ငလျင်ကြောင့် လူသေဆုံးမှုများသော အင်းလေးဒေသကို စစ်ကောင်စီအဖွဲ့က ဒရုန်း၊လက်နက်ကြီးများဖြင့် နှစ်ရက်ဆက် ပစ်ခတ်နေ

ဧပြီ ၁၊၂၀၂၅။ရဲခေါင်/People’s Spring

ငလျင်ဒဏ်ကြောင့် လူသေဆုံးမှုများစွာရှိနေသော အင်းလေးဒေသကို စစ်ကောင်စီနှင့် PNO ပြည်သူ့စစ်အဖွဲ့တို့က ဒရုန်း၊လက်နက်ကြီးများဖြင့် နှစ်ရက်ဆက်တိုက်ဗုံးကြဲတိုက်ခိုက်ခဲ့ကြောင်း သတင်းရရှိသည်။

စစ်ကောင်စီပူးပေါင်းအဖွဲ့သည် တိုက်ပွဲဖြစ်ပွားခြင်းမရှိဘဲ မတ်လ ၃၀ ရက်ညနေ ၆ နာရီအချိန်တွင် ညောင်ရွှေမြို့နယ်၊ အင်းလေးဒေသတောင်ဖက်ခြမ်းရှိ ဘုရား‌တောင်ကျေးရွာကို ဒရုန်း၊ လက်နက်ကြီး ဖြင့် ၆ကြိမ် ပစ်ခတ်ခဲ့သည်ဟု အင်းလေးဒေသလူ့အခွင့်အရေးအဖွဲ့က အသိပေးသည်။

ထို့အပြင် ယမန်နေ့(မတ်လ ၃၁ ရက်)ကလည်း နံနက် ၆ နာရီမှ ည ၆နာရီထိ တနေကုန် လက်နက်ကြီး၊ ဒရုန်းဖြင့် ၈ကြိမ် ကြဲချပစ်ခတ်တိုက်ခိုက်ခဲ့သည်ဟု ဆိုသည်။

Public Service Announcement

နှစ်ရက်ဆက်တိုက်ခိုက်မှုကြောင့် ဘုရားတောင်နှင့်ရေပူကျေးရွာတို့မှ နေအိမ်သုံးလုံး ထိခိုက်ပျက်စီးခဲ့ရသည်။

“ပြည်သူတွေ စစ်ဘေးကြောင့်တိမ်းရှောင်နေရ ဒီကြားထဲ စစ်မှုထမ်းနဲ့ အဓမ္မဆက်ကြေးကောက်နေဒါတွေကြောင့် ဒုက္ခရောက်နေပြီး ယခုငလျှင်ဘေးပါလူသေဆုံးတဲ့အထိ ခံစားနေရချိန် စကစနဲ့PNO၊PNAတွေက လက်နက်ကြီး Drop Drone နဲ့ ကျူးကျော်တိုက်ခိုက်နေတာကိုတော့ ဘယ်လိုမှလက်ခံနိုင်စရာမရှိဘူး”ဟု အင်းလေးပြည်သူ့ကာကွယ်ရေးတပ်(IPDF)မှ ပြောရေးဆိုခွင့်ရှိသူ ကိုအင်းသွေးနီက လူထုနွေဦးသို့ ပြောသည်။

အင်အားပြင်းငလျင်လှုပ်ခတ်အပြီး နာရီပိုင်းအကြာမှာပင် နိုင်ငံတစ်ဝန်း အရပ်သားပစ်မှတ်များပါမချန် လေကြောင်းတိုက်ခိုက်နေသည့် စစ်ကောင်စီအား နိုင်ငံတကာအနေဖြင့် အလေးထားစောင့်ကြည့်အရေးယူသင့်ကြောင်းလည်း ၎င်းက တိုက်တွန်းသည်။

မတ်လ ၂၈ရက်က အင်အားပြင်းငလျင်ကြောင့် ပြည်သူများထိခိုက်သေဆုံးမှုများစွာရှိနေ၍ အမျိုးသားညီညွတ်ရေးအစိုးရ(NUG)၏ နှစ်ပတ်ကြာ ထိုးစစ်ရပ်မည့် ကြေညာချက်နှင့်အတူ IPDF သည် ယခုရောက်သည့်နေရာမှာပင် စစ်ကိုရပ်မည်ဟု မတ်လ ၃၀ရက်တွင် ကြေညာထားသည်။

ငလျင်ကြောင့် ရှမ်းပြည်နယ်တောင်ပိုင်း၊အင်းလေဒေသတွင် လူဦးရေ ၉၀နီးပါး၏ ရုပ်အလောင်းများ တွေ့ရှိထားပြီး ငလျင်ဒဏ်သက်ရောက်ခဲ့သည့် ကျေးရွာ ၁၉ ရွာရှိပြီး အိမ်ခြေ ၂,၃၃၇လုံး ပျက်စီးမှုရှိကြောင်း အင်းလေးဒေသလူမှုကူညီရေးအသင်းအချို့ထံမှ သိရသည်။