ဧပြီ-၉၊၂၀၂၅။ ဧရာ/People’s Spring
မန္တလေးမြို့တွင် ယနေ့ (ဧပြီလ ၉ရက်နေ့)ညက အင်အားသိသာသည့် နောက်ဆက်တွဲမြေငလျင်လှုပ်ခတ်သဖြင့် မြို့ခံအချို့သည်စိုးရိမ်ကာ လမ်းပေါ်သို့ ပြန်ထွက်လာကြသည်။
မတ်လ ၂၈ ရက်နေ့က စစ်ကိုင်းငလျင်ကြီးလှုပ်ခတ်ပြီး နောက်ဆက်တွဲမြေငလျင်ငယ်များ မကြာခဏလှုပ်ခတ်နေရာ ဧပြီ ၉ ရက်ည ၁၀ နာရီ၂၉ မိနစ်အချိန်ခန့်တွင် မန္တလေးမြို့အနီး အုန်းချော၌ စ်ချ်တာစကေး ၄.၀ အဆင့်ငလျင် လှုပ်စဉ် မန္တလေး၌ သိသိသာသာ လှုပ်သွားခဲ့သည်။
ဓါတ်ပုံ-CJ
ဓါတ်ပုံ-CJ
ဓါတ်ပုံ-CJ
မြေအောက်အနက် ၅ ကီလိုမီတာကိုဗဟိုပြု၍ လှုပ်ခြင်းဖြစ်ပြီး စစ်ကိုင်းငလျင်ကြီး၏ နောက်ဆက်တွဲငလျင်ငယ်များ ဆက်လက် လှုပ်ခတ်နိုင်သည့်အတွက် ငလျင်ဘေးဆောင်ရန်၊ ရှောင်ရန်၊ သတိပြုရန်များနှင့်အညီ နေထိုင်ကြပါရန် အမျိုးသားညီညွတ်ရေးအစိုးရကလည်း ဧပြီ၉ ရက်ည တွင်ထုတ်ပြန်သည်။
Public Service Announcement
အမေရီကန် ငလျင်တိုင်းတာရေးဌာနက ဧပြီ ၉ ရက်ည ၁၀ နာရီ ၂၉ မိနစ်တွင်လှုပ်ခတ်သောငလျင်မှာ ကျောက်ဆည်မြို့ အနောက်မြောက်ဘက် ၁၄ ကီလိုမီတာကွာဝေးသောနေရာတွင်မြေအနက် ၁၀ ကီလိုမီတာ၌ ဗဟိုပြုပြီး အင်အား ၃ ဒသမ ၅ ဖြင့်လှုပ်ခတ်ကြောင်းထုတ်ပြန်ထားသည်။ထိုအပြင် ဧပြီ ၉ ရက် ၂ နာရီခွဲခန့်ကလည်းရွှေဘိုမြို့ ၏ အရှေ့မြောက်ဘက် ၃၂ ကီလိုမီတာကို ဗဟိုပြု၍ အင်အား ၄ ဒသမ ၇ အဆင့်ရှိငလျင် နှင့် ည ၉ နာရီ ၁၀ မိနစ်တွင် ကျောက်ဆည်မြို့၏ အနောက်တောင်ဘက် ၂၇ ကီလိုမီတာကို ဗဟိုပြု၍ အင်အား ၃ ဒသမ ၆ ရှိမြေငလျင်လှုပ်ခတ်ခဲ့ကြောင်းလည်း USGS ကထုတ်ပြန်ထားသည်။
မန္တလေးမြို့ခံများအနေဖြင့် အထပ်မြင့်တိုက်များတွင် မနေရန်၊ ဘေးလွတ်ရာ၌နေကြန် လူမှုကယ်ဆယ်ရေးအဖွဲ့များက လိုက်လံသတိပေးနေသည်။
