြောင့် ထိခိုက် ရသူဦးရေဟာ မြန်မာတစ်နိုင်ငံလုံးအတိုင်းအတာ အရ ၁,၀၈၂ ဦး ရှိခဲ့ပါတယ်။
ထိခိုက်ဒဏ်ရာရသူအများဆုံးဟာရှမ်းပြည်နယ်က ဖြစ်ပြီး စစ်ကိုင်းတိုင်း နဲ့ ရခိုင်ပြည်နယ်တို့က ဒုတိယနဲ့ တတိယနေရာမှာ ရှိနေပါတယ်။
