ငလျင်ဘေး ကူညီကယ်ဆယ်ရေး အိန္ဒိယ ၊ စင်ကာပူနဲ့မလေးရှားအဖွဲ့တွေ ပြန်လည်ထွက်ခွာ

ဧပြီ – ၇၊ ၂၀၂၅/People’s Spring

မြန်မာ့ငလျင်ဘေးကို လာရောက်ကူညီကယ်ဆယ်ရေးဆောင်ရွက်ပေးခဲ့တဲ့ အိန္ဒိယ ၊ စင်ကာပူနဲ့မလေးရှား အဖွဲ့တွေ ပြန်လည်ထွက်ခွာသွားကြပြီလို့ သက်ဆိုင်ရာအဖွဲ့တွေ ရဲ့ ထုတ်ပြန်အသိပေးချက်အရသိရပါတယ်။

ငလျင်ဘေး ရှာဖွေကယ်ဆယ်ရေး ၁၀ ရက်နီးပါးကြာ ကူညီပေးပြီးနောက် ပြန်လည်ထွက်ခွာသွားကြတာပါ။

ငလျင်လှုပ်ခတ်ပြီး မတ်လ ၂၉ ရက်မှာ အိန္ဒိယ အဖွဲ့နဲ့ စင်ကာပူအဖွဲ့ ၊ မတ်လ ၃၀ ရက်မှာ မလေးရှားအဖွဲ့တို့ဟာ ရှာဖွေကယ်ဆယ်ရေးအတွက် မြန်မာနိုင်ငံကိုရောက်ခဲ့ကြတာပါ။

Public Service Announcement

အဲဒီနောက် အိန္ဒိယအဖွဲ့က မန္တလေးမြို့ ၊ မလေးရှားအဖွဲ့က စစ်ကိုင်းမြို့ ၊ စင်ကာပူအဖွဲ့က နေပြည်တော်ကောင်စီနယ်မြေထဲက မြို့နယ်တွေနဲ့ မန္တလေးတိုင်းပျော်ဘွယ်မြို့ထဲမှာ ရှာဖွေကယ်ဆယ်ရေး လုပ်ဆောင် ပေးခဲ့ကြတယ်လို့သိရပါတယ်။

စင်ကာပူအဖွဲ့က ရှာဖွေကယ်ဆယ်ရေးသုံးပစ္စည်းတွေလည်း မီးသတ်ကို လှုဒါန်းသွားခဲ့ပါတယ်။

ဖျက်အားပြင်း ငလျင်ကြီး လှုပ်ခတ်သွားတဲ့ မြန်မာနိုင်ငံဆီ ငလျင်ကူညီကယ်ဆယ်ရေးအတွက် အိမ်နီးချင်းနိုင်ငံတွေ၊ အာဆီယံဒေသတွင်းနိုင်ငံတွေနဲ့ စစ်ကောင်စီရဲ့မဟာမိတ် ရုရှားနိုင်ငံတို့ကပါ ရှာဖွေကယ်ဆယ်ရေးအဖွဲ့တွေ စေလွှတ်ပေးခဲ့တာပါ။

ငလျင်ကြီးဒဏ်ကို မန္တလေးမြို့နဲ့စစ်ကိုင်းမြို့တို့က အဆိုးရွားဆုံးခံစားခဲ့ရတာဖြစ်ပြီး ငလျင်ကြောင့်ထိခိုက်သေဆုံးသူဦးရေကတော့ စစ်ကောင်စီရဲ့စာရင်းအရတင် ဧပြီ ၆ ရက်အထိ သေဆုံးသူ ၃,၄၅၅ ဦး၊ ထိခိုက်ဒဏ်ရာရရှိသူ ၄,၈၄၀ ဦး နဲ့ ပျောက်ဆုံးနေသူ ၂၁၄ ဦး ရှိနေပါတယ်။