မေ-၂၄၊၂၀၂၆။ဇော်ရမ်း/People’s Spring
ရှမ်းပြည်နယ်မြောက်ပိုင်း၊ သီပေါမြို့အနီး တနေရာ ဒီနေ့ မေလ ၂၄ရက် ညနေပိုင်းက ရှော့တိုက်ဒုန်းနဲ့ပစ်ခတ်ခံရပြီး ပြင်းထန်တဲ့ပေါက်ကွဲမှု ၂ကြိမ်ဖြစ်ခဲ့တယ်လို့ ဒေသခံတွေက ပြောပါတယ်။
ညနေ ၆နာရီခန့်မှာ ပစ်ခတ်ခံရတာဖြစ်ပြီး ပေါက်ကွဲသံတွေကို မြို့ပေါ်က ကျယ်လောင်စွာကြားရတယ်လို့ ဆိုပါတယ်။
သီပေါမြို့ကနေ စစ်တပ်ရွေးကောက်ပွဲဝင်ရောက်ယှဉ်ပြိုင်ပြီး လွှတ်တော်အမတ်ဖြစ်လာသူက ” ရှော့တိုက်ဒုံးအပစ်ခံရ။ အားလုံးဘေးကင်းကြပါသည်”လို့ သူ့ရဲ့ လူမှုကွန်ရက်မှာ ရေးထားပါတယ်။
Public Service Announcement
မြို့ပြင်အနီး ကျရောက်ပေါက်ကွဲခဲ့တယ်လို့ ၎င်းက ဆိုပါတယ်။
သီပေါမြို့ဟာ တရုတ်နယ်စပ်ကုန်သွယ်ရေးလမ်းကြောင်းပေါ်က ကျောက်မဲနဲ့ လားရှိုးမြို့ကြားမှာရှိပါတယ်။တအာင်းတပ်မတော် TNLAဟာ ၂၀၂၃အောက်တိုဘာ၂၇ရက်ကစတင်တဲ့ ၁၀၂၇ စစ်ဆင်ရေးနဲ့အတူ သိမ်းယူခဲ့တဲ့ မြို့တွေထဲမှာ သီပေါမြို့ပါခဲ့ပါတယ်။
၂၀၂၅ အောက်တိုဘာမှာတော့ တရုတ်အစိုးရဖိအားကြောင့် TNLAက ဆုတ်ခွာသွားသလို စစ်တပ်က ပြန်လည်ထိန်းချုပ်ခဲ့ပါတယ်။
ဒါပေမယ့် စစ်တပ်အုပ်ချုပ်ရေးယန္တရားစနစ်တကျ မလည်ပတ်နိုင်သေးသလို စစ်တပ်ဟာ စိုးရိမ်မှုတွေရှိနေတယ်လို့သိရပါတယ်။ မတ်လ ၁၈ရက်ကလည်း သီပေါမြို့နယ် နောင်အိန်ရွာအနီးကို ရှော့တိုက်ဒုန်း ၂လုံးကျရောက်ပေါက်ကွဲခဲ့ပါတယ်။
သီပေါမြို့ပေါ်ကို စစ်တပ်ကထိန်းချုပ်ထားပေမယ့် မြို့ပေါ်ရပ်ကွက်ကိုပဲဖြစ်သွားတဲ့ ဒုဌဝတီမြစ်ကူးတံတားရဲ့ တစ်ဖက်ခြမ်းဖြစ်တဲ့ သီပေါ-လားရှိုးလမ်းပိုင်းကို ကိုးကန့်တပ်မတော် MNDAA က ထိန်းချုပ်ထားပါတယ်။ တံတားရဲ့ တခြမ်းကို စစ်တပ်က ထိန်းချုပ်ထားပြီး ကျန်တခြမ်းကို MNDAA က ထိန်းချုပ်ထားသလို နှစ်ဖက်စလုံးကလည်း တံတားပိတ်ထားပါတယ်။
သီပေါမြို့ပြင်ဘက်နဲ့ မြို့နယ်အတွင်း ကျေးရွာတွေမှာလည်း ရှမ်းတပ် SSPPနဲ့ MNDAA တို့ တပ်စွဲထားပြန်ပါတယ်။တရုတ်အစိုးရဖိအားကြောင့် MNDAAက ပြန်ပေးပြီး စစ်တပ်ထိန်းချုပ်ထားတဲ့ လားရှိုးမြို့မှာလည်း ပြီးခဲ့တဲ့ ဧပြီ ၂၃ရက် ဖေဖော်ဝါရီ ၇ရက်နဲ့ ၁၁ရက်မှာ ရှော့တိုက်ဒုန်းနဲ့ ပစ်ခတ်မှု လေးကြိမ်ဖြစ်ပွားခဲ့ပါတယ်။
