ဧပြီ ၂၀၊၂၀၂၅၊ရဲခေါင်/People’s Spring
စစ်ကိုင်းတိုင်း၊ မြင်းမူမြို့နယ်၊ ကန်တော်ကျေးရွာအား စစ်ကောင်စီက လေကြောင်းမှ ပစ်ခတ်တိုက်ခိုက်ရာ ကလေးငယ်တစ်ဦး အပါအဝင်ပြည်သူလေးဦး သေဆုံးပြီး ၁၀ဦးထက်မနည်း ဒဏ်ရာရရှိကြောင်း မြင်းမူမြို့နယ်သတင်းမှန်ပြန်ကြားရေး အဖွဲ့တာဝန်ရှိသူက ပြောသည်။
စစ်ကောင်စီသည် ဧပြီ ၁၉ ရက် နံနက် ၁၁နာရီခွဲခန့်က တိုက်ပွဲဖြစ်ပွားခြင်းမရှိဘဲ လေကြောင်းမှ တိုက်ခိုက်ခဲ့ခြင်းဟု ဆိုသည်။
“တိုက်ပွဲဖြစ်တာလဲမရှိဘူး၊ လေယာဥ်လာလာခြင်း တန်းပြီး ဗုံးကြဲ၊ရော့ကတ်နဲ့ပစ်တာဗျ”ဟု အထက်ပါတာဝန်ရှိသူက စစ်ကောင်စီ၏ လေကြောင်းမှ ပြည်သူများကို သတ်ဖြတ်ခဲ့သည့်ဖြစ်စဥ်ကို ရှင်းပြသည်။
Public Service Announcement
တိုက်ခိုက်ခံရမှုတွင် ပြည်သူလေးဦးသေဆုံး ပြီး ဒဏ်ရာရသူ ၁၀ဦးကျော်တွင်လည်း စိုးရိမ်ရသူများရှိကြောင်း အသိပေးသည်။
ဧပြီ ၉ ရက်ကလည်း မြင်းမူမြို့နယ် စံတင်ကင်းကျေးရွာအား စစ်ကြောင်းထိုးဝင်ရောက်ခဲ့သည့် စစ်ကောင်စီ၏ လက်နက်ကြီးဖြင့် ပစ်ခတ်မှုကြောင့် (၂)နှစ် အရွယ်ကလေးငယ်တစ်ဦး သေဆုံးခဲ့ရသည်။
ယခုလပိုင်းအတွင်း စစ်ကောင်စီ၏ လေကြောင်းမှ ဗုံးကြဲတိုက်ခိုက်မှုများကြောင့် ကလေးငယ်များနှင့်ဒါဇင်နှင့်ချီသော အရပ်သားပြည်သူများ သေဆုံးမှု များစွာရှိနေသည်။
ဧပြီ ၁၉ရက်နှင့် ၁၈ရက် နှစ်ရက်တည်းပင် သပိတ်ကျင်း၊စဥ့်ကူး၊တောင်သာနှင့် ကျောက်တော်မြို့နယ်များကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့ရာတွင် ပြည်သူ ၄၀ထက်မနည်း သေဆုံးခဲ့သည်။
