မတ်-၆၊၂၀၂၆။ဇော်ရမ်း/People’s Spring
ရှမ်းပြည်နယ်မြောက်ပိုင်း သီပေါမြို့မှာ တောမီးကြောင့် မြေမြှုပ်မိုင်းပေါက်ကွဲရာက ထွက်ပေါ်လာတဲ့ ပေါက်ကွဲသံတွေကို စစ်ကောင်စီက ထိန့်လန့်ပြီး သေနတ်နဲ့ ရမ်းသမ်းပစ်ခတ်ခဲ့တယ်လို့ ဒေသခံတွေက ပြောတယ်။
မတ်လ ၄ရက်က သီပေါမြို့ပြင်ဘက်မှာ တောမီးလောင်နေစဉ် မိုင်းပေါက်ကွဲသံနဲ့ ပစ်ခတ်သံတွေ ထွက်လာတာပါ။ ဒေသခံတွေက တိုက်ပွဲဖြစ်တယ်လို့ ထင်သလို စစ်ကောင်စီတပ်တွေကလည်း သူတို့ကို လာရောက်ပစ်ခတ် တယ်ထင်ပြီး လက်နက်ကြီးနဲ့ပါ ရန်းသမ်းပစ်ခဲ့တယ်လို့ ဒေသခံတစ်ဦးက ပြောပါတယ်။
” စစချင်းတော့ လန့်ကုန်တာ။ ကျတော်တို့ထက် စစ်တပ်က ပိုလန့်တာ။ အတွဲလိုက်ကိုပစ်တော့တာပဲ။ ပြီးမှ သတင်း ဝင်တာက တောမီးလောင်လို့ မိုင်းတွေကွဲတာ”လို့ မြို့ခံတစ်ဦးက ပြောပါတယ်။
Public Service Announcement
သီပေါမြို့က စစ်ကောင်စီရွေးကောက်ပွဲဝင်ခဲ့တဲ့ လွှတ်တော်ကိုယ်စားလှယ်ကလည်း တောမီးလောင်လို့ မြေမြှုပ်မိုင်းပေါက်ချိန်မှာ စစ်တပ်ကဟန့်တဲ့သဘောနဲ သေနတ်ဖောက်ခဲ့တယ်လို့ လူမှုကွန်ရက်မှာ အသိပေးထားပါတယ်။
တအာင်းတပ်မတော် TNLAဟာ ၂၀၂၃ အောက်တိုဘာ ၂၇ရက်ကစတင်တဲ့ ၁၀၂၇ စစ်ဆင်ရေးနဲ့အတူ သိမ်းယူခဲ့တဲ့ မြို့တွေထဲမှာ သီပေါ်မြို့ပါခဲ့ပါတယ်။
၂၀၂၅ အောက်တိုဘာမှာတော့ တရုတ်အစိုးရဖိအားကြောင့် TNLAက ဆုတ်ခွာသွားသလို စစ်တပ်က ပြန်လည်း ထိန်းချုပ်ခဲ့ပါတယ်။ ဒါပေမယ့် ၅လခန့်ကြာတဲ့အထိ စစ်ကောင်စီအုပ်ချုပ်ရေးယန္တရားစနစ်တကျ မလည်ပတ်နိုင်သေးပါဘူး။
၁၀၂၇ စစ်ဆင်ရေးကာလနဲ့ နောက်ပိုင်းကာလတွေအထိ ဒေသခံတွေမှာ မိုင်းကြောင့် ထိခိုက်သေဆုံးမှုတွေရှိခဲ့ပါတယ်။
စစ်တပ်က မြို့ဘေးပတ်ဝန်းကျင်က မိုင်းတွေကိုမရှင်းသေးသလို ၎င်းတို့တပ်စွဲထားတဲ့ နေရာတွေအနီးမှာလည်း မိုင်းတွေထောင်ထားတယ်လို့ ဒေသခံတွေကပြောပါတယ်။ သီပေါမြို့ထဲမှာ စစ်ကောင်စီက တပ်စွဲထားပြီး မြို့ပြင်ဘက်နဲ့ မြို့နယ်အတွင်း ကျေးရွာတွေမှာ ရှမ်းတပ် SSPP နဲ့ ကိုးကန့်တပ် MNDAA တို့ တပ်စွဲထားပါတယ်။
