“ကျမအမျိုးသားက အိုးဘိုထောင်မှာရှိတာပါ။ အဆောင်တခုပြိုကျတယ်လို့ကြားရပြီးကျန်တာလုံးဝစုံစမ်းလို့မရပါဘူး” -နိုင်ကျဥ်းတဦး၏ဇနီးသည်
ဇော်ရမ်း/People’s Spring
ငလျင်ကြောင့်အိုးဘိုအကျဉ်းထောင် အဆောင်ပြိုကျမှုရှိပြီး စစ်ကောင်စီက သတင်းအမှောင်ချခံထား၍ သတင်းအတိအကျရရှိရန် ခက်ခဲနေကြောင်းမြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)က သတင်းထုတ်ပြန်သည်။
အိုးဘိုအကျဉ်းထောင် အဆောင်ပြိုကျမှုကြောင့် ထိခိုက်ဒဏ်ရာရသူနှင့် သေဆုံးမှုအခြေအနေများအား စုံစမ်းလျှက်ကြောင်း ထုတ်ပြန်ထားသည်။
Public Service Announcement
PPNM ဗဟိုကော်မတီဝင်ကိုသိုက်ထွန်းဦးက “မနေ့က လူနာတင်ကား ဆယ်စီးကျော်ဝင်သွားတယ်။ ထိခိုက်သေဆုံးမှုတွေရှိတယ်ဆိုတာပြောနိုင်တယ်။ လက်ရှိမှာအကျဉ်းထောင်ရဲ့အခြေနေကိုသတင်းမှောင်ချထားလို့ ထိခိုက်ဒဏ်ရာရရှိမှုနဲ့အဆောက်အအုံပျက်စီးမှုကို ဒီနေ့နေ့ခင်းထိ ဘာအချက်အလက်မှ ကောင်းကောင်းမရသေးဘူး။ အချက်အလက်တွေရဖို့ ကြိုးစားနေပါတယ်” ဟု ပြောသည်။
မြစ်သားမြို့နယ်မှ နိုင်ငံရေးအကျဉ်းသားတစ်ဦး၏ အမျိုးသမီးက “ကျမအမျိုးသားက အိုးဘိုထောင်မှာရှိတာပါ။ အဆောင်တခုပြိုကျတယ်လို့ကြားရပြီးကျန်တာလုံးဝစုံစမ်းလို့မရပါဘူး။တွေ့ခွင့်လည်းမရပါဘူး။ဘယ်လိုကြိုးစားကြိုးစားအချိတ်အဆက်မရဘူးဖြစ်နေပါတယ်”ဟုပြောသည်။
ငလျင်ကြောင့်အကျဉ်းထောင်ထိခိုက်မှုများကိုစုံစမ်းရာ ဒိုက်ဦးထောင်၊ညောင်ဦးထောင်၊ပုသိမ်ထောင်၊မိတ္ထီလာထောင်၊သာယာဝတီထောင်၊အင်းစိန်ထောင်၊သရက်ထောင်၊မအူပင်ထောင်၊တောင်ငူထောင်၊ကလေးထောင် တို့တွင် နိုင်ငံရေးအကျဉ်းသား၊အကျဉ်းသူများအပါအဝင် အကျဉ်းသားအားလုံး ထိခိုက်မှုမရှိကြောင်း ကနဦးသိရှိထားသည်ဟု PPNMက ထုတ်ပြန်ထားသည်။
