ငလျင်အပြီး မြန်မာကျောင်းသားတွေကို ငွေကြေးထောက်ပံ့ဖို့ တောင်ကိုရီးယား တက္ကသိုလ်တစ်ခု စီစဉ်

ငလျင်အပြီး မြန်မာ ကျောင်းသူကျောင်းသားတွေကို ငွေကြေး ထောက်ပံ့သွားမယ်လို့ တောင်ကိုရီးယား တက္ကသိုလ် တစ်ခုက ထုတ်ပြန်ခဲ့ပါတယ်။

မြန်မာ ကျောင်းသူကျောင်းသား ၆၁၉ ဦးအတွက် တစ်ယောက်ကို ဝမ် ၂ သိန်းစီ၊ တစ်နည်းအားဖြင့် အမေရိကန်ဒေါ်လာ ၁၄၀ ဝန်းကျင်ကို တစ်ကြိမ်တည်း အပြီးအပြတ် ထုတ်ပေးသွားမယ်လို့ ဂါချောင် တက္ကသိုလ်က ဧပြီ ၁၄ ရက်နေ့မှာ အတည်ပြုခဲ့ပါတယ်။ အဲဒီငွေကြေးဟာ ငလျင်ဘေးသင့် နိုင်ငံကနေ ကျောင်းလာတက်နေတဲ့ ကျောင်းသူကျောင်းသားတွေအတွက် အထိုက်အလျောက် အထောက်အကူ ဖြစ်စေဖို့ မျှော်လင့်ကြောင်း တက္ကသိုလ် ဘုတ်အဖွဲ့က ပြောပါတယ်။

တက္ကသိုလ် အနေနဲ့ မြန်မာကျောင်းသားတွေကို ကူညီဖို့ ဝမ် ၁၂၃ သန်း ဘတ်ဂျတ်လျာထားကြောင်းလည်း သိရပါတယ်။ မြန်မာတက္ကသိုလ် ကျောင်းသူကျောင်းသား ၃၆၇ ဦးဟာ ကိုရီးယား ဘာသာ ပညာရေး စင်တာမှာ တက်ရောက်နေပြီး ၂၂၅ ယောက်ကတော့ ဘွဲ့ကြိုသင်တန်းတွေမှာ၊ ၂၇ ဦးကတော့ ဝိဇ္ဇာသိပ္ပံဘွဲ့ သင်တန်းတွေမှာ တက်ရောက်နေတယ်လို့ တက္ကသိုလ်က ထုတ်ပြန်ပါတယ်။

မတ်လ ၂၈ ရက်နေ့တုန်းက မြန်မာနိုင်ငံမှာ လူပေါင်းထောင်နဲ့ချီ သေဆုံးစေခဲ့တဲ့ ဖျက်အားပြင်း ငလျင်ကြီး လှုပ်ခတ်ခဲ့တဲ့နောက် တက္ကသိုလ်က အခုလို စီစဉ်လာတာ ဖြစ်ပါတယ်။ ငွေကြေး အထောက်အပံ့အပြင် ဇာတိနိုင်ငံရဲ့ ငလျင်သတင်းကြောင့် ထိခိုက်သက်ရောက် ခံစားရတဲ့ မြန်မာ ကျောင်းသူကျောင်းသားတွေကို စိတ်ပိုင်းဆိုင်ရာ အကူအညီတွေလည်း ပေးသွားမယ်လို့ တက္ကသိုလ်က ပြောပါတယ်။

Public Service Announcement

မြန်မာ ပြည်သူတွေအတွက်၊ မြန်မာကျောင်းသားတွေအတွက် အထူးစာနာနားလည် ဝမ်းနည်းကြောင်း ပြောကြားလိုတယ်လို့ တက္ကသိုလ် ဥက္ကဋ္ဌ လီဂီလ်ယာက ဆိုပါတယ်။ ခက်ခဲတဲ့ ကာလတွေမှာ ကျောင်းသူကျောင်းသားတွေ ပညာရေးအတွက် ဆက်ပြီး အာရုံစိုက်နိုင်ဖို့ တက္ကသိုလ်ဖက်က အစွမ်းရှိသမျှ ဆက်ပြီး ပံ့ပိုးသွားမယ်လို့လည်း လီက ကတိပြုသွားပါတယ်။

၁၉၈၂ ခုနှစ်တုန်းက ကောလိပ်အဆင့် စတင်ထူထောင်ခဲ့တဲ့ ပုဂ္ဂလိက ပညာရေး ဌာနတစ်ခုဖြစ်တဲ့ ဂါချောင်တက္ကသိုလ်ဟာ အင်ချွန်မြို့နယ်မှာ တည်ရှိပြီး ဝန်ထမ်း ၂၈၀၀ ကျော်ရှိသလို ကျောင်းသူကျောင်းသား ၂၈၀၀၀ ဝန်းကျင် တက်ရောက် ပညာသင်ကြားနေပါတယ်။

ကိုးကား: JoonAng Daily