ကရင်နီပြည်တွင် နွေကာလ သောက်သုံးရေရှားပါးမှု ယခင်နှစ်များထက် ဆိုးရွားနေပြီး ဝိုင်းဝန်းလှူဒါန်းပေးကြရန် အရပ်ဘက်ကူညီရေးအဖွဲ့များက တိုက်တွန်းထားသည်။
လွိုင်ကော်မြို့အပါအဝင် ကရင်နီပြည်မှ မြို့နယ်များအားလုံး ပြီးခဲ့သည့်ဇန်နဝါရီလမှစတင်၍ သောက်သုံးရေရှားပါးမှုပြဿနာ ရင်ဆိုင်ခဲ့ရပြီး ယခု မတ်လဆန်း၌ အခြေအနေပိုဆိုးနေသည်ဟု ဒေသခံများကပြောသည်။
“ဘယ်မြို့မှ စစ်ရေးငြိမ်မနေဘူး။ နဂိုကတည်းက သောက်ရေသုံးရေရှားပါးတာမို့ ဒီနှစ်က အခြေအနေပိုဆိုးနေတယ်။ အလှူရှင်တွေလှူမှ သက်သာရာရမယ့်အနေအထားဗျ။ အဲ့ဒါလေး အကူအညီတောင်းချင်တယ်” ဟု ဒီးမော့ဆိုမြို့တွင် နေထိုင်သူတစ်ဦးကပြောသည်။
Public Service Announcement
နွေကာလ ရောက်လာသည့်နှင့်အမျှ စစ်ရှောင်လူထုသည် ရေရှားပါးမှုကြောင့် ဝေးလံသည့်နေရာတွင် သောက်သုံးရေအတွက် ခက်ခဲစွာ သယ်ယူကြရပြီး အကူအညီများ လိုအပ်နေသည်ဟုကယားလီဖုလူငယ်အဖွဲ့က အသိပေးထားသည်။
ကရင်နီပြည်သည် ပြီးခဲ့သည့် ၂၀၂၄ ခုနှစ် မိုးတွင်းကာလကလည်း ကြီးမားသည့် ရေဘေးကြုံတွေ့ခဲ့ပြီး ဂေဟစနစ်နှင့် ရေတွင်းရေကန်များ ပျက်စီးခြင်းတို့ရှိခဲ့ကြောင်း လူမှုကူညီရေးအဖွဲ့များကပြောသည်။
နွေကာလသည် လာမည့် ဧပြီနှင့် မေလအထိ ဆက်ရှိနေသေး၍ သောက်သုံးရေရှားပါးမှုပြဿနာကို နှစ်လခန့်အထိ ရင်ဆိုင်ရနိုင်သည်ဟု ဆိုသည်။
