ဧပြီ – ၁၆ ၊၂၀၂၅ ၊ နိုင်ပကောင်း/People’s Spring
ဒီနေ့ သင်္ကြန်အတက်နေ့ (ဧပြီ ၁၆) မနက်အစောပိုင်း ၆ နာရီဝန်းကျင်မှာ ကရင်ပြည်နယ် ၊ ကော့ကရိတ်မြို့နယ်၊ ကျုံဒိုးမြို့ အနီးတဝိုက်က ကျေးရွာအချို့ လေကြောင်းတိုက်ခိုက်မှုတွေကြုံနေရတယ်လို့ ကရင်သတင်းရင်းမြစ်ထံကသိရပါတယ်။
ဒရုန်နဲ့ ဗုံးချခံရတာ ၊ လေယာဉ် နဲ့ ဗုံးကြဲ ခံရတာဖြစ်ပြီး တိုက်ခိုက်မှု ခံရတဲ့ရွာတွေကတော့ ကော့ကရိတ် – ကျုံဒိုး လမ်းတလျှောက်က ရွာအချို့ ဖြစ်တယ်လို့သိရပါတယ်။
ဒီမနက်အစောပိုင်း တိုက်ခိုက်ခံရတဲ့ရွာတွေကတော့ နွားခြံကုန်း ၊ လေးတိုင် ၊ ငါးတိုင် ၊ ကိုးတိုင် ၊ ရေပူစတဲ့ ရွာတွေဖြစ်တယ်လို့ ကရင်သတင်းရင်းမြစ်က ပြောပါတယ်။
Public Service Announcement
ကျုံဒိုးမြို့ ဒေသခံတစ်ဦးကလည်း တိုက်ပွဲမဖြစ်ဘဲ လေကြောင်းတိုက်ခိုက်ခံရတာလို့ အသိပေးပါတယ်။
“ (ဒီမနက်) တိုက်ပွဲမဖြစ်ဘူး၊ လေယာဉ်လာကြဲတာ တစ်မနက်လုံးပဲ၊ အခုထိ ပတ်ကြဲနေတယ်” လို့အဲဒီ ကျုံဒိုးဒေသခံက ပြောပါတယ်။
မနေ့ သင်္ကြန်အကြတ်နေ့ (ဧပြီ ၁၅) မနက်ပိုင်းကတော့ ကော့ကရိတ် – ကျုံဒိုးလမ်းပိုင်း ကျုံဒိုး မြို့အနီးက နေရာတွေမှာ တိုက်ပွဲဖြစ်ခဲ့တယ်လို့သိရပါတယ်။
အဲဒီနောက် နေ့လယ်ပိုင်း ၁၂ နာရီခန့်မှာ ကျုံဒိုးမြို့အနောက်တောင်ဘက်ရှိ ကမ်းနီရွာ ဘုန်းကြီးကျောင်း ဗုံးကြဲခံရပြီး အရပ်သား ၅ ဦးထက်မနည်းသေဆုံးခဲ့ရပါတယ်။
ကမ်းနီရွာ ဘုန်းကြီးကျောင်း ဗုံးကြဲမခံရခင် နာရီပိုင်းအလို မနက် ၉ နာရီဝန်းကျင်မှာ တော့ ကျုံဒိုးမြို့ အနီးက နွားခြံကုန်းရွာ လက်နက်ကြီးကျပြီး အရပ်သားထိခိုက်သေဆုံးမှုတွေ ရှိခဲ့ပါတယ်။
နွားခြံကုန်းရွာ လက်နက်ကြီးကျည်ကျတဲ့ ဖြစ်စဉ် နဲ့ အရပ်သား ထိခိုက်သေဆုံးမှု ရှိတယ်ဆိုတာပဲ ကနဦးသိထားရပြီး ထိခိုက်သေဆုံးမှု အခြေအနေကို People’s Spring က ဆက်လက်စုံစမ်းနေဆဲဖြစ်ပါတယ်။
People’s Spring ကကြည့်ရှုရတဲ့ ဓာတ်ပုံအရတော့ နွားခြံကုန်းရွာမှာ အမျိုးသမီး ၁ဦးအပါအဝင် အရပ်သား ၂ ဦးထက်မနည်း သေဆုံးထားတာတွေ့ရပါတယ်။
ကရင်ပြည်နယ်မှာ သင်္ကြန်ကာလအတွင်း ကော့ကရိတ် – ကျုံဒိုး လမ်းတလျှောက်နဲ့ ကော့ကရိတ်မြို့ မြောက်ပိုင်း မြပတိုင်ရွာ ၊ ရင်ကွဲတောင်စခန်းတဝိုက်မှာလည်း စစ်ကောင်စီတပ်နဲ့ KNU ပူးပေါင်းတပ်တွေကြား တိုက်ပွဲ ပြင်းထန်နေတယ်လို့သိရပါတယ်။
၂၀၁၉ ခုနှစ်က မိတ္ထီလာတပ်နယ်(မုန်တိုင်) မှာ ပြုလုပ်တဲ့ စစ်ရေးလေ့ကျင့်ခန်းမှာ ရုရှားထုတ် MiG -29 တိုက်လေယာဉ်နှစ်စင်းကိုတွေ့ရပုံ
