နိုင်ငံတဝန်း ပြည်သူများအား အတင်းအဓမ္မ လူသစ်စုဆောင်းနေခြင်းအပါအဝင် စစ်ကောင်စီ ခေါင်းဆောင် မင်းအောင်လှိုင် လုပ်ဆောင်နေသည့် လုပ်ရပ်များ အားလုံးသည် နိုင်ငံအကျိုးအတွက် မဟုတ်ဘဲ ၎င်း မိသားစုနှင့် စစ်ခေါင်းဆောင်တစုတွက် အသုံးချနေခြင်းဖြစ်ကြောင်း ပြည်သူ့ကာကွယ်ရေးတပ်မတော်(PDF) စစ်ဆင်ရေးနယ်မြေ(၁) တောင်ပိုင်းစစ်ဒေသ၊ ဗျူဟာ ၃၃ စစ်ဆင်ရေးမှူး ရဲဘော် စောဒါးကိုက ပြောကြားသည်။
ရဲဘော်စောဒါးကို ဦးဆောင်သည့် ဒေါနတပ်ရင်းသို့ ပြည်သူ့စစ်မှုထမ်း တပ်သားသစ် ၂ဦး လက်နက်နှင့် အလင်းဝင်လာမှု အခြေအနေနှင့်မေးမြန်းရာ ယခုကဲ့သို့ ပြောဆိုခြင်းဖြစ်သည်။ ဒေါနတပ်ရင်းသို့ အလင်းဝင်လာသူ စုစုပေါင်း ၆၀ ကျော်ရှိပြီး ယင်းအနက် ၂၀ကျော်သည် စစ်ကောင်စီကို ပြန်လည်တော်လှန်တိုက်ခိုက်နေကြောင်း ရဲဘော် စောဒါးကိုက ပြောသည်။
ထို့ကြောင့်ကျန်နေသည့် စစ်ကောင်စီတပ်သားများ ပြည်သူ့ဘက်သို့ ရပ်တည်ရန်လိုအပ်ကြောင်း၎င်းက တိုက်တွန်းသည်။
Public Service Announcement
“ ပြည်သူနဲ့အတူတူ ပူးပေါင်းသွားဖို့လိုအပ်တယ်။ မြို့ထဲမှာ အကြမ်းဖက်ပြီး နီးတဲ့သူကို ပြန်ပေးဆွဲ အတင်းအဓမ္မ စစ်သားစုဆောင်းနေတဲ့ဟာတွေက ဒါသည် အဖြေမဟုတ်ဘူး။ လက်ရှိ စစ်ကောင်စီ မင်းအောင်လှိုင် လုပ်နေတဲ့ဟာတွေအားလုံးက တိုင်းပြည်အတွက်လည်းမဟုတ်သလို လူမျိုးအတွက်လည်း မဟုတ်ဘူး နိုင်ငံအတွက်လည်းမဟုတ်ဘူး သူ့ကိုယ်ကျိုးအတွက်ပဲဖြစ်တယ်။ သူ့မိသားစုတစု လက်တဆုပ်စာလူတစုအတွက်ဖြစ်တာ ဖြစ်တဲ့အတွက် ကျနော်တို့တွေက ပြည်သူ့ဘက် ရပ်တည်ပြီး မြန်မြန်လေး ပြည်သူနဲ့ ပူးပေါင်း ပြီးဆက်သွားဖို့ပေါ့”ဟုဗျူဟာ ၃၃ စစ်ဆင်ရေးမှူးကဆက်ပြောသည်။
ထိုသို့ပူးပေါင်းခြင်းမပြုလုပ်ပါကအဓိပ္ပါယ်မဲ့ ပေးဆပ်မှုများနှင့် ကြုံကြရမည်ဖြစ်ကြောင်း ၎င်းက ပြောသည်။
“စစ်မှုထမ်းပြီး ပါသွားတဲ့ သူတွေအားလုံးဟာ ဘယ်နေရာ ဘယ်ဒေသမှာ သေဆုံးကျဆုံးမှန်းမသိ သားသေလည်း အမေမသိ အဲဒီလိုမျိုး အခြေအနေတွေက လက်ရှိ တော်တော်များများ ကြားနေရတယ်။ တချို့တွေက စစ်မှုထမ်း ပစတွေကို စစ်ရေးပြင်းထန်တဲ့နေရာတွေကို တောက်လျှောက်ပို့တာပေါ့။” ဟု ရဲဘော်စောဒါးကိုက ပြောသည်။
လက်ရှိတွင် စစ်ကောင်စီကအဓမ္မစစ်သားစုဆောင်းပြီးအချိန်တိုစစ်သင်တန်းပေးထားသည့် တပ်သားသစ်များကိုကရင်နီ၊ရက္ခိုင်၊ ရှမ်း ၊ကရင် စသည့် စစ်ပွဲပြင်းထန်သည့် ဒေသများသို့စေလွှတ်နေသည်။
“စစ်ပွဲအရမ်းပြင်းထန်တဲ့နေရာသေတွင်းထဲကိုတွန်းပို့သလိုပဲ။” ဟု ရဲဘော် စောဒါးကိုက ပြောသည်။
ထို့ကြောင့် ရောက်သည့်နေရာဒေသ၌ပြည်သူများ၊ တော်လှန်ရေးတပ်များကို ဆက်သွယ်ပြီး အမြန်ပူးပေါင်းကြရန် စစ်ကောင်စီတပ်သားများကို၎င်းက တိုက်တွန်းသည်။
လူသစ်စုဆောင်းခံရသူများ အပါအဝင် ပြည်သူဘက်ရပ်တည်လိုသောစစ်သားများနှင့် ရဲတပ်ဖွဲ့ဝင်များအနေဖြင့် ပြည်သူ့ကာကွယ်ရေးတပ်မတော် ဒေါနတပ်ရင်းနှင့် မဟာမိတ်ပူးပေါင်းတပ်ဖွဲ့များ ၊ နီးစပ်ရာ တော်လှန်ရေးတပ်ဖွဲ့များသို့ ချိတ်ဆက်ကာ အလင်းဝင်ရောက်နိုင်ကြောင်းလည်း ဒေါနတပ်ရင်းက အသိပေးပြီး Telegram / +66988960058 / @naingyan၊ Signal / +66988960058 / @yai.08၊ Viber / +66659905540၊ Phone / 09884896475 တို့အား ဆက်သွယ်နိုင်ကြောင်း ဖော်ပြသည်။
အမျိုးသားညီညွတ်ရေးအစိုးရ (NUG)၊တော်လှန်ရေးခေါင်းဆောင်များနှင့်တိုင်းရင်းသားတော်လှန်ရေးတပ်ဖွဲ့ ခေါင်းဆောင်များကလည်း စစ်ကောင်စီတပ်သားများ ရသည့်နည်းဖြင့် တော်လှန်ရေးတပ်ဖွဲ့များနှင့် ပူးပေါင်းရန် တိုက်တွန်းထားပြီး ယခုနှစ်တွင် စစ်ရေးအရှိန်မြှင့်တင်ရန်ရှိကြောင်း အသိပေးထားသည်။
