မတ်-၁၉၊ ၂၀၂၅။မေ/People’s Spring
မန္တလေးမြို့၊ ပြည်ကြီးတံခွန်မြို့နယ်မှာ စစ်မှုထမ်းအပတ်စဉ် (၁၁)အတွက်ဆိုပြီး မဲနှိုက်တာတွေ စတင်လုပ်နေပြီး မြို့နယ်စစ်ကောင်စီအဖွဲ့က မဲစာရင်းထဲမပါချင်ရင် ကျပ်သိန်း၁၀၀အထိ တောင်းယူတာတွေ လုပ်နေတယ်လို့ ဒေသခံတွေက ပြောပါတယ်။
ပြည်ကြီးတံခွန်မြို့နယ်၊စက်မှု (၁)၊စက်မှု(၂)နဲ့ သင်ပန်းကုန်းရပ်ကွက်တွေမှာ မတ်လဒုတိယပတ်မှာ မဲနှိုက်တာတွေ ပြုလုပ်ခဲ့တာလို့ သိရပါတယ်။
တခြားမြို့နယ်တွေမှာ အပတ်စဉ်(၁၁)ခေါ်ယူမှုသတင်းမရသေးပေမယ့် ပြည်ကြီးတံခွန်မြို့နယ်ထဲက အုပ်ချုပ်ရေးမှူးတွေက ရပ်ကွက်အလိုက် ပြည်သူတွေ ခေါ်ယူမဲနှိုက်ခဲ့တာလို့ သိရပါတယ်။
Public Service Announcement
“နှိုက်ရမယ့် မဲစာရင်းပယ်ချင်ရင် သိန်း၁၀၀ ဆိုပြီး တောင်းတယ်။ကျွန်တော့်အကိုက ၃၅သိန်းနဲ့ ပြတ်သွားတယ်”လို့ မြို့ခံလူငယ်တစ်ဦးက ပြောပါတယ်။
အဲဒီငွေကြေးဟာ အပတ်စဉ်တစ်ခုအတွက်သာ အာမခံတယ်လို့ ရပ်ကွက်ရုံးက ပြောတယ်လို့လည်း သူက ပြောပါတယ်။
တခြား ငွေပေးထားတဲ့သူတွေကိုလည်း နေ့စဉ် အရာရှိကျွေးမွေးဖို့ဆိုပြီး ဖုန်းဆက်ကာ ထပ်မံ ငွေတောင်းယူတာတွေ လုပ်လေ့ရှိတယ်လို့လည်း သိရပါတယ်။
ပြည်ကြီးတံခွန်မြို့နယ်ဟာ ပေါက်ကိုယ်တော်ပျူစောထီးနဲ့ လူမိုက်ဂိုဏ်းဆိုသူတွေ စိုးမိုးတဲ့ မြို့နယ်ဖြစ်ပြီး လမ်းသွားလာသူတွေရဲ့ ဖုန်းတွေကိုစစ်ကာ ငွေတောင်းယူလေ့ရှိတယ်လို့လည်း ဒေသခံတွေကပြောပါတယ်။
မန္တလေးသပိတ်အင်အားစုရဲ့ ကောက်ယူထားတဲ့အချက်အလက်တွေအရ မန္တလေး(၇)မြို့နယ်မှာ ၂၀၂၅ ဇန်နဝါရီ ၁ရက်ကနေ ၃၁ရက်အထိ တစ်လတာအတွင်း မတရားအဖမ်းဆီးခံရသူ လူငယ်ပေါင်း ၂၃၇ ဦးထက်မနည်း ရှိခဲ့ပါတယ်။
အဲဒီအထဲမှာ မဟာအောင်မြေမြို့နယ်က အများဆုံးဖြစ်ပြီး(၄၆)ဦးအထိ ခေါ်ယူခံခဲ့ရတယ်။ တခြားမြို့နယ်တွေကတော့ အောင်မြေသာဇံမြို့နယ်မှာ (၃၂)ဦး၊ ချမ်းအေးသာဇံမြို့နယ်မှာ (၂၇)ဦး၊ ချမ်းမြသာစည်မြို့နယ်မှာ (၃၀)ဦး၊ ပြည်ကြီးတံခွန်မြို့နယ်မှာ (၃၅)ဦး၊ ပုသိမ်ကြီးမြို့နယ်မှာ (၃၄)ဦးနဲ့ အမရပူရမြို့နယ်မှာ (၃၃)ဦးအထိ ရှိခဲ့ပါတယ်။
မြေပြင်သတင်းမီဒီယာများ အပေါ်မှာ အခြေခံပြီး စာရင်းပြုစုရခြင်းဖြစ်တာကြောင့် မြေပြင်မှာ မတရားဖမ်းဆီးခံရမှုတွေ ပိုများနိုင်တယ်လို့ မန္တလေး သပိတ်အင်အားစုက ဆိုပါတယ်။
အာဏာသိမ်းစစ်ကောင်စီတပ်ဟာ ရန်ကုန်၊ မန္တလေးအပါအဝင် သူတို့ထိန်းချုပ်ထားတဲ့ မြို့ကြီးတွေမှာ စစ်မှုထမ်းဖို့ လူငယ်အများအပြားကို ဖမ်းဆီးနေပြီး တစ်နှစ်အတွင်း လူငယ်ထောင်ချီ ဖမ်းဆီးခဲ့ရာမှာ အခုဆိုရင် စစ်မှုထမ်းအပတ်စဥ် (၁၁)ကို ရောက်ရှိနေပြီဖြစ်ပါတယ်။
ဒါပေမယ့် စစ်ကောင်စီကတော့ ပြည်သူ့စစ်မှုထမ်းအပတ်စဉ်(၁၁) သင်တန်းဖွင့်ပွဲတွေကို တိုင်းစစ်ဌာနချုပ်တွေမှာ လုပ်ခဲ့တယ်လို့ မတ်လ ၁၇ရက်က ကြေညာထားပါတယ်။
စစ်ကောင်စီဟာ နိုင်ငံအနှံ့တိုက်ပွဲဖြစ်နေတဲ့ ဒေသတွေကို စစ်မှုထမ်းတပ်သားသစ်တွေကို စေလွှတ်ပြီး ရှေ့တန်းပို့နေပါတယ်။ ဒါ့ကြောင့် သေဆုံးမှုတွေနဲ့ စစ်တပ်ကနေထွက်ပြေးပြီးတော့ တော်လှန်ရေးအဖွဲ့တွေထံ သွားရောက်ခိုလှုံသူ များပြားလာနေပါတယ်။
