ဧပြီ ၁၁၊၂၀၁၅။ရဲခေါင်/People’s Spring
စစ်ကိုင်းငလျင်ကြီးကြောင့် စစ်ကိုင်းတောင်ရိုးရှိ ကျောင်းတိုက်များမှ သံဃာ၊သီလရှင်နှင့် လူပုဂ္ဂိုလ် စုစုပေါင်း ၁၇၀ သေဆုံးခဲ့ရကြောင်း စာရင်းပြုစုသည့် သံဃာတော်အချို့က ထုတ်ပြန်သည်။
စစ်ကိုင်းတောင်ရိုးရှိ သံဃာ၊သီလရှင်ကျောင်းတိုက် စုစုပေါင်း ၅၇ ခုမှာ ငလျင်ဘေးသင့်ရာတွင် သေဆုံးခဲ့မှုများဖြစ်ပေါ်ခဲ့ကြောင်း အသိပေးသည်။
သေဆုံးမှုများအနက် ရွှေဟင်္သာတိုက်သစ်မှ ရဟန်းတစ်ပါး၊သာမဏေ ငါးပါး၊အမျိုးသား သုံးဦးနှင့် အမျိုးသမီး ကိုးဦး စုစုပေါင်း ၁၈ဦးဖြင့် အများဆုံး ဖြစ်သည်။
Public Service Announcement
ရတနာသိဂီပရဟိတသီလရှင်ကျောင်းသည် သာမဏေ တစ်ပါး၊သီလရှင်တစ်ပါးနှင့် အမျိုးသား ခြောက်ဦး၊အမျိုးသမီးရှစ်ဦး သေဆုံးခဲ့ရသည်ဟု ဆိုသည်။
သုတေသကချောင် သီလရှင်ကျောင်တွင် သီလရှင် ၁၄ပါး နှင့် ဇိနောဒယကျောင်း၌ ရဟန်းရှစ်ပါးနှင့် သာမဏေသုံးပါးတို့ဖြင့် သေဆုံးမှုအများဆုံးကျောင်းတိုက်စာရင်းတွင် ပါရှိသည်။
စာရင်းချုပ်အရ ရဟန်း ၂၅ပါး၊သာမဏေ ၂၉ ပါး၊သီလရှင် ၅၀ပါး၊ အမျိုးသား ၂၁ဦးနှင့် အမျိုးသမီး ၄၅ ဦး သေဆုံးခဲ့ကြောင်း ဖော်ပြသည်။
စစ်ကိုင်းမြို့နယ်တွင် မတ်လ ၂၈ ရက်က အင်အားပြင်းငလျင်ကြောင့် သေဆုံးသူ ၁,၀၀၀ထက်မနည်းရှိကြောင်း ဒေသတွင်းသတင်းရင်းမြစ်များက ဆိုသည်။ သို့သော် စစ်ကောင်စီဘက်ကမူ စစ်ကိုင်းမြို့၌ သေဆုံးမှုအရေအတွက်ကို သီးခြားဖော်ပြခြင်းမတွေ့ရှိဘဲ စစ်ကိုင်းမြို့ငလျင်ကို အကူအညီပေးရန်လာသည့် လူမှုကူညီရေးအဖွဲ့များကိုပါ တားဆီးပိတ်ပင်ခဲ့သည်။
အမျိုးသားညီညွတ်ရေးအစိုးရ(NUG)၏ ဧပြီ ၆ရက်အထိ ကောက်ယူထားသည့်စာရင်းအရ စစ်ကိုင်းမြို့နယ်တွင် ငလျင်ကြောင့်သေဆုံးသူ ၆၉၃ဦးရှိကြောင်း သိရသည်။
