မန္တလေးတိုင်း၊ စဉ့်ကူးမြို့နယ်၊ လက်ပန်လှကျေးရွာ လေကြောင်းတိုက်ခိုက်မှုကြောင့် ကလေး ခြောက်ဦးအပါအဝင် ပြည်သူ၂၇ဦး သေဆုံးပြီး ၃၈ဦး ဒဏ်ရာရခဲ့သည့် စစ်ကောင်စီ ၏ ကျူးလွန်မှုများအား အပြစ်ပေးအရေးယူနိုင်ရေးအစွမ်းကုန်ဆောင်ရွက်သွားမည်ဟု အမျိုးသားညီညွတ်ရေးအစိုးရ(NUG)၏ လူ့အခွင့်အရေးဆိုင်ရာဝန်ကြီးဌာနကထုတ်ပြန်သည်။
စဉ့်ကူးမြို့နယ်၊ မိုးကုတ်-မန္တလေးကားလမ်းဘေးရှိ လက်ပန်လှကျေးရွာအာယ တိုက်ပွဲဖြစ်ပွားခြင်းမရှိဘဲ မတ်လ ၁၄ရက် ညနေ ၃နာရီခန့်တွင် စစ်ကောင်စီက လေကြောင်းမှ ဗုံးကြဲတိုက်ခိုက်ခြင်းဖြစ်သည်။
အမှတ် (၃၀၂၇) လေကြောင်းရန်ကာကွယ်ရေးတပ်ရင်း၊ တံတားဦး လေတပ်စခန်းမှ တက်လာသည့် YAK-130 ဂျက် ဖိုက်တာတို့ဖြင့် တိုက်ခိုက်ခြင်းဟု ဆိုသည်။
Public Service Announcement
အသက် (၄)လအရွယ် ကလေးငယ်တစ်ဦးအပါအဝင် ကလေးခြောက်ဦး၊ စုစုပေါင်း ပြည်သူ(၂၇)ဦး သေဆုံးပြီး ၃၈ဦး ထိခိုက်ဒဏ်ရာရကာ ပြည်သူပိုင်နေအိမ်နှစ်လုံး မီးလောင်ပြာကျခဲ့ရသည်ဟု ထုတ်ပြန်သည်။
ပြည်သူတရပ်လုံး တန်းတူညီမျှမှုရရှိရေး၊ ငြိမ်းချမ်းရေးနှင့် တရားမျှတမှုရရှိရေးတည်းဟူသော ဦးတည်ချက်များကို ခိုင်ခိုင်မာမာ လက်ကိုင်ဆွဲထား၍ အကြမ်းဖက်စစ်အုပ်စု၏ ကျူးလွန်မှုများကို အပြစ်ပေးအရေးယူနိုင်ရေး အစွမ်းကုန် တာဝန်ယူဆောင်ရွက်သွားမည်ဟု လူ့အခွင့်အရေးဆိုင်ရာဝန်ကြီးဌာနက ထုတ်ပြန်သည်။
